ନୂଆଦିଲ୍ଲୀ: ଜୟପୁର ସିରିଏଲ ବୋମା ବିସ୍ଫୋରଣ ମାମଲାରେ ୪ ଜଣ ଆତଙ୍କବାଦୀଙ୍କୁ ଆଜୀବନ କାରାଦଣ୍ଡରେ ଦଣ୍ଡିତ କରାଯାଇଛି। ଜୟପୁରର ସ୍ୱତନ୍ତ୍ର କୋର୍ଟ ସଇଫୁରରହମାନ, ମହମ୍ମଦ ସୈଫ, ମହମ୍ମଦ ସରୱର ଆଜମୀ ଏବଂ ଶାହାବାଜ ଅହମ୍ମଦଙ୍କୁ ଦୋଷୀ ସାବ୍ୟସ୍ତ କରି ଆଜି ଏହି ଦଣ୍ଡ ଘୋଷଣା କରିଛନ୍ତି। ୬୦୦ ପୃଷ୍ଠାରେ କୋର୍ଟ ଏହାର ବିସ୍ତୃତ ନିଷ୍ପତ୍ତି ଦେଇଛନ୍ତି।
ମେ ୧୩ ତାରିଖ ୨୦୦୮ରେ ଜୟପୁରରେ ଏକ ସିରିଏଲ ବିସ୍ଫୋରଣ ଘଟଣା ଘଟିଥିଲା। ଜୟପୁରରେ ଗୋଟିଏ ପରେ ଗୋଟିଏ ଆଠଟି ବୋମା ବିସ୍ଫୋରଣ ହୋଇଥିଲା। ଚାନ୍ଦପୋଲ ବଜାରର ଏକ ମନ୍ଦିର ନିକଟରେ ଏକ ବୋମା ମିଳିଥିଲା ଯାହା ପରେ ନିଷ୍କ୍ରିୟ କରାଯାଇଥିଲା। ସମଗ୍ର ଦେଶକୁ ଥରାଇ ଦେଇଥିବା ଏହି ସିରିଏଲ ବିସ୍ଫୋରଣରେ ୭୧ ଜଣ ପ୍ରାଣ ହରାଇଥିଲେ।
ଜୟପୁର ବୋମା ବିସ୍ଫୋରଣ ସହ ଜଡିତ ଆଠଟି ଭିନ୍ନ ଭିନ୍ନ ମାମଲାରେ ଏହି ଚାରିଜଣଙ୍କୁ ମୃତ୍ୟୁଦଣ୍ଡ ଦିଆଯାଇଥିଲା। ପରେ ମାର୍ଚ୍ଚ ୨୦୨୩ରେ ରାଜସ୍ଥାନ ହାଇକୋର୍ଟ ସମସ୍ତଙ୍କୁ ନିର୍ଦ୍ଦୋଷରେ ଖଲାସ କରିଥିଲେ। ୧୭ ବର୍ଷ ପୁରୁଣା ମାମଲାରେ ପ୍ରବର୍ତ୍ତନ ନିର୍ଦ୍ଦେଶାଳୟ ୧୧୨ ସାକ୍ଷୀଙ୍କ ବିବୃତ୍ତି ରେକର୍ଡ କରି କୋର୍ଟରେ ପ୍ରାୟ ୧୨୦୦ ଦଲିଲ ଉପସ୍ଥାପନ କରିଥିଲେ।
ଚାନ୍ଦପୋଲରେ ମିଳିଥିବା ନବମ ଜୀବନ୍ତ ବୋମା ମାମଲାରେ କୋର୍ଟରେ ଏକ ଅଲଗା ଶୁଣାଣି ହୋଇଥିଲା। ଏପ୍ରିଲ ୪ ତାରିଖ ୨୦୨୫ ରେ ଜୟପୁରର ସ୍ୱତନ୍ତ୍ର କୋର୍ଟ ଚାରିଜଣ ଅଭିଯୁକ୍ତଙ୍କୁ ଦୋଷୀ ସାବ୍ୟସ୍ତ କରିଥିଲା। ପ୍ରକାଶ ଯୋଗ୍ୟ ଯେ, ମେ ୧୩ ତାରିଖ ୨୦୦୮ ର ସନ୍ଧ୍ୟାରେ ରାଜଧାନୀ ଜୟପୁରର ସହରର ଜନଗହଳିପୂର୍ଣ୍ଣ ଆଞ୍ଚଲରେ ରାତି ପ୍ରାୟ ୭.୩୦ ସମୟରେ ଆଠଟି ବିସ୍ଫୋରଣ ହୋଇଥିଲା। ଏହି ବିସ୍ଫୋରଣରେ ୧୮୫ ରୁ ଅଧିକ ଲୋକ ମଧ୍ୟ ଆହତ ହୋଇଥିଲେ।
ଏହି ମାମଲାରେ ପୋଲିସ ସମୁଦାୟ ୧୩ ଜଣଙ୍କୁ ଅଭିଯୁକ୍ତ କରାଯାଇଥିଲା। ତିନିଜଣ ଅଭିଯୁକ୍ତ ଏପର୍ଯ୍ୟନ୍ତ ପଳାତକ ଥିବାବେଳେ ଦୁଇଜଣ ହାଇଦ୍ରାବାଦ ଏବଂ ଦିଲ୍ଲୀ ଜେଲରେ ଅଛନ୍ତି। ଦିଲ୍ଲୀର ବଟଲା ହାଉସ ଏନକାଉଣ୍ଟରରେ ଅବଶିଷ୍ଟ ଦୁଇ ଜଣଙ୍କର ମୃତ୍ୟୁ ଘଟିଛି।