ନୂଆଦିଲ୍ଲୀ: ରେଶମ୍ ତଲୱାର୍ ସର୍ବଦା ନିଜ ସ୍ୱରର ଶକ୍ତି ଉପରେ ବିଶ୍ୱାସ କରୁଥିଲେ। ଜଣେ ଦୃଷ୍ଟିହୀନ କଳାକାର ଭାବରେ, ସେ ଜାଣିଥିଲେ ଯେ ତାଙ୍କ ସ୍ୱର କେବଳ ଶବ୍ଦଠାରୁ ଅଧିକ ସାମର୍ଥ୍ୟ ବହନ କରେ, ଏହା ଭାବପ୍ରବଣତା, ଅଭିବ୍ୟକ୍ତି ଏବଂ ଚରିତ୍ରଗୁଡ଼ିକୁ ଜୀବନ୍ତ କରିବାର କ୍ଷମତା ରଖିଥାଏ। ଏହି ସାମର୍ଥ୍ୟ ବଳରେ ନିଜ ଅକ୍ଷମତାକୁ ଅତିକ୍ରମ କରି ସେ ସ୍ୱର ଅଭିନୟ ବା ଭଏସ ଆକ୍ଟିଂରେ ନିଜ ପାଇଁ ଏକ ସ୍ୱତନ୍ତ୍ର ସ୍ଥାନ ସୃଷ୍ଟି କରିପାରିଛନ୍ତି। ଦିଲ୍ଲୀରେ ୱେଭସ୍ ଆନିମେ ଏବଂ ମାଙ୍ଗା (ୱାମ୍!) ପ୍ରତିଯୋଗିତା ର ଭଏସ୍ ଆକ୍ଟିଂ ବର୍ଗରେ ଜିତିବା ତାଙ୍କ ଯାତ୍ରାକୁ ସଫଳ କରିଥିଲା। ରେଡିଓ ଜକିଙ୍ଗ୍, ଭଏସ୍-ଓଭର ଏବଂ ଅଡିଓ ଏଡିଟିଙ୍ଗରେ ରେଶମ ତାଙ୍କ ଦକ୍ଷତାକୁ ପ୍ରମାଣିତ କରିସାରିଥିଲେ, କିନ୍ତୁ ୱାମ୍ ତାଙ୍କୁ ଉପଯୁକ୍ତ ସୁଯୋଗ ଦେବା ସହିତ ଶିଳ୍ପ ନେତୃତ୍ୱଙ୍କ ସହ ତାଙ୍କୁ ଯୋଡ଼ିଥିଲା। ୱାମ୍ କେବଳ ଏକ ପ୍ରତିଯୋଗିତା ନୁହେଁ ବରଂ ଏକ ଆନ୍ଦୋଳନ ଯାହା ସୃଜନଶୀଳ ଉଦ୍ୟୋଗରେ ପରିବର୍ତ୍ତନ ଆଣିପାରିଛି। ଏହା ରେଶମଙ୍କ ଯାତ୍ରାରୁ ପ୍ରମାଣିତ ହୋଇଛି।
ଭାରତ ସରକାରଙ୍କ ସୂଚନା ଓ ପ୍ରସାରଣ ମନ୍ତ୍ରଣାଳୟ ଏବଂ ମିଡିଆ ଓ ଏଣ୍ଟରଟେନମେଣ୍ଟ ଆସୋସିଏସନ ଅଫ୍ ଇଣ୍ଡିଆ (ଏମଇଏଆଇ) ଦ୍ୱାରା ଆନିମେ ଏବଂ ମାଙ୍ଗା କ୍ଷେତ୍ରରେ ନବ ପ୍ରତିଭାମାନଙ୍କୁ ଉପଯୁକ୍ତ ସୁଯୋଗ ଦେବା ଲାଗି ୱାମର ଆୟୋଜନ କରାଯାଉଛି। ୱାମ୍ କଳାକାରମାନଙ୍କୁ ଲୋକପ୍ରିୟ ଜାପାନୀ ଶୈଳୀର ସ୍ଥାନୀୟ ପ୍ରୟୋଗ ବିକଶିତ କରିବାକୁ ଉତ୍ସାହିତ କରେ, ଉଭୟ ଭାରତୀୟ ଓ ବିଶ୍ୱସ୍ତରୀୟ ଦର୍ଶକଙ୍କ ପାଇଁ, ପ୍ରକାଶନ, ବିତରଣ ଏବଂ ଶିଳ୍ପ ଏକ୍ସପୋଜର ପାଇଁ ସୁଯୋଗ ସହିତ ଯାହା କଳାତ୍ମକ ଅଭିବ୍ୟକ୍ତି ଏବଂ ଉଦୀୟମାନ ପ୍ରତିଭାଙ୍କୁ ପ୍ରୋତ୍ସାହନ ପ୍ରଦାନ କରେ। ୧୧ଟି ସହରରେ ରାଜ୍ୟସ୍ତରୀୟ ୱାମ୍ ପ୍ରତିଯୋଗିତା ଅନୁଷ୍ଠିତ ହେଉଛି। ମୁମ୍ବାଇରେ ଆସନ୍ତା ୧ରୁ ୪ତାରିଖ ପର୍ଯ୍ୟନ୍ତ ଅନୁଷ୍ଠିତ ହେବାକୁ ଥିବା ବିଶ୍ୱ ଅଡିଓ ଭିଜୁଆଲ୍ ଏଣ୍ଟରଟେନମେଣ୍ଟ ସମ୍ମିଳନୀ (ୱେଭସ୍) ୨୦୨୫ ଅବସରରେ ଜାତୀୟସ୍ତରର ଚୂଡ଼ାନ୍ତ ପ୍ରତିଯୋଗିତା ସହିତ ୱାମ୍ ଶେଷ ହେବ।
ୱେଭ୍ସ ଶିଖର ସମ୍ମିଳନୀର ଅଂଶବିଶେଷ ଭାବେ କ୍ରିଏଟ୍ ଇନ୍ ଇଣ୍ଡିଆ ଚାଲେଞ୍ଜ ଅନ୍ତର୍ଗତ ବିଭିନ୍ନ ପ୍ରତିଯୋଗିତା ଆୟୋଜନ କରାଯାଉଛି। ଏଥିରେ ୩୫ରୁ ଅଧିକ ଦେଶର ୫୦୦ ପ୍ରତିଯୋଗୀ ଅଂଶଗ୍ରହଣ କରୁଛନ୍ତି। ୱାମ୍ ଏହି କ୍ରିଏଟ୍ ଇଣ୍ଡିଆ ଚାଲେଞ୍ଜ ଅଧୀନରେ ଆୟୋଜିତ ହେଉଥିବା ଏକ କାର୍ଯ୍ୟକ୍ରମ। ଏଥିରେ ଆନିମେ ଏବଂ ମାଙ୍ଗା କ୍ଷେତ୍ରରେ ଆଗ୍ରହ ରଖୁଥିବା ପ୍ରତିଭା ଓ ପେସାଦାରମାନଙ୍କୁ ବିଶ୍ୱସ୍ତରୀୟ ମଞ୍ଚ ମିଳିଥାଏ। ଏହା ଏପରି ଏକ ବିପ୍ଳବ ଯାହା ଲୁକ୍କାୟିତ ଏବଂ ନବପ୍ରତିଭାମାନଙ୍କୁ ଉଦ୍ୟୋଗ ସହ ଯୋଡ଼ିବାରେ ସହାୟକ ହେଉଛି ତଥା ସେମାନଙ୍କର ସ୍ୱପ୍ନକୁ ସାକାର କରିପାରୁଛି।
ସୂଚନାଯୋଗ୍ୟ, ମାଙ୍ଗା ହେଉଛି ଏକ ପ୍ରକାରର କମିକ ବହି କିମ୍ବା ଗ୍ରାଫିକ୍ ଉପନ୍ୟାସ ଯାହା ଜାପାନରେ ଆରମ୍ଭ ହୋଇଥିଲା। ଏହା ଆପଣ ପଢ଼ୁଥିବା କମିକ୍ସ ଭଳି, କିନ୍ତୁ ଏହା ସମସ୍ତ ପ୍ରକାରର କାହାଣୀ, ରୋମାଞ୍ଚକର ଦୁଃସାହସିକ କାର୍ଯ୍ୟ, ମଧୁର ପ୍ରେମ କାହାଣୀ, ଭୟଙ୍କର ଭୟ କିମ୍ବା ଯାଦୁକରୀ କଳ୍ପନାକୁ ଅନ୍ତର୍ଭୁକ୍ତ କରେ। ମାଙ୍ଗାର ସ୍ୱାତନ୍ତ୍ର୍ୟ ହେଉଛି ଏହାର ରୂପ ଓ ଚରିତ୍ରଗୁଡ଼ିକର ପ୍ରାୟତଃ ବଡ଼, ଜୀବନ୍ତ ହୋଇଥାଏ। କାହାଣୀ ଉପରେ ନିର୍ଭର କରି ଚିତ୍ରଗୁଡ଼ିକ ଅତି ସରଳ କିମ୍ବା ବିସ୍ତୃତ ହୋଇପାରେ। ଅନ୍ୟପକ୍ଷରେ, ଆନିମେ ହେଉଛି ମାଙ୍ଗା ଭଳି ଜୀବନ୍ତ। ଏହା ଏକ କାର୍ଟୁନ୍ ସଂସ୍କରଣ ଯାହାକୁ ଆପଣ ଏକ ସ୍କ୍ରିନରେ ଦେଖିଥା’ନ୍ତି। ଏଥିରେ ଗତି ଏବଂ ସ୍ୱର ସହିତ ସମାନ ପ୍ରକାରର କାହାଣୀରେ ଯୋଡାଯାଇଛି।
ଗତ ୧୦ ବର୍ଷ ମଧ୍ୟରେ ଭାରତରେ ମାଙ୍ଗା ଓ ଆନିମେ ବିଶେଷ ଲୋକପ୍ରିୟ ହୋଇଛି। ଦେଶରେ ପ୍ରାୟ ୧୮୦ ନିୟୁତ ଆନିମେ ପ୍ରଶଂସକ ରହିଛନ୍ତି। ଚୀନ ପରେ ଭାରତ ହେଉଛି ବିଶ୍ୱର ଦ୍ବିତୀୟ ସର୍ବବୃହତ ଆନିମେ ବଜାର। ଏହି ପ୍ରଶଂସକମାନେ ଆନିମେକୁ ବିଶ୍ବସ୍ତରରେ ଆହୁରି ଲୋକପ୍ରିୟ କରିବା ସହିତ ଏହାର ବିକାଶକୁ ୬୦ ପ୍ରତିଶତ ବଢ଼ାଇବେ ବୋଲି ଆଶା କରାଯାଉଛି। ଭାରତରେ ଆନିମେ ବଜାର ଆକାର ୨୦୨୩ରେ ୧୬୪୨ ଦଶମିକ ୫ ନିୟୁତ ଡଲାର ଥିବା ବେଳେ ୨୦୩୨ରେ ଏହା ୫,୦୩୬.୦ ନିୟୁତ ଡଲାରେ ପହଞ୍ଚିବ ବୋଲି ଆଶା କରାଯାଉଛି। ବିଭିନ୍ନ ଓଟିଟି ପ୍ଲାଟଫର୍ମ ଭାରତରେ ଆନିମେ ଏବଂ ମାଙ୍ଗା ଦେଖିବାକୁ ଅଧିକ ସହଜ କରିଛନ୍ତି। ଏଭଳି ସ୍ଥିତିରେ ୱାମ୍ ଭଳି ପ୍ରତିଯୋଗିତା ସ୍ଥାନୀୟ ସୃଜନଶୀଳ ନିର୍ମାତାମାନଙ୍କୁ ଉପଯୁକ୍ତ ସୁଯୋଗ ଦେବ ବୋଲି ଆଶା କରାଯାଉଛି।
କେବଳ ରେଶମ ନୁହନ୍ତି ବାରଣାସୀ ସନବୀମ ବରୁଣାର ଜଣେ ହାଇସ୍କୁଲ୍ ଛାତ୍ରୀ ଏଞ୍ଜେଲ ଯାଦବ ଛାତ୍ର ବର୍ଗରେ ମାଙ୍ଗା ପ୍ରତିଯୋଗିତା ଜିତି ବିଚାରକମାନଙ୍କୁ ଆଚମ୍ବିତ କରିଛନ୍ତି। ତାଙ୍କର କଳାତ୍ମକ କାର୍ଯ୍ୟ କୋଲକାତାର ବୈଭବୀ ଷ୍ଟୁଡିଓକୁ ପ୍ରଭାବିତ କରିଛି ଏବଂ ଏହି ସଂସ୍ଥା ତାଙ୍କୁ ନିଯୁକ୍ତି ପ୍ରସ୍ତାବ ଦେଇଛି। ୱାମ୍ ଭୁବନେଶ୍ୱର ଜରିଆରେ ଆଗକୁ ଆସିଥିବା ଆଉ ଜଣେ ପ୍ରତିଭାସମ୍ପନ୍ନ ମାଙ୍ଗା ପେସାଦାର ହେଉଛନ୍ତି ରଣଦୀପ ସିଂ। ବିଚାରକମାନେ ତାଙ୍କ କାର୍ଯ୍ୟକୁ ଭଲ ପାଇଥିଲେ, ଏହାକୁ ମୁଦ୍ରିତ ହେବା ନିମନ୍ତେ ଯଥେଷ୍ଟ ଭଲ ବୋଲି କହିଥିଲେ।
ସେ ନିଜ ମାଙ୍ଗା ଉପରେ କାମ ଜାରି ରଖିଛନ୍ତି ଏବଂ ବୈଭବୀ ଷ୍ଟୁଡିଓରୁ ବେତନ ପ୍ରାପ୍ତ ପ୍ରକଳ୍ପ ପାଇଛନ୍ତି। ମାଙ୍ଗା କିପରି ଲୋକଙ୍କ ଜୀବନରେ ପରିବର୍ତ୍ତନ ଆଣିଛି ତାହା ଏସବୁ ଉଦାହରଣରୁ ସ୍ପଷ୍ଟ ହୋଇଛି। ଏହା ପ୍ରତିଭାମାନଙ୍କୁ ବଡ଼ ଉଦ୍ୟୋଗ ସହ କାମ କରିବା ଏବଂ କ୍ୟାରିଅରକୁ ଆଗକୁ ବଢ଼ାଇବାରେ ସହାୟକ ହୋଇଛି। ଅନେକ ଅଗ୍ରଣୀ ସଂସ୍ଥା ୱାମରେ ଅଂଶଗ୍ରହଣ କରିବା ଏବଂ ଏଠାରୁ ପ୍ରତିଭାମାନଙ୍କୁ ବାଛିବା ପାଇଁ ସହମତ ହୋଇଛନ୍ତି।