ନୂଆଦିଲ୍ଲୀ: ପ୍ରସିଦ୍ଧ ଅଭିନେତ୍ରୀ ଏବଂ ନିର୍ଦ୍ଦେଶିକା ତନିଷ୍ଠା ଚାଟାର୍ଜୀ ଗଭୀର ଦୁଃଖରେ ଅଛନ୍ତି। କିଛି ସମୟ ପୂର୍ବରୁ ସେ ତାଙ୍କ ବାପାଙ୍କୁ ହରାଇଥିଲେ ଏବଂ ଏବେ ସେ କର୍କଟ ରୋଗର ଶିକାର ହୋଇଛନ୍ତି। ତନିଷ୍ଠାଙ୍କ ଚତୁର୍ଥ ଷ୍ଟେଜ୍ ସ୍ତନ କର୍କଟ ରୋଗ। ଯେତେବେଳେ ତନିଷ୍ଠା ଏହି ବିଷୟରେ ଜାଣିବାକୁ ପାଇଲେ, ସେ ସମ୍ପୂର୍ଣ୍ଣ ଭାଙ୍ଗି ପଡ଼ିଥିଲେ। ସେ ନିକଟରେ ଏକ ସାକ୍ଷାତକାରରେ ତାଙ୍କ କର୍କଟ ରୋଗ ବିଷୟରେ କହିଥିଲେ। ତନିଷ୍ଠା କହିଥିଲେ ଯେ, ସେ ତାଙ୍କ ଝିଅ ପାଇଁ ବହୁତ ଚିନ୍ତିତ।
ଟାଇମ୍ସ ଅଫ୍ ଇଣ୍ଡିଆ ସହିତ ଏକ ସ୍ୱତନ୍ତ୍ର ଆଲୋଚନାରେ ତନିଷ୍ଠା ତାଙ୍କ କର୍କଟ ରୋଗ ବିଷୟରେ କହିଥିଲେ। ଚାରି ମାସ ପୂର୍ବରୁ ତନିଷ୍ଠା ତାଙ୍କ କର୍କଟ ରୋଗ ବିଷୟରେ ଜାଣିବାକୁ ପାଇଥିଲେ। ସେ କହିଥିଲେ ଯେ, ଗତ ବର୍ଷ ମୁଁ ମୋ ବାପାଙ୍କୁ କର୍କଟ ରୋଗରେ ହରାଇଥିଲି। ଯେତେବେଳେ ମୁଁ ଏହି ଆଘାତରୁ ଧୀରେଧିରେ ମୁକୁଳୁଥିଲି, ସେତେବେଳେ ମୁଁ ମୋ ରୋଗ ବିଷୟରେ ଜାଣିଲି।
ତନିଷ୍ଠା କହିଥିଲେ ଯେ, ‘ମୋ ଜୀବନରେ ସବୁକିଛି ହରାଇଛି। କିନ୍ତୁ ମୁଁ ଭାଙ୍ଗି ପଡ଼ିନାହିଁ। ମୁଁ ଏଥିରୁ ମାନବିକତା ଶିଖିଛି। ଲୋକମାନେ ଆପଣଙ୍କ ବିଷୟରେ ଚିନ୍ତା କରନ୍ତି। ଏହା ପ୍ରଥମ ଥର ମୁଁ ଶକ୍ତିଶାଳୀ ହେବାରେ କ୍ଳାନ୍ତ ହୋଇଯାଇଛି। ଗତ ବର୍ଷ ମୁଁ ମୋ ବାପାଙ୍କୁ କର୍କଟ ରୋଗରେ ହରାଇଥିଲି। ମୁଁ ତାଙ୍କ ମୃତ୍ୟୁରେ ଶୋକ ମଧ୍ୟ କରିପାରିଲି ନାହିଁ କାରଣ ମୋର ଜଣେ ୭୦ ବର୍ଷୀୟ ମା ଏବଂ ଜଣେ ୯ ବର୍ଷୀୟ ଝିଅର ଯତ୍ନ ନେବାକୁ ଅଛି। ମୋତେ ସେମାନଙ୍କ ପାଇଁ ଦୃଢ଼ ହେବାକୁ ପଡିଲା। ଯେଉଁଦିନ ମୁଁ ଚତୁର୍ଥ ପର୍ଯ୍ୟାୟ ସ୍ତନ କର୍କଟ ବିଷୟରେ ଜାଣିଲି, ମୁଁ ଭାବିଲି ଯେ ମୋ ସହିତ ଏପରି କାହିଁକି ହେଲା? ଏହା ମୋର କି କର୍ମର ଫଳ?’
