ନୂଆଦିଲ୍ଲୀ: ମାଲିର ଏକ ସିମେଣ୍ଟ କାରଖାନାରେ କାମ କରୁଥିବା ତିନି ଜଣ ଭାରତୀୟ ନାଗରିକଙ୍କୁ ଅଲକାଏଦା ସହ ଜଡିତ ଆତଙ୍କବାଦୀମାନେ ଅପହରଣ କରିଛନ୍ତି। ଆଜି ଅଧିକାରୀମାନେ ଏହା ନିଶ୍ଚିତ କରିଛନ୍ତି। ପଶ୍ଚିମ ଆଫ୍ରିକୀୟ ଦେଶ ମାଲିର ଅନେକ ସ୍ଥାନରେ ଆତଙ୍କବାଦୀ ଆକ୍ରମଣ ହୋଇଛି। ଏହି ସମୟରେ ଭାରତୀୟ ନାଗରିକଙ୍କୁ ଅପହରଣ କରାଯାଇଥିଲା। ଭାରତ ଏହା ଉପରେ ଚିନ୍ତା ପ୍ରକଟ କରିଛି ଏବଂ ମାଲି ସରକାରଙ୍କୁ ସେମାନଙ୍କ ମୁକ୍ତି ସୁନିଶ୍ଚିତ କରିବାକୁ କହିଛି।
ଭାରତୀୟମାନଙ୍କୁ ଅପହରଣ ପରେ ଭାରତ ମାଲି ସରକାରଙ୍କୁ ସେମାନଙ୍କର ନିରାପଦ ଏବଂ ଶୀଘ୍ର ମୁକ୍ତି ସୁନିଶ୍ଚିତ କରିବା ପାଇଁ ସମସ୍ତ ଆବଶ୍ୟକୀୟ ପଦକ୍ଷେପ ନେବାକୁ କହିଛି। କାୟେସରେ ଥିବା ଡାଇମଣ୍ଡ ସିମେଣ୍ଟ କାରଖାନାରେ କାର୍ଯ୍ୟରତ ଭାରତୀୟଙ୍କ ଅପହରଣ ସମ୍ପର୍କରେ ବୈଦେଶିକ ମନ୍ତ୍ରଣାଳୟ (MEA) ଗଭୀର ଚିନ୍ତା ପ୍ରକାଶ କରିଛି। ବୈଦେଶିକ ମନ୍ତ୍ରଣାଳୟ କହିଛି ଯେ, “ଘଟଣାଟି ଜୁଲାଇ ୧ ତାରିଖରେ ଘଟିଥିଲା, ଯେତେବେଳେ ଆକ୍ରମଣକାରୀଙ୍କ ଏକ ଗୋଷ୍ଠୀ କାରଖାନା ପରିସରରେ ଆକ୍ରମଣ କରି ତିନି ଜଣ ଭାରତୀୟ ନାଗରିକଙ୍କୁ ବଳପୂର୍ବକ ବନ୍ଧକ ରଖିଥିଲା।” ମାଲିରେ ଆକ୍ରମଣ ପାଇଁ ଦାୟୀ କିଏ ଅଲକାଏଦା ସହ ଜଡିତ ଜମାତ ନୁସରତ ଅଲ-ଇସଲାମ ଓ୍ଵାଲ-ମୁସଲିମିନ (JNIM) ମଙ୍ଗଳବାର ଆକ୍ରମଣ ପାଇଁ ଦାୟୀ ବୋଲି ଦାବି କରିଛି, କିନ୍ତୁ ଅପହରଣ ଉପରେ କେହି ପ୍ରତିକ୍ରିୟା ଦେଇନାହାଁନ୍ତି। ଭାରତ ଏ ସମ୍ପର୍କରେ ମାଲି ସରକାରଙ୍କ ସହିତ ନିରନ୍ତର ଯୋଗାଯୋଗରେ ଅଛି। ଏପର୍ଯ୍ୟନ୍ତ ମାଲିରେ ଅନେକ ଥର ଆତଙ୍କବାଦୀ ଆକ୍ରମଣ ହୋଇଛି।
ଗତ କିଛି ବର୍ଷ ମଧ୍ୟରେ ମାଲିରେ ଅନେକ ଆତଙ୍କବାଦୀ ଆକ୍ରମଣ ହୋଇଛି। ଜୁଲାଇ ୧ ତାରିଖରେ ହୋଇଥିବା ଏହି ଆତଙ୍କବାଦୀ ଆକ୍ରମଣ ପୂର୍ବରୁ, ଗତ ବର୍ଷ ସେପ୍ଟେମ୍ବର ୧୭ ତାରିଖରେ ବାମାକୋର ଅନେକ ସ୍ଥାନରେ ଆକ୍ରମଣ ହୋଇଥିଲା। ସୂଚନା ଅନୁଯାୟୀ, ଏହି ଆକ୍ରମଣରେ ୭୭ ଜଣ ପ୍ରାଣ ହରାଇଥିଲେ। ସେହି ସମୟରେ ୨୦୦ ରୁ ଅଧିକ ଲୋକ ଆହତ ହୋଇଥିଲେ। ଏହା ପୂର୍ବରୁ ୭ ସେପ୍ଟେମ୍ବର ୨୦୨୩ ରେ, ଟିମ୍ବକଟୁ ନିକଟସ୍ଥ ନାଇଜର ନଦୀରେ ଏକ ଡଙ୍ଗା ଉପରେ ଆକ୍ରମଣ ହୋଇଥିଲା। ଆମେରିକାର ବୈଦେଶିକ ବିଭାଗର ରିପୋର୍ଟ ଅନୁଯାୟୀ, ଏହି ଆକ୍ରମଣରେ ୭୪ ଜଣଙ୍କର ମୃତ୍ୟୁ ହୋଇଥିଲା। ଏଥିରେ ୪୯ ଜଣ ସାଧାରଣ ନାଗରିକ, ୨୦ ଜଣ ଆକ୍ରମଣକାରୀ ଏବଂ ଡଙ୍ଗାର ସୁରକ୍ଷା ଦଳର ସଦସ୍ୟ ସାମିଲ ଥିଲେ।
