ନୂଆଦିଲ୍ଲୀ: ଆଜି ବେଙ୍ଗଲ ହିଂସା ସଂପର୍କରେ ଦାଖଲ ହୋଇଥିବା ଆବେଦନ ଉପରେ ସୁପ୍ରିମକୋର୍ଟ ଶୁଣାଣି କରିବେ। ବଙ୍ଗଳା ବିଧାନସଭା ନିର୍ବାଚନ ସମୟରେ ହୋଇଥିବା ହିଂସା ସମ୍ପର୍କରେ ଏକ ପିଟିସନ ଦାଖଲ କରାଯାଇଥିଲା। ସୋମବାର ଏ ବାବଦରେ ଏକ ନୂତନ ଆବେଦନ କରାଯାଇଥିଲା ଏବଂ ରାଜ୍ୟପାଳଙ୍କଠାରୁ ରିପୋର୍ଟ ମାଗିବା ଏବଂ ସାମରିକ ବାହିନୀ ନିୟୋଜନ ପାଇଁ କେନ୍ଦ୍ର ସରକାରଙ୍କୁ ଏକ ଆବେଦନ କରାଯାଇଥିଲା।
ପଶ୍ଚିମବଙ୍ଗରେ ଖରାପ ଆଇନ ଶୃଙ୍ଖଳା, ରାଜନୈତିକ ହିଂସା ଏବଂ ହତ୍ୟା ସମ୍ପର୍କରେ ରଞ୍ଜନା ଅଗ୍ନିହୋତ୍ରୀ ଏବଂ ଜିତେନ୍ଦ୍ର ସିଂ ବିସେନଙ୍କ ଆବେଦନ ୨୦୨୧ ପରଠାରୁ ସୁପ୍ରିମକୋର୍ଟରେ ବିଚାରାଧୀନ ଅଛି।
ଏହି ଦାବି ଜଷ୍ଟିସ ଭୂଷଣ ରାମକୃଷ୍ଣ ଗଭାଇ ଏବଂ ଜଷ୍ଟିସ ଅଗଷ୍ଟିନ ଜର୍ଜ ମସିହଙ୍କ ଖଣ୍ଡପୀଠ ସମ୍ମୁଖରେ ରଖାଯାଇଥିଲା। ଏହା ଉପରେ ଜଷ୍ଟିସ୍ ଗଭଇ କହିଛନ୍ତି ଯେ, ମାମଲାର ଶୁଣାଣି ସମୟରେ ସେମାନେ ତାଙ୍କ ମତ ଉପସ୍ଥାପନ କରିବା ଉଚିତ୍। ନ୍ୟାୟପାଳିକା ସରକାରଙ୍କ କାର୍ଯ୍ୟରେ ହସ୍ତକ୍ଷେପ କରୁଥିବା ଅଭିଯୋଗକୁ ନେଇ ଚାଲିଥିବା ବକ୍ତବ୍ୟକୁ ଦର୍ଶାଇ ଜଷ୍ଟିସ ଗଭଇ କହିଛନ୍ତି ଯେ, ‘ଏହା ପୂର୍ବରୁ ଆମ ଉପରେ ଏହି ଅଭିଯୋଗ ହୋଇଛି।
ନୂତନ ଆବେଦନରେ ପଶ୍ଚିମବଙ୍ଗରେ ହିଂସା ଘଟଣାର ତଦନ୍ତ ସୁପ୍ରିମକୋର୍ଟର ଜଣେ ଅବସରପ୍ରାପ୍ତ ବିଚାରପତିଙ୍କ ନେତୃତ୍ୱରେ ତିନିଜଣିଆ କମିଟିଙ୍କୁ ଦିଆଯିବାକୁ ଦାବି କରାଯାଇଛି। ରାଜ୍ୟରେ ଲୋକଙ୍କ ସୁରକ୍ଷା ନିଶ୍ଚିତ କରାଯିବା ଉଚିତ୍। ଧାରା ୩୫୫ ଅନୁଯାୟୀ ରାଜ୍ୟରେ ଆଇନ ଶୃଙ୍ଖଳା ପରିସ୍ଥିତି ସମ୍ପର୍କରେ ରାଜ୍ୟପାଳଙ୍କଠାରୁ ଏକ ରିପୋର୍ଟ ମଗାଯିବା ଉଚିତ। ଯଦି ଏପରି ରିପୋର୍ଟରେ ରାଜ୍ୟପାଳ ଏକ ରାଜ୍ୟରେ ସାମ୍ବିଧାନିକ ବ୍ୟବସ୍ଥାର ଭଙ୍ଗ ବିଷୟରେ ରିପୋର୍ଟ କରନ୍ତି, ତେବେ ଧାରା ୩୫୬ ଅନୁଯାୟୀ ରାଜ୍ୟରେ ରାଷ୍ଟ୍ରପତି ଶାସନ ଲାଗୁ କରାଯାଇପାରିବ।
