ନୂଆଦିଲ୍ଲୀ: ମୋଦୀ ସରକାରଙ୍କ ସକାରାତ୍ମକ ଏବଂ ନିରନ୍ତର କୂଟନୈତିକ ପ୍ରୟାସ ଗତ ଦଶନ୍ଧି ମଧ୍ୟରେ ବିଭିନ୍ନ ଦେଶରେ ଫସି ରହିଥିବା ହଜାର ହଜାର ଭାରତୀୟ ନାଗରିକଙ୍କୁ ମୁକ୍ତି ଏବଂ କ୍ଷମା ପ୍ରଦାନ କରିବାରେ ସହାୟକ ହୋଇଛି। ଏହାର ସଦ୍ୟତମ ଉଦାହରଣ ହେଉଛି ୟୁଏଇ ଦ୍ୱାରା ୫୦୦ ଭାରତୀୟ କଏଦୀଙ୍କୁ କ୍ଷମା ପ୍ରଦାନ, ଯାହାକି ଭାରତ ଏବଂ ଉପସାଗରୀୟ ଦେଶ ମଧ୍ୟରେ ଦୃଢ଼ ଦ୍ୱିପାକ୍ଷିକ ସମ୍ପର୍କକୁ ପ୍ରତିଫଳିତ କରୁଛି।
୨୦୧୪ ଠାରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱ କୂଟନୈତିକ ଆଲୋଚନା ଏବଂ ଉଚ୍ଚସ୍ତରୀୟ ହସ୍ତକ୍ଷେପ ମାଧ୍ୟମରେ ବିଦେଶରେ ବନ୍ଦୀ ଥିବା ପ୍ରାୟ ୧୦,୦୦୦ ଭାରତୀୟଙ୍କ ନିରାପଦ ପ୍ରତ୍ୟାବର୍ତ୍ତନ ସୁନିଶ୍ଚିତ କରାଯାଇଛି। ଭାରତ ସବୁବେଳେ ବିଦେଶରେ ଥିବା ଭାରତୀୟ ନାଗରିକଙ୍କ କଲ୍ୟାଣକୁ ପ୍ରାଥମିକତା ଦେଇଛି।
କୂଟନୀତିକ ପ୍ରୟାସ ମାଧ୍ୟମରେ ଭାରତୀୟ ନାଗରିକଙ୍କୁ ସୁବିଧାର କେତେକ ପ୍ରମୁଖ ଉଦାହରଣ ରହିଛି । ୟୁଏଇ ମୋଟ୍ ୨୭୮୩ ଜଣ ଭାରତୀୟ କଏଦୀଙ୍କୁ କ୍ଷମାଦାନ ଦେଇଛି। ରମଜାନ ୨୦୨୫ ପୂର୍ବରୁ ୟୁଏଇ ୫୦୦ରୁ ଅଧିକ ଭାରତୀୟ କଏଦୀଙ୍କୁ କ୍ଷମାଦାନ ଦେଇଛି। ପୂର୍ବରୁ ୨୦୨୪ରେ ଇଦ ଉଲ୍ ଫିତର ଏବଂ ୟୁଏଇର ଜାତୀୟ ଦିବସ ଅବସରରେ ଏହି ଦେଶ ୯୪୪ ଜଣ ଭାରତୀୟ କଏଦୀଙ୍କୁ ମୁକୁଳାଇଥିଲା। ୨୦୨୩ରେ ୟୁଏଇ ଅଧିକାରୀଙ୍କ ଦ୍ୱାରା ୭୦୦ରୁ ଅଧିକ ଏବଂ ୨୦୨୨ରେ ମୋଟ୍ ୬୩୯ ଜଣ ଭାରତୀୟ କଏଦୀଙ୍କୁ କ୍ଷମାଦାନ ଦିଆଯାଇଥିଲା।
ସେହିପରି ୨୦୧୯ରେ ସାଉଦୀ କ୍ରାଉନ ପ୍ରିନ୍ସ ମହମ୍ମଦ ବିନ୍ ସଲମାନ ତାଙ୍କ ଭାରତ ଗସ୍ତ ଅବସରରେ ୮୫୦ ଜଣ ଭାରତୀୟ କଏଦୀଙ୍କୁ ମୁକ୍ତ କରିବା ପାଇଁ ନିର୍ଦ୍ଦେଶ ଦେଇଥିଲେ, ଯାହା ଏକ ଗୁରୁତ୍ୱପୂର୍ଣ୍ଣ କୂଟନୀତିକ ସଫଳତା ଥିଲା।
ଅନ୍ୟ ଏକ ଘଟଣାକ୍ରମରେ ୨୦୨୩ ମସିହାରେ ଭାରତୀୟ ନୌସେନାର ଆଠ ଜଣ ପୂର୍ବତନ ଅଧିକାରୀଙ୍କୁ କତରରେ ମୃତ୍ୟୁଦଣ୍ଡ ଦିଆଯାଇଥିଲା। ଭାରତ ସରକାରଙ୍କ କୂଟନୈତିକ ହସ୍ତକ୍ଷେପ ଯୋଗୁଁ ସେମାନଙ୍କ ଦଣ୍ଡାଦେଶ ହ୍ରାସ କରାଯାଇଥିଲା। ଏହାପରେ ସେମାନଙ୍କ ମଧ୍ୟରୁ ଅଧିକାଂଶଙ୍କୁ ମୁକ୍ତ କରାଯାଇଥିଲା।
ଇରାନ୍ ୨୦୨୪ରେ ୭୭ ଜଣ ଏବଂ ୨୦୨୩ରେ ୪୩ ଜଣ ଭାରତୀୟଙ୍କୁ ମୁକ୍ତ କରିଥିଲା। ଏମାନଙ୍କ ମଧ୍ୟରେ ୧୨ ଜଣ ମତ୍ସ୍ୟଜୀବୀ ସାମିଲ ଥିଲେ। ୨୦୧୯ରେ ବାହାରିନ ଏକ ମହତ ପ୍ରୟାସ ସ୍ୱରୂପ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଗସ୍ତ ଅବସରରେ ଜେଲରେ ବନ୍ଦୀ ଥିବା ୨୫୦ ଭାରତୀୟଙ୍କୁ ମୁକ୍ତ କରିଥିଲା। ୨୦୧୭ରେ କୁଏତର ଅମୀର କୂଟନୀତିକ ଆଲୋଚନା ପରେ ୨୨ ଜଣ ଭାରତୀୟଙ୍କୁ ମୁକ୍ତ କରିଥିଲା ଏବଂ ଅନ୍ୟ ୯୭ ଜଣଙ୍କ ଦଣ୍ଡ କମାଇଥିଲା।
ନିୟମିତ ହସ୍ତକ୍ଷେପ ଫଳରେ ଶ୍ରୀଲଙ୍କା ଗିରଫ କରିଥିବା ଭାରତୀୟ ମତ୍ସ୍ୟଜୀବୀଙ୍କୁ ଏକାଧିକ ବାର ମୁକ୍ତ କରିଛି । ୨୦୧୪ ପରଠାରୁ ଏବେ ସୁଦ୍ଧା ୩୬୯୭ ଜଣ ମତ୍ସ୍ୟଜୀବୀଙ୍କୁ ଶ୍ରୀଲଙ୍କା ମୁକ୍ତ କରିସାରିଛି । ନିୟମିତ ଭାବେ ଭାରତର କୂଟନୀତିକ ହସ୍ତକ୍ଷେପ କାରଣରୁ ୨୦୧୪ଠାରୁ ବର୍ତ୍ତମାନ ସୁଦ୍ଧା ପାକିସ୍ତାନ ୨୬୩୯ ମତ୍ସ୍ୟଜୀବୀ ଏବଂ ୭୧ ଜଣ ସାଧାରଣ କଏଦୀଙ୍କୁ ମୁକ୍ତ କରିଛି।
ବିଶ୍ୱର ନେତାମାନଙ୍କ ସହ ପ୍ରଧାନମନ୍ତ୍ରୀ ମୋଦୀଙ୍କ ବ୍ୟକ୍ତିଗତ ସମ୍ପର୍କ କାରଣରୁ ଏଗୁଡ଼ିକ ମଧ୍ୟରୁ ଅନେକ ସଫଳତା ସମ୍ଭବ ହୋଇପାରିଛି। ଏହି ସଫଳ ହସ୍ତକ୍ଷେପଗୁଡ଼ିକ ଭାରତର କ୍ରମବର୍ଦ୍ଧିଷ୍ଣୁ ବିଶ୍ୱସ୍ତରୀୟ କୂଟନୈତିକ ପ୍ରତିଷ୍ଠା ଏବଂ ବିଦେଶରେ ଭାରତୀୟ ନାଗରିକମାନଙ୍କ ସୁରକ୍ଷା ପ୍ରତି ମୋଦୀ ସରକାରଙ୍କ ଅତୁଟ ପ୍ରତିବଦ୍ଧତାକୁ ପ୍ରତିଫଳିତ କରୁଛି।