The Samikhsya Desk: ନିକଟରେ ପୁରୀର ପୂର୍ବତନ ସାଂସଦ ପିନାକୀ ମିଶ୍ରଙ୍କୁ ବିବାହ କରିଛନ୍ତି ତୃଣମୂଳ କଂଗ୍ରେସ ସାଂସଦ ମହୁଆ ମୋଇତ୍ରା। ଓଡିଶାର ବୋହୂ ହେବା ପରେ ସେ ଏ ପର୍ଯ୍ୟନ୍ତ ପୁରୀ ଆସି ନାହିଁନ୍ତି। ହେଲେ ସେ ଓଡିଶା ମୁଖ୍ୟମନ୍ତୀ ତଥା ମୁଖ୍ୟ ଶାସନ ସଚିବଙ୍କୁ ଏକ ଅନୁରୋଧ କରିଛନ୍ତି। ତେବେ ତାହା ବିବାହ ସଂପର୍କରେ ନୁହେଁ ବରଂ ତାଙ୍କ ପଶ୍ଚିମବଂଗ ନଦୀଆ ଜିଲ୍ଲାର ଶ୍ରମିକମାନଙ୍କୁ ନେଇ ସେ ଏକ ଭିଡିଓ ବାର୍ତ୍ତା ପଠାଇଛନ୍ତି।
ଏଥିରେ ମହୁଆ ମୁଖ୍ୟମନ୍ତ୍ରୀ, ମୁଖ୍ୟ ସଚିବ ଏବଂ ପୋଲିସ ଡିଜିଙ୍କୁ ଏକ ଅନୁରୋଧ କରିଛନ୍ତି। ତାହା ହେଲା ତାଙ୍କ ଲୋକସଭା କ୍ଷେତ୍ର ନଦୀଆ ଅଞ୍ଚଳର 23 ଜଣ ଶ୍ରମିକଙ୍କୁ ଝାରସୁଗୁଡା ପୋଲିସ ଅଟକ ରଖିଛି। ସେମାନଙ୍କୁ ପୋଲିସ ବେଆଇନ ଭାବେ ଅଟକ ରଖିଛି ବୋଲି ମହୁଆ ଏହି ଭିଡିଓରେ କହିଛନ୍ତି। ତୁରନ୍ତ ସେମାନଙ୍କୁ ଛାଡି ଦିଆଯାଉ ବୋଲି ସେ ଅନୁରୋଧ କରିଛନ୍ତି।
ତେବେ ସେ ଏହି ଭିଡିଓରେ ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ବେଶ ପ୍ରଶଂସା କରିଛନ୍ତି। ସେ କହିଛନ୍ତି ଯେ, ନବୀନ ସରକାର 24 ବର୍ଷ ଭିତରେ ଏମିତି କେବେ ହୋଇ ନ ଥିଲା ଯାହା ବିଜେପି ସରକାରରେ ହୋଇଛି।