ନୂଆଦିଲ୍ଲୀ: ଆଜି ବିହାର ଆରଜେଡିର ସଭାପତି ପଦ ପାଇଁ ମଙ୍ଗନି ଲାଲ ମଣ୍ଡଳ ନାମାଙ୍କନ ଦାଖଲ କରିଛନ୍ତି। ନାମାଙ୍କନ ଦାଖଲ କରିବା ପାଇଁ ସେ ବିରୋଧୀ ଦଳ ନେତା ତେଜସ୍ୱୀ ଯାଦବଙ୍କ ସହିତ କାର ଯୋଗେ ଦଳୀୟ କାର୍ଯ୍ୟାଳୟରେ ପହଞ୍ଚିଥିଲେ। ନାମାଙ୍କନ ସମୟରେ ଆରଜେଡି ସୁପ୍ରିମୋ ଲାଲୁ ଯାଦବ, ରାବ୍ରୀ ଦେବୀ ଏବଂ ମୀସା ଭାରତୀ ମଧ୍ୟ ଉପସ୍ଥିତ ଥିଲେ।
ମଙ୍ଗନି ଲାଲ ମଣ୍ଡଳଙ୍କ ନିର୍ବିରୋଧୀ ନିର୍ବାଚିତ ନିଶ୍ଚିତ। କାରଣ କେବଳ ସେ ସଭାପତି ପଦ ପାଇଁ ନାମାଙ୍କନ ଦାଖଲ କରିଛନ୍ତି। ସେ ଆରଜେଡି କାର୍ଯ୍ୟାଳୟରେ ଦଳର ରାଜ୍ୟ ନିର୍ବାଚନ ଅଧିକାରୀ ଡକ୍ଟର ତନବୀର ହାସନଙ୍କ ସମ୍ମୁଖରେ ନାମାଙ୍କନ ପତ୍ର ଦାଖଲ କରିଛନ୍ତି। ୧୯ ଜୁନ୍ ରେ ପାଟନାର ଜ୍ଞାନ ଭବନରେ ଆରଜେଡିର ରାଜ୍ୟ ପରିଷଦ ବୈଠକରେ ତାଙ୍କ ନାମ ଆନୁଷ୍ଠାନିକ ଭାବରେ ଘୋଷଣା କରାଯିବ।
ଜଗଦାନନ୍ଦ ସିଂହଙ୍କ ସ୍ଥାନରେ ୭୬ ବର୍ଷୀୟ ମଙ୍ଗନି ଲାଲ ମଣ୍ଡଳ ବିହାର ଆରଜେଡି ସଭାପତି ଦାୟିତ୍ୱ ପାଇବାକୁ ଯାଉଛନ୍ତି। ତାଙ୍କ ମାଧ୍ୟମରେ ନିର୍ବାଚନ ବର୍ଷରେ RJD ଅତ୍ୟନ୍ତ ପଛୁଆ ବର୍ଗକୁ ଆକର୍ଷିତ କରିବାକୁ ଚେଷ୍ଟା କରୁଛି। ସେ ଅତ୍ୟନ୍ତ ପଛୁଆ ସମାଜର ଜଣେ ବଡ଼ ନେତା। ଏହି ବର୍ଗର ଜନସଂଖ୍ୟା ବିହାରରେ ସର୍ବାଧିକ ୩୬ ପ୍ରତିଶତ। ମଙ୍ଗନି ଲାଲ ମଣ୍ଡଳ ଦୀର୍ଘ ସମୟ ଧରି RJDରେ ଥିଲେ। ଏହା ପରେ ସେ JDUକୁ ଚାଲିଗଲେ।
ଏହି ବର୍ଷ ଜାନୁଆରୀରେ ସେ JDU ଛାଡି RJDକୁ ଫେରି ଆସିଲେ। ସେ ୧୯୮୬ ରୁ ୨୦୦୪ ପର୍ଯ୍ୟନ୍ତ ବିହାର ବିଧାନ ପରିଷଦର ସଦସ୍ୟ ଥିଲେ। ଏହି ସମୟ ମଧ୍ୟରେ ସେ ରାଜ୍ୟ କ୍ୟାବିନେଟରେ ମନ୍ତ୍ରୀ ମଧ୍ୟ ଥିଲେ। ସେ ୨୦୦୪ ରୁ ୨୦୦୯ ପର୍ଯ୍ୟନ୍ତ ରାଜ୍ୟସଭା ସାଂସଦ ମଧ୍ୟ ରହିସାରିଛନ୍ତି। ଚଳିତ ବର୍ଷ ଅକ୍ଟୋବର-ନଭେମ୍ବରରେ ବିହାରରେ ବିଧାନସଭା ନିର୍ବାଚନ ଅନୁଷ୍ଠିତ ହେବ। ବର୍ତ୍ତମାନ ସମୟ କହିବ ଯେ, ନିର୍ବାଚନରେ RJD ଏହି ନିଷ୍ପତ୍ତିରୁ କେତେ ଲାଭ ପାଇବ।