ନୂଆଦିଲ୍ଲୀ: ଭାରତୀୟ ସେନା ସୋସିଆଲ ମିଡିଆ ପ୍ଲାଟଫର୍ମ X ରେ ଅପରେସନ ସିନ୍ଦୂର ସହିତ ଜଡିତ ଆଉ ଏକ ଭିଡିଓ ସେୟାର କରିଛି। ଏହି ଭିଡିଓରେ, ସେନାର ସୈନିକମାନେ ଆତଙ୍କବାଦୀ ଆଡ୍ଡାଗୁଡ଼ିକୁ ସମ୍ପୂର୍ଣ୍ଣ ଭାବରେ ଧ୍ୱଂସ କରୁଥିବାର ଦେଖାଯାଉଛି। ଭାରତୀୟ ସେନା ଏହି ଭିଡିଓ ସେୟାର କରି ଲେଖିଛନ୍ତି ଯେ- ‘ଯୋଜନା କରାଯାଇଛି, ତାଲିମ ଦିଆଯାଇଛି ଏବଂ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ନ୍ୟାୟ ମିଳିଲା।” ସେନା କହିଛି ଯେ, ଅପରେସନ ସିନ୍ଦୂର ପାକିସ୍ତାନ ପାଇଁ ଏକ ଶିକ୍ଷା ଥିଲା ଯାହା ସେ ଦଶନ୍ଧି ଧରି ଶିଖି ନଥିଲା।
ସେନା ତାର ଭିଡିଓରେ କହିଛି ଯେ, “ଏହା ସବୁ ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣ ସହିତ ଆରମ୍ଭ ହୋଇଥିଲା। କ୍ରୋଧ ନାହିଁ ଲାଭା ଥିଲା। ମନରେ କେବଳ ଗୋଟିଏ କଥା ଥିଲା – ଏଥର ଆମେ ସେମାନଙ୍କୁ ଏପରି ଶିକ୍ଷା ଦେବୁ ଯେ, ସେମାନଙ୍କ ପିଢ଼ି ଏହାକୁ ମନେ ରଖିବେ। ଏହା ପ୍ରତିଶୋଧର ଭାବନା ନଥିଲା, ଏହା ନ୍ୟାୟ ଥିଲା। ୯ ମଇ ରାତି ପ୍ରାୟ ୯ଟାରେ, ଯେମିତି ଅସ୍ତ୍ରବିରତି ଉଲ୍ଲଂଘନ ହେଲା, ସେମିତି ସମସ୍ତ ଶତ୍ରୁ ପୋଷ୍ଟକୁ ଭାରତୀୟ ସେନା ଦ୍ୱାରା ମାଟିରେ ମିଶାଇଦିଆଯାଇଥିଲା। ଅପରେସନ ସିନ୍ଦୁର କେବଳ ଏକ କାର୍ଯ୍ୟାନୁଷ୍ଠାନ ନଥିଲା, ଏହା ପାକିସ୍ତାନ ପାଇଁ ଏକ ଶିକ୍ଷା ଥିଲା ଯାହା ଦଶନ୍ଧି ଧରି ଶିଖି ନଥିଲା।”
ପହଲଗାମ ଆତଙ୍କବାଦୀ ଆକ୍ରମଣ ପରେ ଭାରତୀୟ ସେନା ୬-୭ ମଇ ରାତିରେ ‘ଅପରେସନ୍ ସିନ୍ଦୂର’ ଆରମ୍ଭ କରିଥିଲା। ଏହି ଅପରେସନ୍ ଅନ୍ତର୍ଗତ, ପିଓକେରେ ଥିବା ୯ ଟି ଆତଙ୍କବାଦୀ ଆଡ୍ଡାକୁ ଟାର୍ଗେଟ କରାଯାଇ ସମ୍ପୂର୍ଣ୍ଣ ଧ୍ୱଂସ କରାଯାଇଥିଲା। ଏହି ଆକ୍ରମଣରେ ୧୦୦ ରୁ ଅଧିକ ଆତଙ୍କବାଦୀ ନିହତ ହୋଇଥିଲେ। ଅପରେସନ ସିନ୍ଦୂର ପରେ ପାକିସ୍ତାନ ନିରନ୍ତର ଡ୍ରୋନ୍ ଏବଂ ମିସାଇଲ୍ ସହିତ ଭାରତୀୟ ସହରଗୁଡ଼ିକ ଉପରେ ଆକ୍ରମଣ କରିଥିଲା, ଯାହାର ଭାରତୀୟ ସେନା ଉପଯୁକ୍ତ ଜବାବ ଦେଇଥିଲା।
ପାକିସ୍ତାନର ଯୁଦ୍ଧବିରତି ଆବେଦନ ପରେ ୧୦ ମଇ ସନ୍ଧ୍ୟାରେ ଦୁଇ ଦେଶ ମଧ୍ୟରେ ଏକ ଯୁଦ୍ଧବିରତି ଚୁକ୍ତିନାମା ହୋଇଥିଲା। ତଥାପି ସେତେବେଳକୁ ଭାରତୀୟ ସେନା ପାକିସ୍ତାନକୁ ବହୁତ କ୍ଷତି ପହଞ୍ଚାଇ ସାରିଥିଲା। ଭାରତୀୟ ସେନା ପାକିସ୍ତାନର ୧୧ଟି ବାୟୁସେନା ଘାଟିକୁ ସମ୍ପୂର୍ଣ୍ଣ ଧ୍ୱଂସ କରିଦେଇଥିଲା।
