ନୂଆଦିଲ୍ଲୀ: କେନ୍ଦ୍ର ରେଳ ମନ୍ତ୍ରୀ ଅଶ୍ୱିନୀ ବୈଷ୍ଣବ ରବିବାର ଗୁଜରାଟର ଭାବନଗରରୁ ତିନୋଟି ନୂତନ ଏକ୍ସପ୍ରେସ୍ ଟ୍ରେନ୍ ସେବା – ଭାବନଗର-ଅଯୋଧ୍ୟା ଏକ୍ସପ୍ରେସ୍, ରେୱା-ପୁଣେ (ହଡପସର) ଏକ୍ସପ୍ରେସ୍ ଏବଂ ଜବଲପୁର-ରାୟପୁର ଏକ୍ସପ୍ରେସକୁ ପତାକା ଦେଖାଇ ଶୁଭାରମ୍ଭ କରିଛନ୍ତି। ଏହି କାର୍ଯ୍ୟକ୍ରମରେ ମଧ୍ୟପ୍ରଦେଶର ମୁଖ୍ୟମନ୍ତ୍ରୀ ଡକ୍ଟର ମୋହନ ଯାଦବ ଏବଂ ଛତିଶଗଡ଼ର ମୁଖ୍ୟମନ୍ତ୍ରୀ ବିଷ୍ଣୁ ଦେଓ ସାଏ ଭିଡିଓ କନଫରେନ୍ସିଂ ମାଧ୍ୟମରେ ଯୋଗ ଦେଇଥିଲେ।
ଭାବନଗର-ଅଯୋଧ୍ୟା ସାପ୍ତାହିକ ଟ୍ରେନର ଶୁଭାରମ୍ଭ ଉତ୍ସବରେ କେନ୍ଦ୍ର ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ, କେନ୍ଦ୍ର ଶ୍ରମ ଓ ନିୟୋଜନ, ଯୁବ ବ୍ୟାପାର ଓ କ୍ରୀଡା ମନ୍ତ୍ରୀ ଡକ୍ଟର ମନସୁଖ ମାଣ୍ଡାଭୀୟ ଏବଂ ଉପଭୋକ୍ତା ବ୍ୟାପାର, ଖାଦ୍ୟ ଏବଂ ସାଧାରଣ ବଣ୍ଟନ ରାଷ୍ଟ୍ରମନ୍ତ୍ରୀ ନିମୁବେନ ବାମ୍ଭାନିଆ ଉପସ୍ଥିତ ଥିଲେ।
କାର୍ଯ୍ୟକ୍ରମ ଅବସରରେ ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ କହିଛନ୍ତି, ଏହି ତିନୋଟି ଟ୍ରେନ୍ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ଭାବନଗର-ଅଯୋଧ୍ୟା ଏକ୍ସପ୍ରେସ୍ ସଂସ୍କୃତି ଏବଂ ଭକ୍ତିକୁ ସଂଯୋଗ କରିବ। ଭାବନଗରରେ ବାଣିଜ୍ୟ ଏବଂ ପର୍ଯ୍ୟଟନକୁ ବୃଦ୍ଧି କରିବ। ସେହିପରି ଏକ ପ୍ରମୁଖ ଶିଳ୍ପ ସହର ପୁଣେ ଆଜି ରେୱା, ଜବଲପୁର, ସତନା ଏବଂ ମୈହାର ସହିତ ଯୋଡ଼ି ହୋଇଛି । ଏହି ଟ୍ରେନ୍ ଏହି ଆଦିବାସୀ ଅଞ୍ଚଳ ପାଇଁ ମଧ୍ୟ ଗୁରୁତ୍ୱପୂର୍ଣ୍ଣ ହେବ।
ସେ ଆହୁରି କହିଛନ୍ତି, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କର ରେଳବାଇ ସହିତ ଏକ ଭାବଗତ ସମ୍ପର୍କ ରହିଛି। ସେ ସର୍ବଦା ନୂତନ ପ୍ରଯୁକ୍ତିବିଦ୍ୟା କାର୍ଯ୍ୟକାରୀ କରିବା ଏବଂ ନେଟୱାର୍କ ସମ୍ପ୍ରସାରଣ କରିବା ଭଳି ରେଳବାଇର ବିକାଶ ଉପରେ ଗୁରୁତ୍ୱ ଦିଅନ୍ତି। ଗତ ୧୧ ବର୍ଷ ମଧ୍ୟରେ, ରେଳବାଇରେ ଏକ ବ୍ୟାପକ ପରିବର୍ତ୍ତନ ଆସିଛି। ଏହି ସମୟ ମଧ୍ୟରେ, ୩୪ ହଜାର କିଲୋମିଟର ନୂତନ ରେଳପଥ ଟ୍ରାକ୍ ନିର୍ମାଣ କରାଯାଇଛି। ପ୍ରତିଦିନ ହାରାହାରି ୧୨ କିଲୋମିଟର ରେଳ ଟ୍ରାକ୍ ନିର୍ମାଣ କରାଯାଉଛି । ଏହା ଇତିହାସରେ ପୂର୍ବରୁ କେବେ ଦେଖାଯାଇନଥିଲା। ବର୍ତ୍ତମାନ ୧୩ ଶହ ଷ୍ଟେସନର ପୁନଃବିକାଶ କରାଯାଉଛି ଯାହାକି ବିଶ୍ୱର ସର୍ବବୃହତ ଷ୍ଟେସନ ଆଧୁନିକୀକରଣ କାର୍ଯ୍ୟକ୍ରମ। ଅନ୍ୟ ଦେଶମାନଙ୍କ ପରି ଭାରତରେ ଉନ୍ନୟନମୂଳକ କାର୍ଯ୍ୟ ସମୟରେ ଷ୍ଟେସନ ଏବଂ ଟ୍ରେନ୍ ବନ୍ଦ ହେଉନାହିଁ । ଭାରତରେ ଏହି କାର୍ଯ୍ୟ ବିନା କୌଣସି ବାଧାରେ ଦ୍ରୁତ ଗତିରେ ଆଗକୁ ବଢ଼ୁଛି।
ରେଳ ମନ୍ତ୍ରୀ ଏହି ଅବସରରେ କେତେକ ଗୁରୁତ୍ୱପୂର୍ଣ୍ଣ ଘୋଷଣା ମଧ୍ୟ କରିଛନ୍ତି । ସେ କହିଛନ୍ତି, ନୂତନ ପୋରବନ୍ଦର-ରାଜକୋଟ ଟ୍ରେନ ଖୁବ୍ ଶୀଘ୍ର ଦୈନିକ ଚଳାଚଳ ଆରମ୍ଭ କରିବ। ରଣଭାଓ ଷ୍ଟେସନରେ ଏକ ନୂତନ କୋଚ୍ ରକ୍ଷଣାବେକ୍ଷଣ ସୁବିଧା, ନୂତନ ସାରାଦିଆ-ୱାନ୍ସଜାଲିଆ ରେଳ ଲାଇନ, ଭଦ୍ରକାଳୀ ଗେଟ୍, ପୋରବନ୍ଦର ସହରରେ ଏକ ନୂତନ ଫ୍ଲାଏଓଭର, ଦୁଇଟି ନୂତନ ଗତି ଶକ୍ତି କାର୍ଗୋ ଟର୍ମିନାଲ ଏବଂ ଭାବନଗରରେ ଏକ ନୂତନ ବନ୍ଦର ଟର୍ମିନାଲ ନିର୍ମାଣ କାମ ଯୋଜନା ପ୍ରସ୍ତୁତି ସ୍ତରରେ ଅଛି।
ସେ ଏହା ମଧ୍ୟ ଉଲ୍ଲେଖ କରିଛନ୍ତି ଯେ ମୁମ୍ବାଇରୁ ଅହମ୍ମଦାବାଦକୁ ଦେଶର ପ୍ରଥମ ବୁଲେଟ୍ ଟ୍ରେନ ଖୁବ୍ ଶୀଘ୍ର ଚଳାଚଳ ଆରମ୍ଭ କରିବ। ନିର୍ମାଣ କାମ ଦ୍ରୁତ ଗତିରେ ଚାଲିଛି, ଏବଂ ଏହା କାର୍ଯ୍ୟକ୍ଷମ ହେବା ପରେ, ମୁମ୍ବାଇ ଓ ଅହମ୍ମଦାବାଦ ମଧ୍ୟରେ ଯାତ୍ରା ସମୟ ମାତ୍ର 2 ଘଣ୍ଟା 7 ମିନିଟ୍ ହେବ। ବର୍ଦ୍ଧିତ ଯାତ୍ରୀ ସୁବିଧା ବିଷୟରେ ଆଲୋକପାତ କରି ସେ କହିଛନ୍ତି ଯେ ଏକ ନୂତନ ଅମୃତ ଭାରତ ଟ୍ରେନ ଆରମ୍ଭ କରାଯାଇଛି। ଏପର୍ଯ୍ୟନ୍ତ ପ୍ରାୟ ଆଠଟି ଏପରି ଟ୍ରେନ ଆରମ୍ଭ ହୋଇଛି। ଅମୃତ ଭାରତ ଟ୍ରେନଗୁଡ଼ିକରେ ବନ୍ଦେ ଭାରତ ଭଳି ସୁବିଧା ରହିଛି କିନ୍ତୁ ଯାତ୍ରୀଭଡା ଯଥେଷ୍ଟ କମ୍ ଅଛି, ଯାହା ସେମାନଙ୍କୁ ଅଧିକ ଯାତ୍ରୀଙ୍କ ପାଇଁ ସୁଲଭ କରିଥାଏ।
କେନ୍ଦ୍ର ମନ୍ତ୍ରୀ ଡକ୍ଟର ମନସୁଖ ମାଣ୍ଡଭୀୟ କହିଛନ୍ତି, ପ୍ରଧାନମନ୍ତ୍ରୀ ମୋଦୀ ଜୀଙ୍କ ନେତୃତ୍ୱରେ ଦେଶ ଦ୍ରୁତ ଗତିରେ ପରିବର୍ତ୍ତନ ହେଉଛି ଏବଂ ପ୍ରଗତି ହାସଲ କରୁଛି। ଏକ ନୂତନ ଭାରତ ଉଦୟ ହେଉଛି, ଏବଂ ପରିବର୍ତ୍ତନ ସହ ତାଳ ଦେଇ ରେଳବାଇ ମଧ୍ୟ ଏକ ବୈପ୍ଳବିକ ରୂପାନ୍ତରଣ ଦେଇ ଗତି କରୁଛି। ରେଳ ସୁବିଧାର ଆଧୁନିକୀକରଣ ସହିତ, ନାଗରିକମାନେ ଏବେ ସମୟୋଚିତ ଏବଂ ଉନ୍ନତ ରେଳ ସେବା ପାଉଛନ୍ତି। ରେଳବାଇ କ୍ଷେତ୍ରରେ ପରିବର୍ତ୍ତନ ଏକ ବିକଶିତ ଭାରତ ଗଠନର ଏକ ପ୍ରମୁଖ ଅଂଶ। ସେ ଆହୁରି ମଧ୍ୟ କହିଛନ୍ତି ଯେ ସୌରାଷ୍ଟ୍ର ହେଉଛି ସନ୍ଥ, ଋଷି ଏବଂ ଭକ୍ତିର ଭୂମି। ଅଯୋଧ୍ୟାକୁ ଟ୍ରେନ ମାଧ୍ୟମରେ, ଏହି ଅଞ୍ଚଳର ଲୋକମାନେ ଏବେ ରାମଲଲ୍ଲାଙ୍କୁ ଦର୍ଶନ କରିବାର ସୌଭାଗ୍ୟ ପାଇବେ। ଏହି ପଦକ୍ଷେପ ପାଇଁ ସେ ରେଳମନ୍ତ୍ରୀଙ୍କ ପ୍ରତି କୃତଜ୍ଞତା ପ୍ରକାଶ କରିଛନ୍ତି।
କେନ୍ଦ୍ର ମନ୍ତ୍ରୀ ଶ୍ରୀମତୀ ନିମୁବେନ ବାମ୍ଭାନିଆ ଏହି ନୂତନ ଟ୍ରେନ ରୂପରେ ଭାବନଗରକୁ ଏହି ମୂଲ୍ୟବାନ ଉପହାର ପାଇଁ ରେଳ ମନ୍ତ୍ରୀଙ୍କୁ କୃତଜ୍ଞତା ପ୍ରକାଶ କରିଥିଲେ। ସେ କହିଥିଲେ ଯେ ଏହି ଟ୍ରେନ ଭାବନଗରର ଶକ୍ତିକୁ ଅଯୋଧ୍ୟାର ଭକ୍ତି ସହିତ ସଂଯୋଗ କରୁଥିବା ଏକ ସେତୁ ଭଳି । ଏହା କେବଳ ଭାବନଗରର ଲୋକମାନଙ୍କୁ ନୁହେଁ ବରଂ ଆଖପାଖ ଜିଲ୍ଲାର ଲୋକଙ୍କୁ ମଧ୍ୟ ଲାଭ ପହଞ୍ଚାଇବ। ଏହି କାର୍ଯ୍ୟକ୍ରମରେ ସ୍ଥାନୀୟ ଜନପ୍ରତିନିଧି, ବରିଷ୍ଠ ରେଳ ଅଧିକାରୀ ଏବଂ ବହୁସଂଖ୍ୟାରେ ସାଧାରଣ ଜନତା ଉପସ୍ଥିତ ଥିଲେ ।
