ଭୁବନେଶ୍ଵର: ସାରା ଦେଶରେ ସେପ୍ଟେମ୍ବର ମାସକୁ ଜାତୀୟ ପୋଷଣ ମାସ ଭାବେ ପାଳନ କରାଯାଉଛି। ଏହା ସହିତ ସମାଜକୁ ସୁସ୍ଥ ଓ ସଚେତନ କରିବା ଉଦ୍ଦେଶ୍ୟରେ “ମାଆଙ୍କ ନାମରେ ଗଛଟିଏ ୨.୦” ସଚେତନତା କାର୍ଯ୍ୟକ୍ରମ ମଧ୍ୟ ପାଳନ କରାଯାଉଛି। ମା’ ଯେପରି ପରିବାରକୁ ପୋଷଣ ଦେଇଥାନ୍ତି, ସେପରି ଗଛ ପୃଥିବୀକୁ ପୋଷଣ ଦିଏ। ମା’ ନିଜ ସନ୍ତାନଙ୍କୁ ଆଶ୍ରୟ ଓ ସୁରକ୍ଷା ଦେଇଥାନ୍ତି, ସେପରି ଗଛ ଆମକୁ ଛାୟା ଓ ପରିବେଶକୁ ସୁରକ୍ଷା ଦିଏ। ମା’ଙ୍କ ପ୍ରତି ସମ୍ମାନ, ଆଗାମୀ ପିଢ଼ିଙ୍କ ପ୍ରତି ଦାୟିତ୍ୱ ଓ ପରିବେଶ ପ୍ରତି ଶପଥ ନେଇ ଏହି କାର୍ଯ୍ୟକ୍ରମ ଆୟୋଜିତ ହେଉଛି।
ଏହି ଅବସରରେ ଝାରସୁଗୁଡ଼ା ଜିଲ୍ଲାର ଲଖନପୁର ବ୍ଲକ୍ ମୁଖ୍ୟାଳୟରେ କେନ୍ଦ୍ରୀୟ ସଞ୍ଚାର ବ୍ୟୁରୋ (CBC), ସମ୍ବଲପୁର ପକ୍ଷରୁ ‘୮ମ ଜାତୀୟ ପୋଷଣ ମାସ’ ଏବଂ “ମାଆଙ୍କ ନାମରେ ଗଛଟିଏ ୨.୦” ଶୀର୍ଷକରେ ଏକ ବିଶାଳ ସଚେତନତା କାର୍ଯ୍ୟକ୍ରମ ଆୟୋଜନ ହୋଇଥିଲା। ଏହି ଅଭିଯାନରେ ପୋଷଣ, ସ୍ୱାସ୍ଥ୍ୟ ଓ ପରିବେଶର ସନ୍ଦେଶ ପ୍ରଚାରିତ ହୋଇଥିଲା। ପୋଷଣ ସଚେତନତାକୁ ପରିବେଶ ସୁରକ୍ଷା ସହିତ ଯୋଡ଼ିବାର ଏହି ପ୍ରୟାସ, କେବଳ ନୂତନତ୍ୱ ନୁହେଁ, ବରଂ ସମୟର ଆବଶ୍ୟକତାକୁ ମଧ୍ୟ ଦର୍ଶାଏ।
ଏହି କାର୍ଯ୍ୟକ୍ରମକୁ ପରିଚାଳନା କରିଥିଲେ ସହକାରୀ ନିର୍ଦ୍ଦେଶକ ମନମୋହନ ପାଢ଼ୀ। ମୁଖ୍ୟ ଅତିଥି ଭାବେ ଯୋଗଦେଇଥିଲେ ସ୍ଥାନୀୟ ସରପଞ୍ଚ ଆରତୀ ପ୍ରଧାନ। ସେଥିରେ ସମ୍ମାନୀତ ଅତିଥି ଭାବେ ଯୋଗ ଦେଇଥିଲେ ଝାରସୁଗୁଡ଼ା ଜିଲ୍ଲା ସମାଜମଙ୍ଗଳ ଅଧିକାରୀ ପୂନ୍ୟବତୀ ହେଲେନ, ବ୍ଲକ ଶିଶୁ ବିକାଶ ପ୍ରକଳ୍ପ ଅଧିକାରୀ ଲକ୍ଷ୍ମୀପ୍ରିୟା ବୋହିବାର, ଏବଂ ସମ୍ବଲପୁର ଆକାଶବାଣୀ ଓ ଦୂରଦର୍ଶନର କାର୍ଯ୍ୟକ୍ରମ ପ୍ରମୁଖ ମନିଷ୍ ଭଟ୍ଟାଚାର୍ଯ୍ୟ।
ଅନ୍ୟପକ୍ଷରେ ପୋଷଣ ମାସ ସଚେତନତା କାର୍ଯ୍ୟକ୍ରମରେ ସ୍ୱାସ୍ଥ୍ୟର ସଚେତନ ବାର୍ତ୍ତା ଶୁଣିବାକୁ ମିଳିଲା। ଅତିଥିମାନେ ସନ୍ତୁଳିତ ଆହାର, ପୋଷଣୀୟ ଖାଦ୍ୟର ଆବଶ୍ୟକତା, ଓ ସ୍ୱସ୍ଥ ସମାଜ ପାଇଁ ସଚେତନତା ବିଷୟରେ ଆଲୋକପାତ କରିଥିଲେ। ବ୍ଲକ୍ ଜନସ୍ୱାସ୍ଥ୍ୟ ଅଧିକାରୀ ଡ଼ା. ଜୁଗଳ କିଶୋର ଭୋଇ ଏବଂ ଝାରସୁଗୁଡାର ଜିଲ୍ଲାର ପୁଷ୍ଟିକର ଅଧିକାରୀ “ସନ୍ତୁଳିତ ଆହାର ସମୟର ଆବଶ୍ୟକ” ବିଷୟରେ ବୁଝାଇବା ସହ “ଉତ୍ତମ ସ୍ୱାସ୍ଥ୍ୟ ପାଇଁ ସଠିକ୍ ଖାଦ୍ୟ ଖାଆନ୍ତୁ” ବୋଲି ବାର୍ତ୍ତା ଦେଇଥିଲେ।
ଏହି କାର୍ଯ୍ୟକ୍ରମର ମଧ୍ୟଭାଗରେ,ମନମୋହନ ପାଢ଼ୀ ସମସ୍ତଙ୍କୁ ସ୍ୱଚ୍ଛତାର ଶପଥ ପାଠ କରାଇଥିଲେ । ସ୍ୱଚ୍ଛତା ପାକ୍ଷିକ (୧୭ ସେପ୍ଟେମ୍ବର ରୁ ୨ ଅକ୍ଟୋବର) ଅବସରରେ ସମସ୍ତେ ହାତ ଉଠାଇ “ସ୍ୱଚ୍ଛତା” ର ପ୍ରତିଜ୍ଞା ନେଇଥିଲେ। ପରେ ଆରମ୍ଭ ହୋଇଥିଲା ଏକ ବିଶାଳ ପଦଯାତ୍ରା। ସେଇ ପଦଯାତ୍ରାରେ ଶତାଧିକ ମହିଳା, କିଶୋରୀ ବାଳିକା, ଅଙ୍ଗନବାଡ଼ି ଓ ଆଶା କର୍ମୀମାନେ, ସହିତ ଗ୍ରାମବାସୀମାନେ “ପୋଷଣ ଓ ପରିବେଶ” ବାର୍ତ୍ତାକୁ ନାରାରେ ପରିଣତ କରିଥିଲେ।
ଏଥି ସହିତ କାର୍ଯ୍ୟକ୍ରମରେ ଅଙ୍ଗନବାଡ଼ି କର୍ମୀମାନେ ଏବଂ ପରିଦର୍ଶିକାମାନେ ବିଭିନ୍ନ ପ୍ରକାରର ପୋଷଣୀୟ ଖାଦ୍ୟ, ଋତୁଯାତୀୟ ପନିପରିବା, ଫଳ, ନିଜେ ପ୍ରସ୍ତୁତ କରିଥିବା ପୁଷ୍ଟିକର ବ୍ୟଞ୍ଜନ ପ୍ରଦର୍ଶନ କରିଥିଲେ।
କାର୍ଯ୍ୟକ୍ରମର ପୂର୍ବରୁ, ସେପ୍ଟେମ୍ବର ୧୭ ତାରିଖରେ ସୁସ୍ଥ ଶିଶୁ ପ୍ରତିଯୋଗିତା ଓ ରଙ୍ଗୋଲି ପ୍ରତିଯୋଗିତାରେ ଜିତିଥିବା ଛ’ଜଣ ବିଜେତାଙ୍କୁ ମଞ୍ଚରେ ପୁରସ୍କାର ଓ ମାନପତ୍ର ପ୍ରଦାନ କରାଯାଇଥିଲା। ସେଇ ଦିନ “ମାଆଙ୍କ ନାମରେ ଗଛଟିଏ”ର ଦ୍ୱିତୀୟ ପର୍ଯ୍ୟାୟରେ ବ୍ଲକ୍ ଆଇସିଡ଼ିଏସ୍ କାର୍ଯ୍ୟାଳୟ ପରିସରରେ ଫଳଦାୟକ ଗଛର ଚାରା ରୋପଣ ମଧ୍ୟ ହୋଇଥିଲା।
ଶେଷରେ, ଝାରସୁଗୁଡ଼ା ଜିଲ୍ଲା ଲୋକକଳା ଓ ନୃତ୍ୟ ଗବେଷଣା କେନ୍ଦ୍ରର କଳାକାରମାନେ ସଙ୍ଗୀତ, ନୃତ୍ୟ ଓ ଲୋକନାଟ୍ୟ ମାଧ୍ୟମରେ ପୋଷଣ ଓ ବୃକ୍ଷରୋପଣର ସନ୍ଦେଶକୁ ସ୍ପଷ୍ଟ ଭାବରେ ବର୍ଣ୍ଣନା କରିଥିଲେ। ଏହି କାର୍ଯ୍ୟକ୍ରମର ଶେଷରେ ସହାୟକ ନିର୍ଦ୍ଦେଶକ ମନମୋହନ ପାଢ଼ୀ ସମସ୍ତଙ୍କୁ ଧନ୍ୟବାଦ ବ୍ୟକ୍ତ କରିଥିଲେ।
