ନୂଆଦିଲ୍ଲୀ: ଅଲ୍ ଇଣ୍ଡିଆ ମଜଲିସ୍-ଏ-ଇତ୍ତେହାଦ-ଉଲ୍-ମୁସଲିମିନ୍ (AIMIM) ଅଧ୍ୟକ୍ଷ ଏବଂ ହାଇଦ୍ରାବାଦ ସାଂସଦ ଅସଦୁଦ୍ଦିନ୍ ଓୱେସି କହିଛନ୍ତି ଯେ, ପହଲଗାମ ଆତଙ୍କବାଦୀ ଆକ୍ରମଣର ପ୍ରତିଶୋଧ ନିଆଯିବା ଉଚିତ ଏବଂ ‘ଅପରେସନ୍ ସିନ୍ଦୁର’ ଜାରି ରହିବା ଉଚିତ।
ୱାକଫ୍ (ସଂଶୋଧନ) ଆଇନର ପ୍ରତିବାଦରେ ବୁଧବାର ରାତିରେ ତେଲେଙ୍ଗାନାର ବୋଧନ ସହରରେ ଆୟୋଜିତ ଏକ ସାଧାରଣ ସଭାକୁ ସମ୍ବୋଧିତ କରି ସେ ଅଭିଯୋଗ କରିଛନ୍ତି ଯେ, ପହଲଗାମ ଆତଙ୍କବାଦୀ ଆକ୍ରମଣ ପ୍ରଧାନମନ୍ତ୍ରୀ ମୋଦି ସରକାରଙ୍କ ସୁରକ୍ଷା ଅବହେଳାର ଏକ ଉଦାହରଣ।
ପହଲଗାମ ଆତଙ୍କବାଦୀ ଆକ୍ରମଣର ସୁରକ୍ଷା ବିଫଳତାର ଦାୟିତ୍ୱ ନେବା ପାଇଁ ଜମ୍ମୁ ଏବଂ କାଶ୍ମୀରର ଲେଫ୍ଟନାଣ୍ଟ ଗଭର୍ଣ୍ଣର ମନୋଜ ସିହ୍ନାଙ୍କ କଥିତ ମନ୍ତବ୍ୟ ପାଇଁ ଓୱେସି ଟାର୍ଗେଟ କରିଛନ୍ତି। ଓୱେସି କହିଛନ୍ତି ଯେ, ‘ମନୋଜ ସିହ୍ନା ଘଟଣାର ପ୍ରାୟ ତିନି ମାସ ପରେ ଦାୟିତ୍ୱ ନେଉଛନ୍ତି। ଯଦି ସେ ଏଥିପାଇଁ ଦାୟୀ, ତେବେ ତାଙ୍କୁ ତାଙ୍କ ପଦରୁ ଇସ୍ତଫା ଦେବା ଉଚିତ।’
କେନ୍ଦ୍ର ଆଡକୁ ଇଙ୍ଗିତ କରି AIMIM ଅଧ୍ୟକ୍ଷ କହିଛନ୍ତି ଯେ, ‘ପହଲଗାମର ପ୍ରତିଶୋଧ ନିଆଯିବା ଉଚିତ। ସିନ୍ଦୁର ଅପରେସନ ଜାରି ରଖାଯାଉ। ସେହି ଚାରି ଆତଙ୍କବାଦୀ, ଯେଉଁମାନେ ୨୬ ଜଣ ଭାରତୀୟଙ୍କୁ ସେମାନଙ୍କ ଧର୍ମ ପଚାରି ହତ୍ୟା କରିଥିଲେ ସେମାନଙ୍କୁ ଧରା ନଯିବା ଯାଏଁ ଆମେ ଆପଣଙ୍କୁ ପ୍ରଶ୍ନ କରିବୁ।’ ସେ କହିଛନ୍ତି ଯେ, ‘ପହଲଗାମ ମୋଦି ସରକାରଙ୍କ ସୁରକ୍ଷା ଅବହେଳାର ଏକ ଜୀବନ୍ତ ଉଦାହରଣ।’