ନୂଆଦିଲ୍ଲୀ: ଗୁରୁବାର ଦିନ ପଞ୍ଜାବ କିଙ୍ଗସ୍ ବନାମ ଦିଲ୍ଲୀ କ୍ୟାପିଟାଲ୍ସ ମ୍ୟାଚ୍ ବାତିଲ ହେବା ପରେ ବିସିସିଆଇ ମଧ୍ୟ ଚାପରେ ପଡ଼ିଛି। ଭାରତ ଏବଂ ପାକିସ୍ତାନ ମଧ୍ୟରେ ବଢ଼ୁଥିବା ଉତ୍ତେଜନା ମଧ୍ୟରେ ଧର୍ମଶାଳା ଷ୍ଟାଡିୟମରେ ସମ୍ପୂର୍ଣ୍ଣ ବ୍ଲାକଆଉଟ୍ ହେବା ପରେ ମ୍ୟାଚ୍ ବାତିଲ ଘୋଷଣା କରାଯାଇଥିଲା ଏବଂ ଯଥାଶୀଘ୍ର ପଡ଼ିଆକୁ ଖାଲି କରାଯାଇଥିଲା। ଏବେ ବିସିସିଆଇ ଉପାଧ୍ୟକ୍ଷ ରାଜୀବ ଶୁକ୍ଳା ଏକ ବଡ଼ ବୟାନ ଜାରି କରି କହିଛନ୍ତି ଯେ, ଖେଳାଳିମାନଙ୍କୁ ଧର୍ମଶାଳାରୁ ବାହାରକୁ ଆଣିବା ପାଇଁ ବୋର୍ଡ ଏକ ସ୍ୱତନ୍ତ୍ର ଟ୍ରେନ୍ ବ୍ୟବସ୍ଥା କରୁଛି।
ବିସିସିଆଇ ଉପାଧ୍ୟକ୍ଷ କହିଛନ୍ତି ଯେ, “ସମସ୍ତ ଖେଳାଳିଙ୍କୁ ସୁରକ୍ଷିତ ଭାବରେ ଫେରାଇ ଆଣିବା ପାଇଁ ଆମେ ଏକ ସ୍ୱତନ୍ତ୍ର ଟ୍ରେନ୍ ବ୍ୟବସ୍ଥା କରୁଛୁ। ବର୍ତ୍ତମାନ ପାଇଁ ପଞ୍ଜାବ କିଙ୍ଗସ୍ ବନାମ ଦିଲ୍ଲୀ କ୍ୟାପିଟାଲ୍ସ ମ୍ୟାଚ୍ ବାତିଲ ଘୋଷଣା କରାଯାଇଛି ଏବଂ ଷ୍ଟାଡିୟମକୁ ଖାଲି କରାଯାଇଛି। ଆସନ୍ତାକାଲି ପରିସ୍ଥିତି ଉପରେ ନିର୍ଭର କରି ଆଇପିଏଲ-୨୦୨୫ ଟୁର୍ଣ୍ଣାମେଣ୍ଟର ଭବିଷ୍ୟତ ନିର୍ଣ୍ଣୟ କରାଯିବ। ବର୍ତ୍ତମାନ, ସମସ୍ତ ଖେଳାଳିଙ୍କ ସୁରକ୍ଷା ପ୍ରଥମ ପ୍ରାଥମିକତା।”
ଧର୍ମଶାଳାରେ ଖେଳାଯାଇଥିବା ଏହି ମ୍ୟାଚ୍ରେ ପଞ୍ଜାବ କିଙ୍ଗ୍ସ ଟସ୍ ଜିତି ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲା। ବର୍ଷା ପ୍ରଭାବିତ ଏହି ମ୍ୟାଚ୍ରେ ଟସ୍ ବିଳମ୍ବିତ ହୋଇଥିଲା। ଯେତେବେଳେ ପଞ୍ଜାବ ବ୍ୟାଟିଂ କରିବାକୁ ଆସିଥିଲା, ପ୍ରିୟାଂଶ ଆର୍ଯ୍ୟ ଏବଂ ପ୍ରଭାସୀମନ୍ ସିଂ ବିସ୍ପୋରକ ପାଳି ଆରମ୍ଭ କରିଥିଲେ। ଉଭୟ ମିଶି ୧୦ ଓଭରରେ ଦଳର ସ୍କୋରକୁ ୧୨୨ ରନରେ ପହଞ୍ଚାଇଥିଲେ। ୩୪ ଟି ବଲରେ ପ୍ରିୟଙ୍କା ୭୦ ରନ୍ ସଂଗ୍ରହ କରିଥିଲେ।
୧୦.୧ ଓଭର ଖେଳ ପରେ ଧର୍ମଶାଳା ପଡ଼ିଆରେ ବ୍ଲାକଆଉଟ୍ ହୋଇଥିଲା। ଶ୍ରେୟସ ଆୟର କୌଣସି ବଲ୍ ନ ଖେଳି ପ୍ରଭସିମରନଙ୍କ ସହିତ ଡଗ୍ ଆଉଟ୍ କୁ ଫେରିଗଲେ। ଫ୍ଲଡ୍ ଲାଇଟ୍ ବନ୍ଦ ହେବା ପରେ, ପଡ଼ିଆ ଅନ୍ଧାର ହୋଇଗଲା। ଏହା ପରେ, ସୁରକ୍ଷା ବ୍ୟବସ୍ଥାକୁ ଧ୍ୟାନରେ ରଖି, ଷ୍ଟାଡିୟମକୁ ଶୀଘ୍ର ଖାଲି କରାଯାଇଥିଲା।
