କର୍ଣ୍ଣାଟକ ରାଜନୀତିରେ ପ୍ରତ୍ୟେକ ଦିନ ରୋଚକ ମୋଡ଼ ଦେଖିବାକୁ ମିଳୁଛି । ଆଜି ଦିନ ୧ଟା ୩୦ ମଧ୍ୟରେ ଆସ୍ଥା ଭୋଟ ହେବା ନେଇ ରାଜ୍ୟପାଳ ବାଚସ୍ପତିଙ୍କୁ ନିର୍ଦ୍ଦେଶ ଦେଇଥିଲେ । କିନ୍ତୁ ଏବେ ବାଚସ୍ପତି ଏହାକୁ ବେଖାତିର କରି ଆଲୋଚନା ପରେ ଆସ୍ଥା ଭୋଟ ହେବ ବୋଲି କହିଛନ୍ତି । ଏହାସହ ସେ ଗୃହକୁ ମୁଲତବି ମଧ୍ୟ ଘୋଷଣା କରିଛନ୍ତି । ବାଚସ୍ପତି ପୂର୍ବରୁ ଅନାସ୍ଥାପ୍ରସ୍ତାବ ହାସଲ ପାଇଁ ଗୁରୁବାର ସମୟ ନିର୍ଦ୍ଧାରଣ କରିଥିଲେ କିନ୍ତୁ ସନ୍ଧ୍ୟା ହେବା ପରେ ଗୃହକୁ ଦିନକ ପାଇଁ ମୁଲତବୀ ରଖି ଦେଇଥିଲେ । ଫଳରେ ଭାରତୀୟ ଜନତା ପାର୍ଟିର ବିଧାୟକମାନେ ଅମଙ୍ଗ ହୋଇଯାଇଥିଲେ । ସେମାନେ ଶକ୍ତି ପରୀକ୍ଷା ଗୁରୁବାର ହିଁ କରାଯାଉ ବୋଲି ଦାବି କରିଥିଲେ । ରାଜ୍ୟପାଳ ମଧ୍ୟ ବାଚସ୍ପତିଙ୍କୁ କହିଥିଲେ ଯେ, ଗୁରୁବାର ଦିନ ହିଁ ଅନାସ୍ଥାପ୍ରସ୍ଥାବ ଆଗତ କରାଯାଉ କିନ୍ତୁ ବାଚସ୍ପତି ନିଜର ଜିଦରୁ ଓହରି ନଥିଲେ । କର୍ଣ୍ଣାଟକରେ ଦେଖାଯାଇଥିବା ରାଜନୈତିକ ସଂକଟ ପାଇଁ ରାଜ୍ୟପାଳ ବଜୁ ଭାଇ ୱାଲା ମୁଖ୍ୟମନ୍ତ୍ରୀ କୁମାରସ୍ୱାମୀଙ୍କୁ ଚିଠି ଲେଖି ଶୁକ୍ରବାର ଅପରାହ୍ଣ ୧ଟା ୩୦ରେ ନିଜର ବହୁମତ ପ୍ରମାଣିତ କରନ୍ତୁ ବୋଲି କହିଥିଲେ । ରାଜ୍ୟପାଳଙ୍କ ଡେଡଲାଇନ ସରି ଆସୁଥିବା ଦେଖି ବିଜେପି ବିଧାୟକମାନେ ଆଜି ଗୃହରେ ନାରାବାଜି କରିଥିଲେ । କିନ୍ତୁ ଆଲୋଚନା ପୂର୍ବରୁ ଆସ୍ଥା ଭୋଟ ହେବ ନାହିଁ ବୋଲି ବାଚସ୍ପତି କହିବା ସହ ଗୃହକୁ ଅପରାହ୍ନ ୩ଟା ଯାଏଁ ମୁଲତବି ରଖିଛନ୍ତି । ଏପରିକି ଆସ୍ଥାଭୋଟକୁ ମଧ୍ୟ ଏଡାଇ ଦେଇଛନ୍ତି ବାଚସ୍ପତି ।
