ନୂଆଦିଲ୍ଲୀ: ୱାକଫ୍ ସର୍ବଦା ଗରିବଙ୍କ ପାଇଁ ଶିକ୍ଷା, ସ୍ୱାସ୍ଥ୍ୟସେବା, ଆବାସ ଏବଂ ସହାୟତା ପ୍ରଦାନ କରି ଜନ ସମ୍ପ୍ରଦାୟକୁ ସାହାଯ୍ୟ କରିବା ପାଇଁ ଉଦ୍ଦିଷ୍ଟ। କିନ୍ତୁ, ପରିଚାଳନାଗତ ଅବ୍ୟବସ୍ଥା, ଦୁର୍ନୀତି ଏବଂ ଦକ୍ଷତାହୀନତା ଭଳି ସମସ୍ୟା ପ୍ରାୟତଃ ୱକଫ ସମ୍ପତ୍ତିକୁ ସବୁଠୁ ଅସହାୟ ଗରିବଙ୍କୁ ଉପକୃତ କରିବାରେ ବାଧା ସୃଷ୍ଟି କରିଛି। ୱାକଫ୍ (ସଂଶୋଧନ) ବିଲ୍, 2025, ବ୍ୟବସ୍ଥାକୁ ଅଧିକ ସ୍ୱଚ୍ଛ, ଦକ୍ଷ କରିବା ସହ ଦାରିଦ୍ର୍ୟ ହ୍ରାସ ଉପରେ ଧ୍ୟାନ ଦେଇ ଏହାର ସମାଧାନ କରିବାକୁ ଲକ୍ଷ୍ୟ ରଖିଛି।
ୱକଫ ପରିଚାଳନାରେ ଏକ ବଡ଼ ସମସ୍ୟା ହେଉଛି ସ୍ୱଚ୍ଛତାର ଅଭାବ, ଯାହା ଦୁର୍ନୀତି ଏବଂ ପାଣ୍ଠିର ଅପବ୍ୟବହାରର କାରକ ସାଜିଛି। ନୂତନ ବିଲ୍ ସମସ୍ତ ୱାକଫ୍ ସମ୍ପତ୍ତିକୁ ରେକର୍ଡ କରିବା ପାଇଁ ଏକ ଡିଜିଟାଲ୍ ପୋର୍ଟାଲ୍ ପ୍ରଚଳନ କରିବାକୁ ଯାଉଛି, ଯାହା ସେମାନଙ୍କୁ ଟ୍ରାକ୍ ଏବଂ ଅଡିଟ୍ କରିବା ସହଜ କରିଥାଏ। ଏହା ସୁନିଶ୍ଚିତ କରେ ଯେ ପାଣ୍ଠିର ଅପବ୍ୟବହାର ନ ହେଉ ଏବଂ ଗରିବ ଲୋକଙ୍କୁ ସାହାଯ୍ୟ କରିବା ପାଇଁ ଖର୍ଚ୍ଚ ହେଉ। ବାଧ୍ୟତାମୂଳକ ଆର୍ଥିକ ଅଡିଟ୍ ଏବଂ ଡିଜିଟାଲ୍ ରେକର୍ଡ ସହିତ, ଏହି ପରିବର୍ତ୍ତନ ଦୁର୍ନୀତି ହ୍ରାସ କରିବ ଏବଂ ୱକଫ ପରିଚାଳନାକୁ ଲୋକଙ୍କ ପ୍ରତି ଅଧିକ ଉତ୍ତରଦାୟୀ କରିବ।
ୱାକଫ୍ ସମ୍ପତ୍ତି ଏବଂ ପାଣ୍ଠି ଗରିବଙ୍କ ସ୍ୱାସ୍ଥ୍ୟସେବାରେ ଉନ୍ନତି ଆଣିବା ପାଇଁ ବ୍ୟବହୃତ ହେବା ସୁନିଶ୍ଚିତ କରିବ। ମାଗଣା କିମ୍ବା ସ୍ୱଳ୍ପ ମୂଲ୍ୟର ସ୍ୱାସ୍ଥ୍ୟସେବା ଯୋଗାଇବା ପାଇଁ ୱକଫ ଜମିରେ କ୍ଲିନିକ୍ ଏବଂ ଡାକ୍ତରଖାନା ପ୍ରତିଷ୍ଠା କରାଯିବ। ଚିକିତ୍ସା ସହାୟତା କାର୍ଯ୍ୟକ୍ରମ ପାଇଁ ପାଣ୍ଠି ଯୋଗାଇବା ପାଇଁ ଦାତବ୍ୟ ସଂସ୍ଥା ସହିତ ଭାଗିଦାରୀ କରିବା ସମ୍ଭବ ହେବ। ଗରିବ ଅଞ୍ଚଳରେ ଔଷଧ ଏବଂ ଅତ୍ୟାବଶ୍ୟକ ଚିକିତ୍ସା ଅଧିକ ଉପଲବ୍ଧ କରାଇବା ସମ୍ଭବ ହେବ। ଉନ୍ନତ ପରିଚାଳନା ଦ୍ୱାରା ଅଧିକରୁ ଅଧିକ ଲୋକ ସ୍ୱାସ୍ଥ୍ୟସେବା ପାଇପାରିବେ, ଚିକିତ୍ସା ଖର୍ଚ୍ଚ ହ୍ରାସ ପାଇବ ଏବଂ ଜନସ୍ୱାସ୍ଥ୍ୟରେ ଉନ୍ନତି ଆସିବ।
ଦାରିଦ୍ର୍ୟ ବିରୋଧୀ ଲଢ଼େଇରେ ଶିକ୍ଷାର ଏକ ଗୁରୁତ୍ୱପୂର୍ଣ୍ଣ ଭୂମିକା ରହିଛି। ଏହି ବିଲରେ ଥିବା ବ୍ୟବସ୍ଥା ଆଧାରରେ ଓ୍ୱକଫ ପାଣ୍ଠିକୁ ବିଦ୍ୟାଳୟ ଏବଂ ମଦ୍ରାସା ନିର୍ମାଣ ଏବଂ ରକ୍ଷଣାବେକ୍ଷଣ, ଗରିବ ଛାତ୍ରଛାତ୍ରୀଙ୍କୁ ଛାତ୍ରବୃତ୍ତି ଏବଂ ଆର୍ଥିକ ସହାୟତା ପ୍ରଦାନ କରିବା ଏବଂ ଚାକିରି କୌଶଳ ଶିକ୍ଷା ଦେବା ପାଇଁ ଧନ୍ଦାମୂଳକ ତାଲିମ କେନ୍ଦ୍ରଗୁଡ଼ିକୁ ସହାୟତା କରିବ କ୍ଷେତ୍ରରେ ବିନିଯୋଗ କରାଯିବ । ଶିକ୍ଷା ଉପରେ ଧ୍ୟାନ କେନ୍ଦ୍ରିତ କରି, ଏହି ବିଲ୍ ଗରିବ ପୃଷ୍ଠଭୂମିର ଲୋକଙ୍କୁ ଉନ୍ନତ ଚାକିରି ପାଇବାରେ ଏବଂ ସେମାନଙ୍କ ଜୀବନରେ ଉନ୍ନତି ଆଣିବାରେ ସାହାଯ୍ୟ କରିବ।
ଅଧିକାଂଶ ଗରିବ ଲୋକ ବାସଗୃହ ଖଣ୍ଡେ ପାଇବା ଲାଗି ସଂଘର୍ଷ କରିଥା’ନ୍ତି । ବିଲ୍ ୱାକଫ୍ ବୋର୍ଡକୁ ସୁଲଭ ବାସଗୃହ ପାଇଁ ସମ୍ପତ୍ତି ବ୍ୟବହାର କରିବାକୁ ଅନୁମତି ଦିଏ। ଧାରା 32(4) ଆଧାରରେ, ଗରିବଙ୍କ ପାଇଁ ସ୍ୱଳ୍ପ ମୂଲ୍ୟର ବାସଗୃହ ନିର୍ମାଣ କରିବା, ଗୃହହୀନଙ୍କ ପାଇଁ ଆଶ୍ରୟସ୍ଥଳୀ ପ୍ରଦାନ କରିବା ଏବଂ ସ୍ୱଳ୍ପ ଆୟକାରୀ ପରିବାର ପାଇଁ ରିହାତି ଭଡ଼ା କାର୍ଯ୍ୟକ୍ରମ ସୃଷ୍ଟି କରିବାରେ ବିନିଯୋଗ କରାଯିବ। ଏହାଦ୍ୱାରା ୱକଫ ସମ୍ପତ୍ତିକୁ ଅଣବ୍ୟବହୃତ କିମ୍ବା ବେଆଇନ ଭାବେ ଦଖଲ କରାଯିବା ପରିବର୍ତ୍ତେ ଲୋକଙ୍କୁ ସାହାଯ୍ୟ କରିବା ପାଇଁ ବ୍ୟବହାର କରିବା ସୁନିଶ୍ଚିତ ହେବ।
ଦାରିଦ୍ର୍ୟ ଦୂରୀକରଣ ପାଇଁ ଲୋକମାନଙ୍କୁ ଆର୍ଥିକ ଦୃଷ୍ଟିରୁ ସ୍ୱାଧୀନ ହେବାରେ ସାହାଯ୍ୟ କରିବା ଗୁରୁତ୍ୱପୂର୍ଣ୍ଣ। ତେଣୁ ଏହି ବିଲ୍ରେ ବଢ଼େଇ କାମ, ସିଲେଇ ଏବଂ ଡିଜିଟାଲ ସାକ୍ଷରତା ଭଳି କୌଶଳ ପାଇଁ ପ୍ରଶିକ୍ଷଣ କେନ୍ଦ୍ର ପ୍ରତିଷ୍ଠା କରିବାର ବ୍ୟବସ୍ଥା ରହିଛି। ଲୋକମାନଙ୍କୁ ବ୍ୟବସାୟ ଆରମ୍ଭ କରିବାରେ ସାହାଯ୍ୟ କରିବା ପାଇଁ ଛୋଟ ଛୋଟ ଋଣ ପ୍ରଦାନ କରିବା ଏବଂ ତାଲିମପ୍ରାପ୍ତ ଶ୍ରମିକମାନଙ୍କୁ ଚାକିରି ସହିତ ଯୋଡ଼ିବା ଲାଗି ଏଥିରେ ପ୍ରାବଧାନ ରହିଛି। ଏହି ଆଭିମୁଖ୍ୟ ଲୋକମାନଙ୍କୁ କେବଳ ଦାନ ଉପରେ ନିର୍ଭର କରିବା ପରିବର୍ତ୍ତେ ଜୀବିକା ନିର୍ବାହ କରିବାରେ ସାହାଯ୍ୟ କରେ। ଏହି ଆଭିମୁଖ୍ୟ ଲୋକମାନଙ୍କୁ କେବଳ ଦାନ ଉପରେ ନିର୍ଭର କରିବା ପରିବର୍ତ୍ତେ ଜୀବିକା ନିର୍ବାହ କରିବାରେ ସାହାଯ୍ୟ କରେ।
ୱାକଫ ସମ୍ପତ୍ତିର ଏକ ପ୍ରମୁଖ ସମସ୍ୟା ହେଉଛି ବେଆଇନ ଦଖଲ। ୱାମ୍ସି ପୋର୍ଟାଲ ଅନୁଯାୟୀ, ପ୍ରାୟ 58,898 ୱାକଫ ସମ୍ପତ୍ତି ବେଆଇନ ଭାବେ ଅଧିଗ୍ରହଣ କରାଯାଇଛି। ଏହି ବିଲରେ ଥିବା କେତେକ ନିର୍ଦ୍ଦିଷ୍ଟ ବିଷୟଗୁଡ଼ିକ ପାଇଁ ଅଧିକ କଠୋର ଆଇନଗତ ପଦକ୍ଷେପ ପ୍ରଚଳନ କରାଯାଇଛି। ସାମାଜିକ କଲ୍ୟାଣ ପ୍ରକଳ୍ପ ପାଇଁ ବେଆଇନ ଭାବେ ଅଧିକୃତ ୱାକଫ ଜମିକୁ ପୁନର୍ବାର ଫେରାଇ ଆଣିବା ସହିତ ୱାକଫ ସମ୍ପତ୍ତିର ସୁରକ୍ଷା ପାଇଁ ଜିଲ୍ଲାପାଳମାନଙ୍କୁ ଅଧିକ କ୍ଷମତା ପ୍ରଦାନ କରାଯିବ। ଗରିବଙ୍କ ପାଇଁ ଉଦ୍ଦିଷ୍ଟ ସମ୍ବଳକୁ ଛଡ଼ାଇ ନେଉଥିବା ଅନଧିକୃତ ଦାବିକୁ ରୋକିବା ସମ୍ଭବ ହେବ। ଏହି ପଦକ୍ଷେପଗୁଡ଼ିକ ଅସହାୟ ଲୋକଙ୍କୁ ସାହାଯ୍ୟ କରିବା ପାଇଁ ୱାକଫ ସମ୍ପତ୍ତିର ସଠିକ୍ ବ୍ୟବହାର ସୁନିଶ୍ଚିତ କରିବ।
ଏହି ବିଲ୍ ନିରପେକ୍ଷତା ଏବଂ ସମାବେଶୀତା ମଧ୍ୟ ସୁନିଶ୍ଚିତ କରିଥାଏ, ଯାହା ଦ୍ୱାରା ଆବଶ୍ୟକ କରୁଥିବା ସମସ୍ତ ଜନ ସମ୍ପ୍ରଦାୟଙ୍କ ନିକଟରେ ସହାୟତା ପହଞ୍ଚିପାରିବ। ଏହା ଗରିବ ଲୋକଙ୍କୁ ପ୍ରାଥମିକତା ଦେଇଥାଏ ଏବଂ ୱାକଫ ସମ୍ବଳ ବିଷୟରେ ଉନ୍ନତ ନିଷ୍ପତ୍ତି ନେବା ପାଇଁ ତଥ୍ୟ ବ୍ୟବହାର କରିଥାଏ। ଏହାବ୍ୟତୀତ, ଏହି ବିଲରେ ଅଣ-ମୁସଲମାନମାନଙ୍କ ଜମି ବିବାଦକୁ ରୋକିବା ପାଇଁ ପଦକ୍ଷେପ ସାମିଲ ରହିଛି, ଯାହାଦ୍ୱାରା କଲ୍ୟାଣମୂଳକ କାର୍ଯ୍ୟରେ ବାଧା ସୃଷ୍ଟି ହେବ ନାହିଁ।
ୱାକଫ (ସଂଶୋଧନ) ବିଲ୍, 2025, କେବଳ ସମ୍ପତ୍ତି ପରିଚାଳନା ଉପରେ ଆଧାରିତ ନୁହେଁ, ବରଂ ଏହା ୱାକଫକୁ ଗରିବଙ୍କୁ ସାହାଯ୍ୟ କରିବା ପାଇଁ ଏକ ଶକ୍ତିଶାଳୀ ଉପକରଣ ପ୍ରଦାନ କରିବ। ସ୍ୱଚ୍ଛତା ବୃଦ୍ଧି କରି, ଦୁର୍ନୀତି ବନ୍ଦ କରି, ସ୍ୱାସ୍ଥ୍ୟସେବା ଓ ଶିକ୍ଷାରେ ଉନ୍ନତି କରି, ସୁଲଭ ବାସଗୃହ ପ୍ରଦାନ କରି ଏବଂ ରୋଜଗାରକୁ ସମର୍ଥନ କରି, ଏହି ବିଲ୍ ୱାକଫ୍ ପ୍ରକୃତ ଉଦ୍ଦେଶ୍ୟ ପୂରଣ କରିଥାଏ। ଏହି ସଂସ୍କାର ୱାକଫକୁ ଏହାର ମୂଳ ଲକ୍ଷ୍ୟ ପୂରଣ କରିବାରେ ସାହାଯ୍ୟ କରିବ । ସୁବିଧାରୁ ବଞ୍ଚିତ ଲୋକଙ୍କୁ ସମର୍ଥନ କରିବା ଏବଂ ଏକ ସୁନ୍ଦର ଏବଂ ଅଧିକ ନ୍ୟାୟପୂର୍ଣ୍ଣ ସମାଜ ସୃଷ୍ଟି କରିବାରେ ନୂଆ ବିଲ୍ ସହାୟକ ହେବ।