ନୂଆଦିଲ୍ଲୀ: କ୍ରୀଡା ମନ୍ତ୍ରଣାଳୟ କୌଣସି ଖେଳରେ ଭାରତ ବନାମ ପାକିସ୍ତାନ ମ୍ୟାଚ୍ ଉପରେ ନିଜର ମତ ସ୍ପଷ୍ଟ କରିଛି। ନୂତନ ନୀତି ଅନୁଯାୟୀ, ଭାରତ କୌଣସି ଦ୍ୱିପାକ୍ଷିକ ସିରିଜ୍ କିମ୍ବା ଇଭେଣ୍ଟରେ ପାକିସ୍ତାନ ସହିତ ଖେଳିବ ନାହିଁ, କିନ୍ତୁ ଟିମ୍ ଇଣ୍ଡିଆକୁ ଅନ୍ତର୍ଜାତୀୟ ମ୍ୟାଚ୍ ଏବଂ ଟୁର୍ଣ୍ଣାମେଣ୍ଟରେ ପାକିସ୍ତାନ ସହିତ ଖେଳିବାରୁ ବାରଣ କରାଯିବ ନାହିଁ। ଏହାର ସ୍ପଷ୍ଟ ଅର୍ଥ ହେଉଛି ଯେ, କ୍ରୀଡ଼ା ମନ୍ତ୍ରଣାଳୟ ଏସିଆ କପରେ ଭାରତ-ପାକିସ୍ତାନ ମ୍ୟାଚ୍ ଉପରେ କୌଣସି ଆପତ୍ତି ଉଠାଇବ ନାହିଁ।
ଭାରତ ପାକିସ୍ତାନ ସହିତ ଖେଳିବ ନାହିଁ, କିନ୍ତୁ…
କ୍ରୀଡା ମନ୍ତ୍ରଣାଳୟ ଅଗଷ୍ଟ ୨୦ ତାରିଖରେ ଜାରି ଏକ ବିବୃତ୍ତିରେ କହିଛି ଯେ, ଭାରତ କୌଣସି ଦ୍ୱିପାକ୍ଷିକ ସିରିଜ୍ ଖେଳିବାକୁ ପାକିସ୍ତାନ ଯିବ ନାହିଁ ଏବଂ ଭାରତ ସରକାର ପାକିସ୍ତାନ ଦଳକୁ ଭାରତରେ ଖେଳିବାକୁ ଅନୁମତି ଦେବ ନାହିଁ। କୌଣସି ଦ୍ୱିପାକ୍ଷିକ ସିରିଜ୍ ରେ ଭାରତ ଏବଂ ପାକିସ୍ତାନ ମଧ୍ୟରେ କୌଣସି ମ୍ୟାଚ୍ ହେବ ନାହିଁ, କିନ୍ତୁ କୌଣସି ଭାରତୀୟ ଖେଳାଳି କିମ୍ବା ଦଳକୁ ଅନ୍ତର୍ଜାତୀୟ ଇଭେଣ୍ଟରେ ଅଂଶଗ୍ରହଣ କରିବାରୁ ବାରଣ କରାଯିବ ନାହିଁ, ଯଦିଓ ପାକିସ୍ତାନୀ ଦଳ କିମ୍ବା ଖେଳାଳି ଅଂଶଗ୍ରହଣ କରୁଛନ୍ତି। ଏହା ବ୍ୟତୀତ ଭାରତ ଦ୍ୱାରା ଆୟୋଜିତ କୌଣସି ଅନ୍ତର୍ଜାତୀୟ ଟୁର୍ଣ୍ଣାମେଣ୍ଟ କିମ୍ବା ମ୍ୟାଚ୍ରେ ପାକିସ୍ତାନ ଖେଳାଳିମାନଙ୍କୁ ବାରଣ କରାଯିବ ନାହିଁ।
ଲକ୍ଷ୍ୟ କ’ଣ?:
ପ୍ରକାଶିତ ଡକ୍ୟୁମେଣ୍ଟରେ ଏହା ମଧ୍ୟ କୁହାଯାଇଛି ଯେ, ଭାରତ ସରକାରଙ୍କ ଲକ୍ଷ୍ୟ ହେଉଛି ଦେଶକୁ ଯଥାସମ୍ଭବ ଅଧିକ ଅନ୍ତର୍ଜାତୀୟ ଇଭେଣ୍ଟ ଆୟୋଜନ କରିବା ପାଇଁ ପ୍ରସ୍ତୁତ କରିବା। ସରକାର ଏହି ପ୍ରକ୍ରିୟାକୁ ସରଳ କରିବା ଉପରେ ମଧ୍ୟ ଗୁରୁତ୍ୱ ଦେଉଛନ୍ତି ଯାହା ଦ୍ୱାରା ବିଦେଶୀ ଖେଳାଳି ଏବଂ ଦଳଗୁଡ଼ିକ ଭାରତ ଆସିବାରେ ଅଧିକ ଅସୁବିଧାର ସମ୍ମୁଖୀନ ନ ହୁଅନ୍ତି। ଅନ୍ତର୍ଜାତୀୟ କ୍ରୀଡ଼ା ସଂଗଠନ ପାଇଁ ଭିସା ପ୍ରକ୍ରିୟାକୁ ସରଳ କରାଯାଇଛି, ଯାହାଙ୍କୁ ୫ ବର୍ଷ ପର୍ଯ୍ୟନ୍ତ ଭିସା ମିଳିପାରିବ। ଅନ୍ତର୍ଜାତୀୟ କ୍ରୀଡ଼ା ସଂଗଠନ ସହିତ ସମ୍ପର୍କ ଉନ୍ନତ କରିବା ପାଇଁ ଏହା କରାଯାଇଛି।