ନୂଆଦିଲ୍ଲୀ: ଆମାଜନ ଏବଂ ବ୍ଲୁ ଅରିଜିନ୍ ପ୍ରତିଷ୍ଠାତା ଜେଫ୍ ବେଜୋସ୍ ଏବଂ ଲେଖିକା, ହେଲିକପ୍ଟର ପାଇଲଟ୍ ଏବଂ ବୃତ୍ତିରେ ସାମ୍ବାଦିକ ରହିଥିବା ଲରେନ୍ ସାଞ୍ଚେଜ୍ ବିବାହ ବନ୍ଧନରେ ଆବଦ୍ଧ ହୋଇଛନ୍ତି। ସାଞ୍ଚେଜ୍ ଏକ ଇନଷ୍ଟାଗ୍ରାମ୍ ପୋଷ୍ଟ ସେୟାର କରିଛନ୍ତି, ଯେଉଁଥିରେ ସେ ତାଙ୍କ ବିବାହର କିଛି ଫଟୋ ପୋଷ୍ଟ କରି ତାଙ୍କ ପ୍ରଶଂସକମାନଙ୍କୁ ସୂଚନା ଦେଇଛନ୍ତି ଯେ, ଦୁହେଁ ଏବେ ଆନୁଷ୍ଠାନିକ ଭାବରେ ବିବାହ କରିଛନ୍ତି।
୨୦୧୮ ରେ ଆରମ୍ଭ କରିଥିଲେ ଡେଟିଂ
ବିବାହ ପୂର୍ବରୁ ଶୁକ୍ରବାର ସୋସିଆଲ୍ ମିଡିଆରେ କିଛି ଫଟୋ ଭାଇରାଲ୍ ହୋଇଥିଲା, ଯେଉଁଥିରେ ଅନେକ ହାଇପ୍ରୋଫାଇଲ୍ ଅତିଥିଙ୍କୁ ବିଳାସପୂର୍ଣ୍ଣ ହୋଟେଲରୁ ବାହାରକୁ ବାହାରୁଥିବାର ଦେଖାଯାଇଥିଲା। ୨୦୧୮ ମସିହାରୁ ଦୁହେଁ ପରସ୍ପରକୁ ଡେଟ୍ କରିବା ଆରମ୍ଭ କରିଥିଲେ। ୧୪ ଜୁଲାଇ ୨୦୧୯ ରେ ତାଙ୍କ ପ୍ରଥମ ପତ୍ନୀ ମ୍ୟାକେଞ୍ଜି ସ୍କଟ୍ ଙ୍କୁ ଛାଡପତ୍ର ଦେବା ପରେ ବେଜୋସ୍ ସାଞ୍ଚେଜ୍ ଙ୍କ ସହ ତାଙ୍କ ସମ୍ପର୍କ ବିଷୟରେ ଖୋଲାଖୋଲି କହିଥିଲେ। କୋଟିପତି ବ୍ୟବସାୟୀ ବେଜୋସ୍ ୨୦୨୩ ମସିହାରେ ତାଙ୍କ ସୁପରୟାଟ ରେ ସାଞ୍ଚେଜ୍ ଙ୍କୁ ଏକ ସୁନ୍ଦର ହୀରା ମୁଦି ପିନ୍ଧାଇ ପ୍ରସ୍ତାବ ଦେଇଥିଲେ, ଯାହାର ମୂଲ୍ୟ ୨.୫ ମିଲିୟନ ଡଲାର ଥିଲା।
ଇନଷ୍ଟାଗ୍ରାମ୍ ରେ ସେୟାର ହୋଇଛି ବିବାହ ଫଟୋ
ଇନଷ୍ଟାଗ୍ରାମ୍ ରେ ସେୟାର ହୋଇଥିବା ଗୋଟିଏ ଫଟୋରେ ନବ ବିବାହିତ ଦମ୍ପତି ହାତରେ ହାତ ଧରି ହସୁଥିବା ଦେଖାଯାଉଛି ଏବଂ ଅନେକ ଅତିଥି ସେମାନଙ୍କ ଚାରିପାଖରେ ତାଳି ମାରିବା ଦେଖାଯାଉଛି। ଏହି ଫଟୋଗୁଡ଼ିକରେ ସାଞ୍ଚେଜ୍ ଏକ ଧଳା ଲେସ୍ ମର୍ମେଡ୍ ଗାଉନ୍ ପିନ୍ଧି ବହୁତ ସୁନ୍ଦର ଦେଖାଯାଉଛନ୍ତି। ବେଜୋସ୍ ମଧ୍ୟ ଏକ ଗାଢ କଳା ଟକ୍ସେଡୋରେ ବହୁତ ସୁନ୍ଦର ଦେଖାଯାଉଛନ୍ତି।