ନୂଆଦିଲ୍ଲୀ: ସେଲେବି, ଏକ ପ୍ରମୁଖ ତୁର୍କୀ ଗ୍ରାଉଣ୍ଡ ହ୍ୟାଣ୍ଡଲିଂ କମ୍ପାନୀ ଯାହା ବର୍ଷ ବର୍ଷ ଧରି ଭାରତରେ ସେବା ଯୋଗାଇ ଆସୁଛି, ଏବେ ବିବାଦର କେନ୍ଦ୍ରବିନ୍ଦୁ ପାଲଟିଛି। ଜାତୀୟ ସୁରକ୍ଷାକୁ ଦୃଷ୍ଟିରେ ରଖି ଭାରତ ସରକାର ଏହି କମ୍ପାନୀର ସେବା ବାତିଲ କରିଥିଲେ। ତୁର୍କୀ ଭାରତରେ ବିମାନବନ୍ଦର ପରିଚାଳନାରେ ବହୁ ପରିମାଣରେ ନିବେଶ କରିଥିଲା। ଭାରତ ସରକାରଙ୍କ ଏକ ନିର୍ଣ୍ଣାୟକ ନିଷ୍ପତ୍ତି ଫଳରେ କମ୍ପାନୀକୁ ମାତ୍ର ଦୁଇ ଦିନରେ ୨,୫୦୦ କୋଟିର କ୍ଷତି ସହିବାକୁ ପଡିଲା। ପ୍ରକାଶ ଯେ, ତୁର୍କୀ ରାଷ୍ଟ୍ରପତି ଏର୍ଦୋଗାନଙ୍କ ଝିଅ ସୁମେୟା ଏର୍ଦୋଗାନଙ୍କର ମଧ୍ୟ ସେଲେବିରେ ଅଂଶଧନ ଅଛି। ଏହିପରି ତାଙ୍କ ଝିଅକୁ ମଧ୍ୟ ବଡ଼ ଝଟକା ଲାଗିଛି।
ଏହି ନିଷ୍ପତ୍ତି ପରେ ତୁର୍କୀ ଷ୍ଟକ୍ ବଜାରରେ କମ୍ପାନୀର ସେୟାର ପ୍ରାୟ ୨୦ ପ୍ରତିଶତ ହ୍ରାସ ପାଇଛି। ହଂସ୍ତାବୁଲ ଏକ୍ସଚେଞ୍ଜରେ କମ୍ପାନୀଟି ୨,୨୨୪ ତୁର୍କୀ ଲିରାରେ ବନ୍ଦ ହୋଇଥିଲା, ଯାହା ପୂର୍ବ ରେକର୍ଡ ତୁଳନାରେ ପ୍ରାୟ ୧୦ ପ୍ରତିଶତ ହ୍ରାସ। ଏହା ସ୍ପଷ୍ଟ କରିଥିଲା ଯେ, ଏହି କମ୍ପାନୀର ଭାରତ ଉପରେ କେତେ ନିର୍ଭରଶୀଳତା ଥିଲା।
କମ୍ପାନୀ ଭାରତ ସରକାରଙ୍କ ନିଷ୍ପତ୍ତିକୁ କୋର୍ଟରେ ଚ୍ୟାଲେଞ୍ଜ କରିଥିଲା ଏବଂ ଦିଲ୍ଲୀ ହାଇକୋର୍ଟରେ ଏକ ପିଟିସନ୍ ଦାୟର କରିଥିଲା। ଶୁଣାଣି ସମୟରେ ସରକାରୀ ଓକିଲ ତୁଷାର ମେହତା କୋର୍ଟକୁ କହିଥିଲେ ଯେ, ଏହି ନିଷ୍ପତ୍ତି ଭାରତର ଜାତୀୟ ସୁରକ୍ଷା ସହିତ ଜଡିତ। କୋର୍ଟ ସ୍ପଷ୍ଟ କରିଛନ୍ତି ଯେ, ଦେଶର ସୁରକ୍ଷା ସର୍ବୋପରି ଏବଂ କୋର୍ଟ ଏପରି କୌଣସି ନିର୍ଦ୍ଦେଶ ଦେଇପାରିବେ ନାହିଁ ଯାହା ସୁରକ୍ଷାକୁ ବିପଦରେ ପକାଇଥାଏ।
ଭାରତର ବିକଳ୍ପ ରଣନୀତି:
ସେବା ବନ୍ଦ ହେବା ପରେ ଭାରତୀୟ ବିମାନବନ୍ଦରଗୁଡ଼ିକ ଏବେ ଏୟାର ଇଣ୍ଡିଆ ସାଟ୍ସ ଏବଂ ଟାଟା ଗ୍ରୁପ୍ ଭଳି ଘରୋଇ କମ୍ପାନୀଗୁଡ଼ିକ ଆଡ଼କୁ ମୁହାଁଇଛନ୍ତି। ଏହା କେବଳ ଭାରତୀୟ କମ୍ପାନୀଗୁଡ଼ିକୁ ଲାଭ ଦେଇଛି ତାହା ନୁହେଁ ବରଂ ଆତ୍ମନିର୍ଭରଶୀଳତା ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ଭାବରେ ବିବେଚନା କରାଯାଉଛି।
ଭାରତର ଆନ୍ତର୍ଜାତୀୟ ରଣନୀତି:
ଭାରତ ସ୍ପଷ୍ଟ କରିଛି ଯେ, ତୁର୍କୀ ସହିତ ବାଣିଜ୍ୟ ସମ୍ପର୍କକୁ ସୀମିତ କରୁଛି ଏବଂ ଫ୍ରାନ୍ସ ଭଳି ଏହାର ରଣନୈତିକ ଅଂଶୀଦାରମାନଙ୍କୁ ସମାନ ବାର୍ତ୍ତା ଦେଇଛି। ଉଲ୍ଲେଖନୀୟ ଯେ, ସମ୍ପ୍ରତି ଫ୍ରାନ୍ସ ରାଷ୍ଟ୍ରପତି ଇମାନୁଏଲ ମାକ୍ରନ ଏବଂ ତୁର୍କୀ ମଧ୍ୟରେ ସମ୍ପର୍କରେ ଏକ ପ୍ରତୀକାତ୍ମକ ଘଟଣା ମଧ୍ୟ ଗଣମାଧ୍ୟମରେ ଶିରୋନାମା କରିଥିଲା।
ଭାରତ-ପାକିସ୍ତାନ ଉତ୍ତେଜନା କାରଣ ପାଲଟିଲା:
ଭାରତ-ପାକିସ୍ତାନ ଉତ୍ତେଜନା ମଧ୍ୟରେ ତୁର୍କୀ ଖୋଲାଖୋଲି ଭାବରେ ପାକିସ୍ତାନକୁ ସମର୍ଥନ କରିଥିଲା। ଭାରତ ଉପରେ ଆକ୍ରମଣ କରିବା ପାଇଁ ପଡ଼ୋଶୀ ଦେଶକୁ ତୁର୍କୀ ଡ୍ରୋନ୍ ଯୋଗାଇଥିଲା। ଏହା ବ୍ୟତୀତ ତୁର୍କୀ ନୌସେନା ମଧ୍ୟ ପାକିସ୍ତାନକୁ ସମର୍ଥନ କରିବା ପାଇଁ ନିଜର ଯୁଦ୍ଧଜାହାଜ ପଠାଇଥିଲା। ତଥାପି ଚାରି ଦିନର ସାମରିକ ସଂଘର୍ଷ ପରେ ଯୁଦ୍ଧବିରତି ଘୋଷଣା କରାଯାଇଥିଲା, ଯାହା ପରେ ଭାରତ ତୁର୍କୀକୁ ସମ୍ପୂର୍ଣ୍ଣ ବୟକଟ କରିବାକୁ ନିଷ୍ପତ୍ତି ନେଇଥିଲା। ଏହା ଅଧୀନରେ ଭାରତୀୟ ବ୍ୟବସାୟୀମାନେ ତୁର୍କୀରୁ ମାର୍ବଲ, ସେଓ ଇତ୍ୟାଦି ଜିନିଷ ନ ମାଗିବାକୁ ନିଷ୍ପତ୍ତି ନେଇଥିଲେ। ଏହା ବ୍ୟତୀତ ଭାରତୀୟ ପର୍ଯ୍ୟଟକମାନେ ମଧ୍ୟ ତୁର୍କୀ ଯିବାର ଯୋଜନା ବାତିଲ କରିଥିଲେ।