ନୂଆଦିଲ୍ଲୀ: ପାକିସ୍ତାନ ଏବଂ ଭାରତ ମଧ୍ୟରେ ଚାଲିଥିବା ଉତ୍ତେଜନା ମଧ୍ୟରେ ମୁହାଜିରମାନଙ୍କୁ ରକ୍ଷା କରିବା ପାଇଁ ପ୍ରଧାନମନ୍ତ୍ରୀ ମୋଦିଙ୍କୁ ନିର୍ବାସିତ ପାକିସ୍ତାନୀ ନେତା ଏବଂ ମୁତାହିଦା କୌମି ମୁଭମେଣ୍ଟ (MQM) ର ପ୍ରତିଷ୍ଠାତା ଅଲତାଫ ହୁସେନ ନିବେଦନ କରିଛନ୍ତି। ମୁହାଜିରମାନେ ହେଉଛନ୍ତି ସେହି ଉର୍ଦ୍ଦୁ ଭାଷାଭାଷୀ ମୁସଲମାନ ଯେଉଁମାନେ ଭାରତ-ପାକିସ୍ତାନ ବିଭାଜନ ପରେ ପାକିସ୍ତାନର କରାଚୀ ସହରରେ ବସତି ସ୍ଥାପନ କରିଥିଲେ। ଏକଦା ସେମାନଙ୍କର ପାକିସ୍ତାନର ଶାସନ କ୍ଷମତା ଉପରେ ଦୃଢ଼ ଅଧିକାର ଥିଲା, କିନ୍ତୁ ବର୍ତ୍ତମାନ ଦଶନ୍ଧି ଧରି ସେମାନଙ୍କର ଅବସ୍ଥା ଖରାପ ଅଛି ଏବଂ ସେମାନଙ୍କୁ ଭେଦଭାବ ଏବଂ ଅତ୍ୟାଚାରର ସମ୍ମୁଖୀନ ହେବାକୁ ପଡୁଛି।
ଲଣ୍ଡନରେ ଏକ କାର୍ଯ୍ୟକ୍ରମରେ ଅଲତାଫ ହୁସେନ ମୁହାଜିରମାନଙ୍କୁ ସୁରକ୍ଷା ଦେବା ପାଇଁ ପ୍ରଧାନମନ୍ତ୍ରୀ ମୋଦିଙ୍କୁ ନିବେଦନ କରିଥିଲେ। ସେ କହିଥିଲେ ଯେ, ପ୍ରଧାନମନ୍ତ୍ରୀ ମୋଦି ବଲୁଚ୍ ଲୋକଙ୍କ ଅଧିକାରକୁ ସମର୍ଥନ କରିଛନ୍ତି, ଯାହା ଏକ ସଠିକ୍ ପଦକ୍ଷେପ ଏବଂ ସେ ମୁହାଜିର ସମ୍ପ୍ରଦାୟ ପାଇଁ ସମାନ ସମର୍ଥନ ଦେଖାଇବା ଉଚିତ। ମୁତାହିଦା କୌମି ମୁଭମେଣ୍ଟର ପ୍ରତିଷ୍ଠାତା ମଧ୍ୟ ପାକିସ୍ତାନୀ ସେନା ଉପରେ ଅଭିଯୋଗ ଆଣି କହିଛନ୍ତି ଯେ, ଏପର୍ଯ୍ୟନ୍ତ ୨୫ ହଜାରରୁ ଅଧିକ ମୁହାଜିର ସାମରିକ କାର୍ଯ୍ୟାନୁଷ୍ଠାନରେ ମୃତ୍ୟୁବରଣ କରିଛନ୍ତି ଏବଂ ହଜାର ହଜାର ଲୋକ ନିଖୋଜ ହୋଇଯାଇଛନ୍ତି। ସେ ପ୍ରଧାନମନ୍ତ୍ରୀ ମୋଦିଙ୍କୁ ଆନ୍ତର୍ଜାତୀୟ ମଞ୍ଚରେ ମୁହାଜିରଙ୍କ ସ୍ୱର ଉଠାଇବାକୁ ନିବେଦନ କରିଥିଲେ।
ଭାରତରେ ଆଶ୍ରୟ ନେବାକୁ ଆହ୍ବାନ ଦେଇଥିଲେ ଅଲତାଫ୍ ହୁସେନ:
ମୁହାଜିରଙ୍କ ସ୍ୱର ଉଠାଇବାକୁ ପ୍ରଧାନମନ୍ତ୍ରୀ ମୋଦିଙ୍କୁ ଆହ୍ବାନ ଦେଇଥିବା ଅଲତାଫ୍ ହୁସେନ କିଛି ବର୍ଷ ପୂର୍ବରୁ ପ୍ରଧାନମନ୍ତ୍ରୀ ମୋଦିଙ୍କୁ ଭାରତରେ ଆଶ୍ରୟ ଦେବାକୁ ଅନୁରୋଧ କରିଥିଲେ। ନଭେମ୍ବର ୨୦୧୯ ରେ ପ୍ରଧାନମନ୍ତ୍ରୀ ମୋଦିଙ୍କଠାରୁ ଅଲତାଫ୍ ଭାରତରେ ରାଜନୈତିକ ଆଶ୍ରୟ ମାଗିଥିଲେ ଏବଂ କହିଥିଲେ ଯେ, ତାଙ୍କୁ ଭାରତରେ ଆଶ୍ରୟ ଦିଆଯିବା ଉଚିତ ଯାହା ଦ୍ୱାରା ସେ ଭାରତରେ କବର ପାଇଥିବା ତାଙ୍କ ପୂର୍ବପୁରୁଷଙ୍କ କବର ଦର୍ଶନ କରିପାରିବେ। ସେହି ସମୟରେ ୟୁକେ ପୋଲିସ ତାଙ୍କ ବିରୁଦ୍ଧରେ ଘୃଣା ପ୍ରସାର କରିବା ଏବଂ ଆତଙ୍କବାଦକୁ ପ୍ରୋତ୍ସାହିତ କରିବା ପାଇଁ ଏକ ମାମଲା ରୁଜୁ କରିଥିଲା। ପାକିସ୍ତାନ ସରକାର ଲଗାତାର ଅଭିଯୋଗ କରିଆସୁଛି ଯେ, ହୁସେନ ଏବଂ ତାଙ୍କ ଦଳ ଭାରତର ଗୁପ୍ତଚର ସଂସ୍ଥା ରିସର୍ଚ୍ଚ ଆଣ୍ଡ୍ ଆନାଲିସିସ୍ ୱିଙ୍ଗ୍ (RAW)ର ଏଜେଣ୍ଟ।
ଅଲତାଫ୍ ହୁସେନ କରାଚୀ ସହରରେ ଜନ୍ମଗ୍ରହଣ କରିଥିଲେ:
ଅଲତାଫ୍ ହୁସେନ ୧୯୫୩ ମସିହାରେ ସିନ୍ଧର କରାଚୀ ସହରର ଏକ ମଧ୍ୟବିତ୍ତ ପରିବାରରେ ଜନ୍ମଗ୍ରହଣ କରିଥିଲେ। ତାଙ୍କ ପରିବାର ମୂଳତଃ ଉତ୍ତର ପ୍ରଦେଶର ଥିଲେ ଯାହା ଦେଶ ବିଭାଜନ ପରେ ପାକିସ୍ତାନ ଚାଲିଯାଇଥିଲା। ସେ କରାଚୀ ବିଶ୍ୱବିଦ୍ୟାଳୟରୁ ଫାର୍ମାସି ପଢିଥିଲେ, କିନ୍ତୁ ସେ ଆରମ୍ଭରୁ ରାଜନୀତି ପ୍ରତି ଆଗ୍ରହୀ ଥିଲେ। ତାଙ୍କ ଅଧ୍ୟୟନ ସମୟରେ ସେ ଅନୁଭବ କଲେ ଯେ, ପାକିସ୍ତାନରେ ମୁହାଜିର ସମ୍ପ୍ରଦାୟ (ବିଭାଜନ ପରେ ଆସିଥିବା ଭାରତରୁ ମୁସଲିମ ପ୍ରବାସୀ) ର ପ୍ରଭାବ ଧୀରେ ଧୀରେ ହ୍ରାସ ପାଉଛି। ଗୋଟିଏ ସମୟରେ ମୁହାଜିର ସମ୍ପ୍ରଦାୟ ବ୍ୟବସାୟ, ନାଗରିକ ସେବା ଏବଂ କ୍ଷମତାରେ ପ୍ରମୁଖ ଭୂମିକା ଗ୍ରହଣ କରୁଥିବା ବେଳେ ୧୯୭୦ ଦଶକର ଶେଷ ସୁଦ୍ଧା ସେମାନଙ୍କର ସ୍ଥିତି ଦୁର୍ବଳ ହେବାରେ ଲାଗିଲା। ସେମାନଙ୍କ ସ୍ଥାନରେ ସ୍ଥାନୀୟ ସିନ୍ଧୀ ଏବଂ ପଞ୍ଜାବୀ ସମ୍ପ୍ରଦାୟ ଧୀରେ ଧୀରେ ପ୍ରାଧାନ୍ୟ ବିସ୍ତାର କରିବାକୁ ଲାଗିଲେ।
ଅଲତାଫ ହୁସେନ ୧୯୮୪ ମସିହାରେ MQM ଦଳ ପ୍ରତିଷ୍ଠା କରିଥିଲେ:
ଏପରି ପରିବେଶରେ ଆଲତାଫ ହୁସେନ ମୁହାଜିରମାନଙ୍କର ନେତୃତ୍ୱ ନେବାକୁ ଆଗକୁ ଆସିଥିଲେ ଏବଂ ୧୯୮୪ ମସିହାରେ MQM ଦଳ ପ୍ରତିଷ୍ଠା କରିଥିଲେ। ଦଳକୁ କରାଚୀର ଲୋକଙ୍କଠାରୁ ବହୁତ ସମର୍ଥନ ମିଳିଥିଲା ଏବଂ ତିନି ବର୍ଷ ପରେ ଦଳ ସିନ୍ଧର ସହରାଞ୍ଚଳରେ ଏକ ବଡ଼ ବିଜୟ ହାସଲ କରିଥିଲା। MQM ଶୀଘ୍ର ପାକିସ୍ତାନର ସଂସଦ, ଜାତୀୟ ସଭାରେ ତୃତୀୟ ବୃହତ ରାଜନୈତିକ ଦଳ ଭାବରେ ଉଭା ହୋଇଥିଲା ଏବଂ ତା’ପରେ କରାଚୀ ଉପରେ ଦଳର ରାଜନୈତିକ ପ୍ରାଧାନ୍ୟ ଦଶନ୍ଧି ଧରି ଜାରି ରହିଥିଲା। ଏହି ସାମାଜିକ-ରାଜନୈତିକ ପରିବର୍ତ୍ତନ ଦେଖି ଆଲତାଫ ହୁସେନ ମୁହାଜିରଙ୍କ ଅଧିକାର ପାଇଁ ସ୍ୱର ଉଠାଇବାକୁ ନିଷ୍ପତ୍ତି ନେଇଥିଲେ ଏବଂ ପରେ ସେ ମୁହାଜିର ରାଜନୀତିର ଏକ ପ୍ରମୁଖ ଚେହେରା ହୋଇଗଲେ।
ଏପରି ଏକ ସମୟ ଥିଲା ଯେତେବେଳେ କରାଚୀ ସହରରେ ଅଲତାଫ ହୁସେନଙ୍କ ନାମ ଆତଙ୍କ ଏବଂ ପ୍ରାଧାନ୍ୟର ସମାର୍ଥକ ହୋଇଯାଇଥିଲା। ତାଙ୍କର ଏକ ସ୍ୱରରେ ସମଗ୍ର ସହର ସ୍ତବ୍ଧ ହୋଇଯାଉଥିଲା, ଯେପରି କର୍ଫ୍ୟୁ ଜାରି କରାଯାଇଥିଲା। ତାଙ୍କ ବିରୋଧୀମାନଙ୍କ ପ୍ରତି ଭୟର ପରିବେଶ ଏତେ ଗଭୀର ଥିଲା ଯେ, ତାଙ୍କ ସହିତ ମତଭେଦ କରୁଥିବା ଲୋକଙ୍କ ମୃତଦେହ ପ୍ରାୟତଃ ବସ୍ତାରେ ଭର୍ତ୍ତି ମିଳୁଥିଲା। ୧୯୮୦ ଦଶକରେ କରାଚୀରେ ‘ବସ୍ତା ବନ୍ଧା ମୃତଦେହ’ ସାଧାରଣ ହୋଇଗଲା, ଯାହା ଯୋଗୁଁ ପୋଲିସ ଏବଂ ସୁରକ୍ଷା ଏଜେନ୍ସିଗୁଡ଼ିକ ସତର୍କ ହୋଇଗଲେ। ପରିସ୍ଥିତି ଏତେ ଗମ୍ଭୀର ହୋଇଗଲା ଯେ ୧୯୯୦ ଦଶକରେ ଅଲତାଫ ହୁସେନଙ୍କ ବିରୁଦ୍ଧରେ ହତ୍ୟା ଏବଂ ହିଂସାର ଡଜନ ଡଜନ ମାମଲା ରୁଜୁ ହୋଇଥିଲା।
୧୯୯୨ ମସିହାରେ ପରିସ୍ଥିତି ଏତେ ଖରାପ ହୋଇଗଲା ଯେ, ଆଲତାଫ ହୁସେନଙ୍କୁ ପାକିସ୍ତାନ ଛାଡିବାକୁ ପଡିଲା ଏବଂ ସେ ବ୍ରିଟେନରେ ଆଶ୍ରୟ ନେଲେ। ପୂର୍ବରୁ ତାଙ୍କ ଉପରେ ଅନେକ ଥର ଆକ୍ରମଣ ହୋଇଥିଲା ଯେଉଁଥିରେ ସେ ତାଙ୍କ ଭାଇ ଏବଂ ଭଣଜାଙ୍କୁ ହରାଇଥିଲେ ଏବଂ ନିଜେ ମଧ୍ୟ ଆହତ ହୋଇଥିଲେ। ବ୍ରିଟେନ ତାଙ୍କୁ ଶରଣ ଦେଇଥିଲା ଏବଂ ପରେ ସେ ବ୍ରିଟିଶ ନାଗରିକତା ପାଇଥିଲେ।
ଲଣ୍ଡନରୁ କରାଚୀ ଉପରେ ପ୍ରଭାବ:
ଲଣ୍ଡନରେ ରହୁଥିବା ସମୟରେ ମଧ୍ୟ କରାଚୀରେ ଅଲତାଫ ହୁସେନଙ୍କ ପ୍ରଭାବ ଅକ୍ଷୁର୍ଣ୍ଣ ରହିଥିଲା। ସେ ଫୋନ୍ ମାଧ୍ୟମରେ ଭାଷଣ ଦେଉଥିଲେ ରାଜନୈତିକ ସଭାକୁ ସମ୍ବୋଧିତ କରୁଥିଲେ ଏବଂ ସିଧାସଳଖ ତାଙ୍କ ବିରୋଧୀମାନଙ୍କୁ ଧମକ ଦେଉଥିଲେ। ୨୦୧୪ ପରେ ତାଙ୍କର ପ୍ରଭାବ ଧୀରେ ଧୀରେ ଦୁର୍ବଳ ହେବାକୁ ଲାଗିଲା। ୨୦୧୫ ରେ ସେ ଏକ ବିବାଦୀୟ ବୟାନ ଦେଇଥିଲେ ଯେଉଁଥିରେ ସେ କହିଥିଲେ ଯେ, ପାକିସ୍ତାନରେ ମୁହାଜିରମାନଙ୍କ ଅବସ୍ଥା ପାଇଁ ଭାରତ ଲଜ୍ଜିତ ହେବା ଉଚିତ। ଏହି ବୟାନ ଏକ ବିରାଟ ରାଜନୈତିକ ଆଲୋଡ଼ନ ସୃଷ୍ଟି କରିଥିଲା।