ଭୁବନେଶ୍ବର: ସେ ଓଏଏସ ବା ଓଡିଶା ପ୍ରଶାସନିକ ସେବା ଚାକିରୀରୁ ଅବସର ନେଇ ସାରିଲେଣି। ହେଲେ ଅବସର ପରେ ତାଙ୍କୁ ଦିଆଯିବ ଆଇଏଏସ ପଦନ୍ନୋତି। ଏହିପରି ଏକ ଭିନ୍ନ ଘଟଣା ଓଡିଶାରେ ଘଟିଛି। ଓଡିଶା ହାଇକୋର୍ଟଙ୍କ ଶୁଣାଣି ପରେ ତାଙ୍କୁ ଆଇଏଏସ ଚାକିରୀ ଦେବା ପାଇଁ ନିର୍ଦ୍ଦେଶ ଦିଆଯାଇଛି। ଯାହାକୁ ନେଇ ପ୍ରଶାସନିକ ସ୍ତରରେ ବେଶ ଚର୍ଚ୍ଚାର ବିଷୟ ପାଲଟିଛି।
ଘଟଣାଟି ହେଲା ବରିଷ୍ଠ ଓଏଏସ ଅଧିକାରୀ ସଂଜିତା ଦାସ ସ୍ବତନ୍ତ୍ର ସଚିବ ଭାବେ ବୋର୍ଡ ଅଫ ରେଭିନ୍ୟୁରୁ ଗତ ମେ 31 ତାରିଖ 2025 ରେ ଅବସର ନେଇଛନ୍ତି। ସେ 1995 ମସିହାରେ କଟକ ମ୍ୟୁନିସପାଲ କରର୍ପୋରେସନରେ ଅତିରିକ୍ତ କାର୍ଯ୍ୟନିର୍ବାହୀ ଅଧିକାରୀ ଭାବେ କାର୍ଯ୍ୟ କରୁଥିଲେ। ସେତେବେଳେ ସେ କେତେକ ନିଯୁକ୍ତିରେ ଅନିୟମତା କାର୍ଯ୍ୟ କରିଥିବା ଅଭିଯୋଗ ନେଇ ତାଙ୍କୁ ଦଣ୍ଡ ସ୍ବରୂପ ତାଙ୍କର ଗୋଟିଏ ଇନକ୍ରିମେଣ୍ଟ ବନ୍ଦ କରିବା ପାଇଁ ନିଷ୍ପତି ହୋଇଥିଲା।
ହେଲେ ଦୁଃଖର କଥା ତାହା ସରକାରୀ ଅବହେଳା ପାଇଁ ଲାଗୁ ହୋଇପାରିଲା ନାହିଁ। ଅର୍ଥାତ ତାଙ୍କର ଇନକ୍ରିମେଣ୍ଟ ବନ୍ଦ ନ ହୋଇ ଯେପରି ପଦନ୍ନୋତି ପାଇବା କଥା ତାହା ପାଇଚାଲିଲେ। ସେ ସେଠାରୁ ବଦଳି ହୋଇ ଏସସିବି ମେଡିକାଲ କଲେଜର ପ୍ରଶାସନିକ ଅଧିକାରୀ ଭାବେ ନିଯୁକ୍ତି ଦିଆସରିଛି। ଏହି ସମୟରେ ଅର୍ଥାତ ପ୍ରାୟ 20 ବର୍ଷ ପରେ ତାଙ୍କର ଦଣ୍ଡ କଥା ସରକାରଙ୍କ ମନେ ପଡିଲା ଏବଂ ତାହାକୁ ଲାଗୁ କରିବା ପାଇଁ ନିଷ୍ପତି ହେଲା। ସଂଜିତାଙ୍କ ବହୁ ଅନୁରୋଧ ପରେ ମଧ୍ୟ ତାଙ୍କ ରେକର୍ଡରେ ତାହା ଉଲ୍ଲେଖ କରାଗଲା। ଏହି ସମୟରେ ତାଙ୍କର ଆଇଏଏସ ପଦନ୍ନୋତି ହେବାର ଥିଲା ଯାହା ସ୍ଥଗିତ ହୋଇଗଲା।
ଆହୁରି ପଢନ୍ତୁ- ଶ୍ରୀମନ୍ଦିର ଭିତରୁ ଚୋରୀ ହୋଇଗଲା ଶ୍ରୀଜିୟୁଙ୍କ ମୋଦକ
ଏହାପରେ ସେ ହାଇକୋର୍ଟରେ ମାମଲା ଦାୟର କଲେ। ସେତେବେଳେ ସିଙ୍ଗଲ ବେଞ୍ଚ ତାଙ୍କ ଆବେଦନକୁ ଆଗ୍ରହ୍ୟ କରିଦେଲେ। ଫଳରେ ସଂଜିତା ପୁଣି ରିଭ୍ୟୁ ପିଟିସନ ଦାଖଲ କଲେ। କୋର୍ଟ ଏହାକୁ ଗ୍ରହଣ କଲେ ଏହି ମୁଖ୍ୟ ବିଚାରପତିଙ୍କ ବେଞ୍ଚରେ ଏହାର ବିଚାର କରାଗଲା। ଦୁଇଜଣିଆ ବେଞ୍ଚ ତାଙ୍କର ଆବେଦନକୁ ଶୁଣିବା ପରେ ସଂଜିତା ଆଇଏଏସ ପାଇବା ପାଇଁ ଯୋଗ୍ୟା ବୋଲି ରାୟ ପ୍ରକାଶ କଲେ। ପ୍ରଶାସନିକ ଅଧିକାରୀଙ୍କ ଅବହେଳା ପାଇଁ ସେ କାହିଁକି ଆଇଏଏସରୁ ବଞ୍ଚିତ ହେବେ ବୋଲି କୋର୍ଟ ବିରକ୍ତି ପ୍ରକାଶ କଲେ।
କୋର୍ଟ ପୁଣି କହିଛନ୍ତି ଯେ, ଆବେଦନକାରୀ ଚାକିରୀରୁ ଅବସର ନେଇଯାଇଥିଲେ ମଧ୍ୟ ତାଙ୍କୁ ଆଇଏଏସ ପଦନ୍ନୋତି ଦିଆଯାଉ। ଏଥିସହିତ ସେ ଯେବେଠାରୁ ଆଇଏଏସ ପାଇବା ପାଇଁ ଯୋଗ୍ୟା ହୋଇଥିଲେ ସେହି ଦିନଠାରୁ ତାଙ୍କର ସମସ୍ତ ପ୍ରାପ୍ୟ ପ୍ରଦାନ କରାଯାଉ। ତିନିମାସ ମଧ୍ୟରେ ସମସ୍ତ କାର୍ଯ୍ୟ ସଂପର୍ଣ୍ଣ କରାଯାଉ ବୋଲି କୋର୍ଟ ନିର୍ଦ୍ଦେଶ ଦେଇଛନ୍ତି। ଏହି ରାୟ ପ୍ରକାଶ ପାଇବା ପରେ ବର୍ତ୍ତମାନ ପ୍ରଶାସନିକ ମହଲରେ ବେଶ ଚର୍ଚ୍ଚା ଚାଲିଛି। କେଉଁ ଅଧିକାରୀ ତାଙ୍କର ଇନକ୍ରିମେଣ୍ଟକୁ ବନ୍ଦ ନ କରି ପଦନ୍ନୋତି ଦେଲେ ତାହାର ଖୋଳତାଡ କରାଯାଉ ବୋଲି ଆଲୋଚନା ଚାଲିଛି।