ନୂଆଦିଲ୍ଲୀ: ଭାରତ, ଯେଉଁଠାରେ ବିକାଶର ଧ୍ୱନି କ୍ଷେତ, ଗ୍ରାମ ଏବଂ ସହର ସବୁଠି ପ୍ରତିଧ୍ବନିତ ହୋଇଥାଏ, ସମବାୟ ରୂପରେ ଏକ ନୀରବ କିନ୍ତୁ ଶକ୍ତିଶାଳୀ ଶକ୍ତିର ସନ୍ଧାନ ପଇଛି। ଚାଷୀମାନଙ୍କୁ ଉଚିତ ମୂଲ୍ୟ ସୁନିଶ୍ଚିତ କରିବାଠାରୁ ଆରମ୍ଭ କରି ମହିଳା ଏବଂ କ୍ଷୁଦ୍ର ଉଦ୍ୟୋଗୀଙ୍କୁ ସଶକ୍ତ କରିବା ପର୍ଯ୍ୟନ୍ତ, ସମବାୟ ଅନ୍ତର୍ଭୁକ୍ତିମୂଳକ ଅଭିବୃଦ୍ଧିକୁ ଆଗକୁ ବଢାଉଛି ଓ “ସହକାର ସେ ସମୃଦ୍ଧି” ଭାବନାକୁ ପାଳନ କରିବାରେ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରୁଛି। ସ୍ୱାଧୀନତା ପୂର୍ବରୁ ଏକ ଛୋଟ ଯାତ୍ରା ଭାବରେ ଆରମ୍ଭ ହୋଇଥିବା ଏହି କାର୍ଯ୍ୟକ୍ରମ ଆଜି ସାରା ଭାରତରେ ୮.୪୨ ଲକ୍ଷ ସମବାୟ ସଂସ୍ଥାର ଏକ ନେଟୱାର୍କରେ ପରିଣତ ହୋଇଛି। ଅମୁଲ ଭଳି ଜଣାଶୁଣା ନାମଠାରୁ ଆରମ୍ଭ କରି ନାବାର୍ଡ, କ୍ରିଭକୋ ଏବଂ ଇଫକୋ ଭଳି ପ୍ରମୁଖ ଅଂଶୀଦାର ଏବଂ ତୃଣମୂଳ ସ୍ତରରେ ନିରନ୍ତର କାର୍ଯ୍ୟ କରୁଥିବା ଅଗଣିତ ଛୋଟ ସଂସ୍ଥା ପର୍ଯ୍ୟନ୍ତ, ସମବାୟ ସମଗ୍ର ଦେଶରେ ଲୋକଙ୍କୁ ସଶକ୍ତ କରୁଛି। ସେମାନଙ୍କର ବିଶ୍ୱସ୍ତରୀୟ ଗୁରୁତ୍ୱ ମଧ୍ୟ ସ୍ପଷ୍ଟ, ମିଳିତ ଜାତିସଂଘ ୨୦୨୫କୁ ଅନ୍ତର୍ଜାତୀୟ ସମବାୟ ବର୍ଷ ଭାବରେ ଘୋଷଣା କରିଛି।
ସମବାୟ ହେଉଛି ଲୋକକୈନ୍ଦ୍ରିକ ଉଦ୍ୟୋଗ ଯାହାର ମାଲିକାନା, ନିୟନ୍ତ୍ରିତ ଏବଂ ପରିଚାଳିତ ଯାହା ସେମାନଙ୍କର ସଦସ୍ୟମାନଙ୍କ ଦ୍ୱାରା ସେମାନଙ୍କର ସାଧାରଣ ଆର୍ଥିକ, ସାମାଜିକ ଏବଂ ସାଂସ୍କୃତିକ ଆବଶ୍ୟକତା ଏବଂ ଆକାଂକ୍ଷା ପୂରଣ କରିବା ନିମନ୍ତେ।
ପ୍ରତିବର୍ଷ ଜୁଲାଇ ମାସର ପ୍ରଥମ ଶନିବାର ଦିନ ଅନ୍ତର୍ଜାତୀୟ ସମବାୟ ଦିବସ ପାଳନ କରାଯାଏ। ଚଳିତ ବର୍ଷର ଅନ୍ତର୍ଜାତୀୟ ସମବାୟ ଦିବସ ଏବଂ ବର୍ଷର ବିଷୟବସ୍ତୁ ହେଉଛି ସମବାୟ: ଏକ ଉନ୍ନତ ବିଶ୍ୱ ପାଇଁ ଅନ୍ତର୍ଭୁକ୍ତିମୂଳକ ଏବଂ ସ୍ଥାୟୀ ସମାଧାନ ନିର୍ମାଣ, ଯାହା ସମବାୟ କିପରି ସ୍ଥାୟୀ ବିକାଶକୁ ଆଗେଇ ନିଏ, ଦୃଢ଼ ସମ୍ପ୍ରଦାୟ ଗଠନ କରେ ଏବଂ ଅଭିବୃଦ୍ଧିକୁ ଶେଷ ସ୍ଥାନ ପର୍ଯ୍ୟନ୍ତ ନେଇଯାଏ ତାହା ଉପରେ ଗୁରୁତ୍ୱାରୋପ କରେ। ଏହି ବର୍ଷ ୫ ଜୁଲାଇରେ ଅନ୍ତର୍ଜାତୀୟ ସମବାୟ ଦିବସ ବ୍ୟବହାରିକ ସମାଧାନ ଏବଂ ବାସ୍ତବ ପ୍ରଭାବ ଉପରେ ଧ୍ୟାନ ଦିଏ।
ଏହି ଅବସରରେ, କେନ୍ଦ୍ର ସ୍ବରାଷ୍ଟ୍ର ଏବଂ ସମବାୟ ମନ୍ତ୍ରୀ ଅମିତ ଶାହ ଗୁଜରାଟର ଆନନ୍ଦଠାରେ ଦେଶର ପ୍ରଥମ ଜାତୀୟ ସ୍ତରୀୟ ସମବାୟ ବିଶ୍ୱବିଦ୍ୟାଳୟ “ତ୍ରିଭୁବନ ସମବାୟ ବିଶ୍ୱବିଦ୍ୟାଳୟ (ଟିଏସୟୁ)”ର ଭୂମି ପୂଜନ ଏବଂ ଶିଳାନ୍ୟାସ କରିବେ।
ଏକ ସ୍ଥାୟୀ ଭବିଷ୍ୟତ ପାଇଁ ସମବାୟ
“ସମବାୟ ଏକ ଉନ୍ନତ ବିଶ୍ୱ ଗଠନ କରେ” ବିଷୟବସ୍ତୁ ଆଜିର ବିଶ୍ୱସ୍ତରୀୟ ଚ୍ୟାଲେଞ୍ଜର ମୁକାବିଲା ଏବଂ ୨୦୩୦ ସୁଦ୍ଧା ଜାତିସଂଘର ନିରନ୍ତର ବିକାଶ ଲକ୍ଷ୍ୟକୁ ଆଗକୁ ବଢାଇବାରେ ସେମାନଙ୍କର ଭୂମିକାକୁ ଉଜ୍ଜ୍ୱଳ କରିଥାଏ। ସମବାୟ ବର୍ତ୍ତମାନ ବିଶ୍ୱବ୍ୟାପୀ ୩ ନିୟୁତ ସମବାୟ ସଂସ୍ଥା ମାଧ୍ୟମରେ ବିଶ୍ବ ଜନସଂଖ୍ୟାର ୧୨ ପ୍ରତିଶତରୁ ଅଧିକ ଲୋକଙ୍କୁ ସଂଯୋଗ କରୁଛି, ୩୦୦ଟି ବୃହତ୍ତମ ସମବାୟ ସଂସ୍ଥା ୨୪୦୯.୪୧ ବିଲିୟନ ଡଲାରର କାରବାର ସୃଷ୍ଟି କରୁଛି। ସେମାନେ ବିଶ୍ୱର ନିଯୁକ୍ତିପ୍ରାପ୍ତ ଜନସଂଖ୍ୟାର ୧୦ ପ୍ରତିଶତ ପ୍ରତିନିଧିତ୍ୱ କରୁଥିବା ୨୮ କୋଟି ଲୋକଙ୍କୁ ଗୁଣାତ୍ମକ ନିଯୁକ୍ତି ଏବଂ କର୍ମସଂସ୍ଥାନ ପ୍ରଦାନ କରି ସ୍ଥାୟୀ ଅର୍ଥନୈତିକ ଅଭିବୃଦ୍ଧିକୁ ମଧ୍ୟ ପ୍ରୋତ୍ସାହିତ କରୁଛନ୍ତି।
କୋପ୍ସ ଡେ କିମ୍ବା ଆନ୍ତର୍ଜାତୀୟ ସମବାୟ ଦିବସ ପ୍ରଥମେ ୧୯୨୩ ମସିହାରେ ପାଳନ କରାଯାଇଥିଲା ଏବଂ ୧୯୯୫ ମସିହାରେ ଜାତିସଂଘ ଦ୍ୱାରା ଏହାକୁ ଆନୁଷ୍ଠାନିକ ଭାବରେ ସ୍ୱୀକୃତି ଦିଆଯାଇଥିଲା। ଏହା କିପରି ସମବାୟ ସଂସ୍ଥା ଲୋକମାନଙ୍କୁ ଏକାଠି କାମ କରିବାରେ, ଦୃଢ଼ ଏବଂ ସ୍ୱାବଲମ୍ବୀ ସମ୍ପ୍ରଦାୟ ଗଠନ କରିବାରେ ଏବଂ ଗଣତନ୍ତ୍ର, ସଂହତି ଏବଂ ସ୍ଥାୟୀତ୍ୱର ମୂଲ୍ୟବୋଧକୁ ପ୍ରୋତ୍ସାହିତ କରିବାରେ ସାହାଯ୍ୟ କରେ ତାହା ଉପରେ ଆଲୋକପାତ କରେ।
ଭାରତରେ ସମବାୟର ଅଭିବୃଦ୍ଧି
ଭାରତରେ, ୮.୪୨ ଲକ୍ଷ ସମବାୟ ୟୁନିଟ୍ ଅନ୍ତର୍ଭୁକ୍ତ ଅଭିବୃଦ୍ଧିକୁ ପ୍ରେତ୍ସାହିତ କରିଚାଲିଛନ୍ତି ଏବଂ ଉତ୍ପାଦନ, ପ୍ରକ୍ରିୟାକରଣ, ବିପଣନ, ଗୃହ, ପରିବହନ ଏବଂ ଅନ୍ୟାନ୍ୟ କାର୍ଯ୍ୟକଳାପରେ ନିୟୋଜିତ ଅଛନ୍ତି। ଆନୁଷ୍ଠାନିକ ଆଇନ ପୂର୍ବରୁ ମଧ୍ୟ, ଭାରତର ଗ୍ରାମଗୁଡ଼ିକ ପୋଖରୀ ନିର୍ମାଣ ଏବଂ ଜଙ୍ଗଲ ସୁରକ୍ଷା ଭଳି ମିଳିତ ପ୍ରୟାସ ଏବଂ ଚିଟ୍ ଫଣ୍ଡ, କୁରି, ଭିଷି ଏବଂ ଫାଡ ଭଳି ଅନୌପଚାରିକ ବ୍ୟବସ୍ଥା ମାଧ୍ୟମରେ ସମବାୟ ଢାଞ୍ଚାରେ କାମ କରୁଥିଲେ। ୧୮୯୧ ମସିହାରେ, ପଞ୍ଜାବରେ ଏକ ସମବାୟ ଗ୍ରାମ ଜମି ପରିଚାଳନା କରିଥିଲା, ଯାହା ଭାରତର ଏକାଠି କାମ କରିବାର ଦୀର୍ଘ ପରମ୍ପରାକୁ ପ୍ରତିଫଳିତ କରିଥିଲା।
ଭାରତର ସମବାୟ କ୍ଷେତ୍ର : ଏକ ଅବଲୋକନ
ଭାରତରେ ସମବାୟ ସମିତିଗୁଡ଼ିକ କୃଷି, ଋଣ ଏବଂ ବ୍ୟାଙ୍କିଙ୍ଗ, ଗୃହ ନିର୍ମାଣ ଏବଂ ମହିଳା କଲ୍ୟାଣ ଭଳି ବିଭିନ୍ନ କ୍ଷେତ୍ରରେ କାର୍ଯ୍ୟ କରୁଛନ୍ତି। ସେଗୁଡ଼ିକ ପାରମ୍ପରିକ ବ୍ୟାଙ୍କିଙ୍ଗ ସେବା ପାଇବାରେ ଅସୁବିଧାର ସମ୍ମୁଖୀନ ହେଉଥିବା ଚାଷୀ ଏବଂ କ୍ଷୁଦ୍ର ଉଦ୍ୟୋଗୀମାନଙ୍କୁ ଋଣ ପ୍ରଦାନ କରି ଆର୍ଥିକ ଅନ୍ତର୍ଭୁକ୍ତିକୁ ପ୍ରୋତ୍ସାହିତ କରିବାରେ ସହାୟକ ହେଉଛନ୍ତି। ଏହି ସମାଜଗୁଡ଼ିକ ଗ୍ରାମୀଣ ବିକାଶ, ସ୍ଥାନୀୟ ସମ୍ପ୍ରଦାୟକୁ ସଶକ୍ତ କରିବା ଏବଂ ସାମାଜିକ-ଆର୍ଥିକ ଅସମାନତା ହ୍ରାସ କରିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ ହେଉଛନ୍ତି।
ସମବାୟ ମନ୍ତ୍ରଣାଳୟର ପ୍ରମୁଖ ପଦକ୍ଷେପ
ଗ୍ରାମୀଣ ଆୟ ବୃଦ୍ଧି, ସ୍ଥାନୀୟ ଅର୍ଥନୀତିକୁ ସୁଦୃଢ଼ କରିବା ଏବଂ କୃଷକମାନଙ୍କ ପାଇଁ ଉତ୍ତମ ବଜାର ସୁଯୋଗ ସୁନିଶ୍ଚିତ କରିବା ପାଇଁ ସରକାର ସମବାୟ ସମିତି ଏବଂ ପାକ୍ସଗୁଡ଼ିକୁ ସଶକ୍ତ କରୁଛନ୍ତି। ଏହି ସଂସ୍କାରଗୁଡ଼ିକର ଲକ୍ଷ୍ୟ ହେଉଛି ଭାରତର ଅଭିବୃଦ୍ଧି କାହାଣୀରେ ସମବାୟକୁ ପ୍ରମୁଖ ଅଂଶୀଦାର କରିବା।
ପାକ୍ସ (ପ୍ରାଥମିକ କୃଷି ଋଣ ସୋସାଇଟି) ହେଉଛି ତୃଣମୂଳସ୍ତରୀୟ ସମବାୟ ଋଣ ପ୍ରତିଷ୍ଠାନ ଯାହା ଗ୍ରାମ ସ୍ତରରେ ଚାଷୀମାନଙ୍କୁ ସ୍ୱଳ୍ପକାଳୀନ ଋଣ, ବିହନ, ସାର ଏବଂ ଅତ୍ୟାବଶ୍ୟକ ସେବା ପ୍ରଦାନ କରେ, ଯାହା ଭାରତର ସମବାୟ ଋଣ ଢାଞ୍ଚାର ମେରୁଦଣ୍ଡ ସ୍ବରୂପ।
ଏପରି କେତେକ ସଂସ୍କାରମୂଳକ ପଦକ୍ଷେପ ସଂପର୍କରେ ନିମ୍ନରେ ଦିଆଗଲା…
ପ୍ରମୁଖ ପଦକ୍ଷେପ ମଧ୍ୟରେ ରହିଛି ପାକ୍ସଗୁଡ଼ିକର ବିକାଶ ଓ ସେଗୁ଼ଡ଼ିକର ଡିଜିଟାଲୀକରଣ। ସମଗ୍ର ଭାରତରେ ପାକ୍ସଗୁଡ଼ିକର କାର୍ଯ୍ୟର ମାନକୀକରଣ ଏବଂ ଆଧୁନିକୀକରଣ କରିବା ପାଇଁ ସମବାୟ ମନ୍ତ୍ରଣାଳୟ ୫ ଜାନୁଆରୀ ୨୦୨୩ରେ ମଡେଲ ଉପ-ନିୟମ (ବାଇଲ) ପ୍ରକାଶ କରିଥିଲା। ବର୍ତ୍ତମାନ, ୩୨ଟି ରାଜ୍ୟ/କେନ୍ଦ୍ରଶାସିତ ପ୍ରଦେଶ ଦ୍ୱାରା ମଡେଲ ଉପ-ନିୟମ ଗ୍ରହଣ କରାଯାଇଛି।
ଶ୍ୱେତ ବିପ୍ଳବ ୨.୦:
ଦୁଗ୍ଧ ସମବାୟ ଦ୍ୱାରା କ୍ଷୀର ଉତ୍ପାଦନ ଏବଂ କ୍ରୟକୁ ପ୍ରୋତ୍ସାହିତ କରିବା ପାଇଁ ସମବାୟ ମନ୍ତ୍ରଣାଳୟ ଦ୍ୱାରା ଶ୍ୱେତ ବିପ୍ଳବ ୨.୦ ଆରମ୍ଭ କରାଯାଇଛି। ଶ୍ୱେତ ବିପ୍ଳବ ୨.୦ ୧୯ ସେପ୍ଟେମ୍ବର ୨୦୨୪ରେ ଆରମ୍ଭ ହୋଇଥିଲା ଏବଂ ୨୫ ଡିସେମ୍ବର ୨୦୨୪ ରେ ଉଦଘାଟିତ ହୋଇଥିଲା। ଏହାର ଲକ୍ଷ୍ୟ ହେଉଛି ୫ ବର୍ଷ ମଧ୍ୟରେ ଦୁଗଧ କ୍ରୟରେ ୫୦ ପ୍ରତିଶତ ବୃଦ୍ଧି। ଏପର୍ଯ୍ୟନ୍ତ, ୨୭ଟି ରାଜ୍ୟ/କେନ୍ଦ୍ରଶାସିତ ଅଞ୍ଚଳରେ ୯୬୯୫ଟି ଦୁଗ୍ଧ ସମବାୟ ପଞ୍ଜିକୃତ ହୋଇଛି।
ଆଉ କେତେକ ପଦକ୍ଷେପ ହେଲା ବ୍ୟାଙ୍କିଙ୍ଗ ସଶକ୍ତୀକରଣ, କୃଷି ଉତ୍ପାଦକ ସଂଗଠନ (ଏଫପିଓ) ଗଠନ, ଜୈବିକ କୃଷି ପ୍ରେତ୍ସାହନ, ସମବାୟ ଚିନି ମିଲଗୁଡ଼ିକୁ ସହାୟତା, ଇନ୍ଧନ ଓ ଇଥାନଲ ପଦକ୍ଷେପ, ସମବାୟ ସଂସ୍ଥାଗୁଡ଼ିକର ଆର୍ଥିକ ସଂସ୍କାର, ସମବାୟ ବ୍ୟାଙ୍କ ସଂସ୍କାର ଇତ୍ୟାଦି।
ଜାତୀୟ ସମବାୟ ଡାଟାବେସ୍: ୮.୪୨ ଲକ୍ଷ ସେସାଇଟି ମ୍ୟାପିଂ କରାଯାଇଛି; ୮ ମାର୍ଚ୍ଚ ୨୦୨୪ ରେ ଏନସିଡି ପୋର୍ଟାଲ ଲଞ୍ଚ ହୋଇଛି। ଜାତୀୟ ସମବାୟ ନୀତି ୨୦୨୫: “ସହକାର-ସେ-ସମୃଦ୍ଧି” ପଦକ୍ଷେପ ଏବଂ ବିକଶିତ ଭାରତ ୨୦୪୭ ଦୃଷ୍ଟିକୋଣ ସହିତ ସମନ୍ୱୟ ରଖି ୨୦୦୨ ନୀତିକୁ ବଦଳାଇବା ପାଇଁ ନୂତନ ନୀତିର ଚୂଡ଼ାନ୍ତ ଖସଡ଼ା ଆରମ୍ଭ ପାଇଁ ପ୍ରସ୍ତୁତ।
ଆଇସିଏ ବିଶ୍ୱ ସମବାୟ ସମ୍ମିଳନୀ:
ନଭେମ୍ବର ୨୦୨୪ରେ ନୂଆଦିଲ୍ଲୀରେ ଅନୁଷ୍ଠିତ ହେବାକୁ ଥିବା ଅନ୍ତର୍ଜାତୀୟ ସମବାୟ ସଂଘ (ଆଇସିଏ)ର ୨୦୨୪ ବିଶ୍ୱ ସମବାୟ ସମ୍ମିଳନୀ, ଭାରତୀୟ ସମବାୟ ଆନ୍ଦୋଳନର ଇତିହାସରେ ଏକ ଐତିହାସିକ ମୁହୂର୍ତ୍ତ ହେବ, କାରଣ ୩୦୦୦ ରୁ ଅଧିକ ସମବାୟ ସଂଗଠନ ମିଳିତ ଜାତିସଂଘର ଅନ୍ତର୍ଜାତୀୟ ସମବାୟ ବର୍ଷ ୨୦୨୫ ପାଇଁ ଏକାଠି ହେବେ ଏବଂ ଅସମାନତା, ଜଳବାୟୁ ଏବଂ ସଂଘର୍ଷ ଭଳି ବିଶ୍ୱସ୍ତରୀୟ ଚ୍ୟାଲେଞ୍ଜର ମୁକାବିଲା କରିବାରେ ସମବାୟର ଶକ୍ତି ପ୍ରଦର୍ଶନ କରିବେ।
ତ୍ରିଭୁବନ ସମବାୟ ବିଶ୍ୱବିଦ୍ୟାଳୟ:
ଭାରତରେ ସମବାୟ ଆନ୍ଦୋଳନକୁ ସୁଦୃଢ଼ କରିବା ପାଇଁ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ଭାବରେ, ତ୍ରିଭୁବନ ଦାସ ପଟେଲଙ୍କ ସମ୍ମାନରେ ତ୍ରିଭୁବନ ସମବାୟ ବିଶ୍ୱବିଦ୍ୟାଳୟ ପ୍ରତିଷ୍ଠିତ ହେଉଛି, ଯିଏ ସର୍ଦ୍ଦାର ପଟେଲଙ୍କ ମାର୍ଗଦର୍ଶନରେ ଏହାର ଭିତ୍ତିଭୂମି ସ୍ଥାପନ କରିବାରେ ପ୍ରମୁଖ ଭୂମିକା ଗ୍ରହଣ କରିଥିଲେ। ଏହି ବିଶ୍ୱବିଦ୍ୟାଳୟ ସମବାୟ କ୍ଷେତ୍ରର ପେସାଦାରମାନଙ୍କୁ ବୈଷୟିକ ଶିକ୍ଷା, ଆକାଉଣ୍ଟାନ୍ସି, ପ୍ରଶାସନିକ ଜ୍ଞାନ ଏବଂ ସ୍ୱତନ୍ତ୍ର ତାଲିମ ପ୍ରଦାନ କରିବା ଲକ୍ଷ୍ୟ ରଖିଛି ।
ଉପସଂହାର
ସମବାୟ ସଂସ୍ଥାଗୁ଼ଡ଼ିକ କେବଳ ପ୍ରତିଷ୍ଠାନ ନୁହେଁ; ବରଂ ଏଗୁଡ଼ିକ ଏକ ଜନ ଆନ୍ଦୋଳନ ଯାହା ତୃଣମୂଳ ସ୍ତରରୁ ଭାରତର ଭବିଷ୍ୟତକୁ ଆକାର ଦିଏ। ଚାଷୀ, ମହିଳା ଏବଂ କ୍ଷୁଦ୍ର ଉଦ୍ୟୋଗୀମାନଙ୍କୁ ସଶକ୍ତ କରି, ସେମାନେ ଅନ୍ତର୍ଭୁକ୍ତ ଅଭିବୃଦ୍ଧି ଏବଂ ସଶକ୍ତ ସମ୍ପ୍ରଦାୟକୁ ପ୍ରୋତ୍ସାହିତ କରନ୍ତି। ଭାରତ ୨୦୨୫ ମସିହାର ଅନ୍ତର୍ଜାତୀୟ ସମବାୟ ଦିବସ ପାଳନ କରୁଥିବା ସମୟରେ, ଏହା “ସମବାୟ ମାଧ୍ୟମରେ ସମୃଦ୍ଧି” ପ୍ରତି ଏହାର ପ୍ରତିବଦ୍ଧତାକୁ ଦୋହରାଏ, ସମବାୟ ଯେପରି ସ୍ଥାୟୀ ବିକାଶକୁ ଆଗେଇ ନେବା ଜାରି ରଖିବ ତାହା ସୁନିଶ୍ଚିତ କରେ ଏବଂ ଦେଶର ପ୍ରତ୍ୟେକ କୋଣରେ ସମୃଦ୍ଧି ଆଣିବା ଜାରି ରଖେ।