ନୂଆଦିଲ୍ଲୀ: ୨୦୨୬ ମସିହାରେ ଅନୁଷ୍ଠିତ ହେବାକୁ ଥିବା ଟି୨୦ ମହିଳା ବିଶ୍ୱକପ୍ ଇଂଲଣ୍ଡ ଆୟୋଜନ କରିବ। ଇଂଲଣ୍ଡ ଏବଂ ୱେଲ୍ସ କ୍ରିକେଟ୍ ବୋର୍ଡ (ECB) ବିଶ୍ୱକପର କାର୍ଯ୍ୟସୂଚୀ ପ୍ରକାଶ କରିଛି, ଯାହା ଅନୁଯାୟୀ ଟୁର୍ଣ୍ଣାମେଣ୍ଟର ପ୍ରଥମ ମ୍ୟାଚ୍ ଆୟୋଜକ ଇଂଲଣ୍ଡ ଏବଂ ଶ୍ରୀଲଙ୍କା ମଧ୍ୟରେ ଖେଳାଯିବ। ଟି-୨୦ ବିଶ୍ୱକପ୍ ଜୁନ୍ ୧୨ ତାରିଖରୁ ଜୁଲାଇ ୫ ତାରିଖ ପର୍ଯ୍ୟନ୍ତ ଅନୁଷ୍ଠିତ ହେବ। ଭାରତୀୟ ଦଳର ପ୍ରଥମ ମ୍ୟାଚ୍ ଜୁନ୍ ୧୪ ତାରିଖରେ ଚିରପ୍ରତିଦ୍ୱନ୍ଦ୍ୱୀ ପାକିସ୍ତାନ ବିପକ୍ଷରେ ହେବ। ପ୍ରକାଶ ଯୋଗ୍ୟ ଯେ, ବିଶ୍ୱକପରେ ମୋଟ ୧୨ ଦଳ ଅଂଶଗ୍ରହଣ କରିବେ, ଯାହାକୁ ୬ ଟି ଦଳର ଦୁଇଟି ଗ୍ରୁପ୍ ରେ ବିଭକ୍ତ କରାଯିବ।
୧୨ ଟି ଦଳକୁ ୬ ଟି ଦଳର ଦୁଇଟି ଗ୍ରୁପ୍ ରେ ବିଭକ୍ତ କରାଯିବ। ପ୍ରତ୍ୟେକ ଗ୍ରୁପ୍ ର ଶୀର୍ଷ-୨ ରେ ଥିବା ଦଳ ସେମିଫାଇନାଲ୍ ରେ ପ୍ରବେଶ କରିବ। ଭାରତ, ପାକିସ୍ତାନ, ଦକ୍ଷିଣ ଆଫ୍ରିକା, ଅଷ୍ଟ୍ରେଲିଆ ଏବଂ ଅନ୍ୟ ୨ ଟି ଯୋଗ୍ୟତା ଅର୍ଜନକାରୀ ଦଳ ଗ୍ରୁପ-ଏରେ ସ୍ଥାନିତ ହୋଇଥିବା ସୂଚନା ମିଳିଛି। ସେହିଭଳି ଇଂଲଣ୍ଡ, ୱେଷ୍ଟଇଣ୍ଡିଜ୍, ନ୍ୟୁଜିଲ୍ୟାଣ୍ଡ, ଶ୍ରୀଲଙ୍କା ଏବଂ ଅନ୍ୟ ୨ ଟି ଯୋଗ୍ୟତା ଅର୍ଜନକାରୀ ଦଳ ଗ୍ରୁପ-ବିରେ ସ୍ଥାନ ପାଇବେ।
ବିଶ୍ୱକପ୍ ଟୁର୍ଣ୍ଣାମେଣ୍ଟ ପାଇଁ ମୋଟ ୬ ଟି ଗ୍ରାଉଣ୍ଡ ଚୟନ କରାଯାଇଛି। ସେଗୁଡିକ ହେଲା ଲର୍ଡସ୍, ଦି ଓଭାଲ୍, ଏଜବାଷ୍ଟନ୍, ଓଲ୍ଡ ଟ୍ରାଫୋର୍ଡ କ୍ରିକେଟ୍ ଗ୍ରାଉଣ୍ଡ, ବ୍ରିଷ୍ଟଲ୍ କାଉଣ୍ଟି ଗ୍ରାଉଣ୍ଡ ଏବଂ ହାମ୍ପଶାୟାର ବଲ୍ ଗ୍ରାଉଣ୍ଡ। ଭାରତୀୟ ସମୟ ଅନୁଯାୟୀ, ମ୍ୟାଚ୍ ଗୁଡ଼ିକ ଅପରାହ୍ନ ୩ ଟା, ସନ୍ଧ୍ୟା ୭ ଟା ଏବଂ ରାତି ୧୧ ଟାରେ ଆରମ୍ଭ ହେବ।
ବିଶ୍ୱକପ୍ ପାଇଁ ଭାରତର କାର୍ଯ୍ୟସୂଚୀ:
୨୦୨୬ ମହିଳା ଟି-୨୦ ବିଶ୍ୱକପ୍ ରେ ଭାରତର ପ୍ରଥମ ମ୍ୟାଚ୍ ଜୁନ୍ ୧୪ ତାରିଖରେ ଚିରପ୍ରତିଦ୍ୱନ୍ଦ୍ୱୀ ପାକିସ୍ତାନ ବିପକ୍ଷରେ ହେବ। ଜୁନ୍ ୧୭ ତାରିଖରେ ଗ୍ରୁପ୍-ଏରେ ଯୋଗ୍ୟତା ଅର୍ଜନ କରିଥିବା ଦଳ ସହିତ ମୁକାବିଲା କରିବାକୁ ପଡିବ, ଯେତେବେଳେ ଜୁନ୍ ୨୧ ତାରିଖରେ ଦକ୍ଷିଣ ଆଫ୍ରିକା ସହିତ ଏବଂ ଜୁନ୍ ୨୫ ତାରିଖରେ ଦ୍ୱିତୀୟ ଯୋଗ୍ୟତା ଅର୍ଜନକାରୀ ଦଳ ସହିତ ମ୍ୟାଚ୍ ହେବ। ଟିମ୍ ଇଣ୍ଡିଆର ଶେଷ ଗ୍ରୁପ୍ ମ୍ୟାଚ୍ ଜୁନ୍ ୨୮ ତାରିଖରେ ଅଷ୍ଟ୍ରେଲିଆ ବିପକ୍ଷରେ ହେବ।