ନୂଆଦିଲ୍ଲୀ; 2025 ମହିଳା ବିଶ୍ୱକପରେ ଭାରତ 88 ରନରେ ପାକିସ୍ତାନକୁ ପରାସ୍ତ କରିଛି। ଏହି ବିଜୟ ସହିତ ଟିମ୍ ଇଣ୍ଡିଆ ଏକଦିବସୀୟ କ୍ରିକେଟରେ ପାକିସ୍ତାନ ବିପକ୍ଷରେ ତାର ଅପରାଜିତ ରେକର୍ଡ ବଜାୟ ରଖିଛି। ଭାରତ ଏବଂ ପାକିସ୍ତାନ 12 ଥର ଏକଦିବସୀୟ ମ୍ୟାଚ୍ ଖେଳିଛନ୍ତି, ଯେଉଁଥିରେ ଭାରତୀୟ ଦଳ ପ୍ରତ୍ୟେକ ଥର ବିଜୟୀ ହୋଇଛି। କଲମ୍ବୋରେ ଖେଳାଯାଇଥିବା ବିଶ୍ୱକପ୍ ମ୍ୟାଚ୍ ରେ ଟିମ୍ ଇଣ୍ଡିଆ ପ୍ରଥମେ ବ୍ୟାଟିଂ କରି 247 ରନ କରିଥିଲା। ଜବାବରେ ପାକିସ୍ତାନ ମାତ୍ର 159 ରନରେ ଅଲଆଉଟ୍ ହୋଇଯାଇଥିଲା।
କଲମ୍ବୋର ଆର. ପ୍ରେମଦାସା ଷ୍ଟାଡିୟମରେ ଖେଳାଯାଇଥିବା ଏହି ବିଶ୍ୱକପ୍ ମ୍ୟାଚରେ ଭାରତୀୟ ଦଳ ପ୍ରଥମେ ବ୍ୟାଟିଂ କରିବାକୁ ଆସିଥିଲା। ଧୀର ପିଚ୍ରେ କୌଣସି ଭାରତୀୟ ବ୍ୟାଟ୍ସମ୍ୟାନ୍ ଅର୍ଦ୍ଧଶତ ସ୍କୋର କରିପାରି ନଥିଲେ। ଭାରତ ପକ୍ଷରୁ ହରଲିନ୍ ଦେଓଲ ସର୍ବାଧିକ 46 ରନ କରିଥିଲେ। ପ୍ରତୀକା ରାୱଲ 31 ଏବଂ ଜେମିମାହ ରଡ୍ରିଗ୍ସ 32 ରନ୍ କରିଥିଲେ, ଯେତେବେଳେ ରିଚା ଘୋଷ ଶେଷ ଓଭରରେ 20 ବଲ୍ ରେ 35 ରନ୍ କରି ଭାରତକୁ 247 ରନ୍ ରେ ପହଞ୍ଚାଇଥିଲେ।
ଜବାବରେ ପାକିସ୍ତାନର ପ୍ରଦର୍ଶନ ଏତେ ଖରାପ ଥିଲା ଯେ, ସେମାନେ 20 ରନ୍ କରିବା ପୂର୍ବରୁ ସେମାନଙ୍କର ଉଭୟ ଓପନରଙ୍କୁ ହରାଇ ଦେଇଥିଲେ। ଏହି ସମୟରେ, ଓପନର ମୁନିବା ଅଲିଙ୍କ ଆଉଟ୍ ଖବରରେ ଥିଲା। ଦୁଇଥର ଭିଡିଓ ରିପ୍ଲେ ଦେଖିବା ପରେ ତୃତୀୟ ଅମ୍ପାୟାର ତାଙ୍କୁ ରନ୍ ଆଉଟ୍ ଘୋଷଣା କରିଥିଲେ। ପ୍ରଥମ 20 ଓଭରରେ ପାକିସ୍ତାନର ରନ୍ ହାର 3 ରୁ କମ୍ ଥିଲା।
ସିଦ୍ରା ଅମିନ ଏବଂ ନତାଲିଆ ପରଭେଜ 69 ରନ୍ ଭାଗୀଦାରି କରି ପାକିସ୍ତାନକୁ ଏକ କଷ୍ଟକର ପରିସ୍ଥିତିରୁ ଉଦ୍ଧାର କରିଥିଲେ। ପରଭେଜ 39 ରନ୍ କରି ଆଉଟ୍ ହୋଇଥିଲେ। ତା’ପରେ ଅଧିନାୟକ ଫାତିମା ସାନା ମାତ୍ର 2 ରନ୍ କରି ବିଦାୟ ନେଇଥିଲେ। ପାକିସ୍ତାନ ମାତ୍ର 16 ରନ୍ ରେ ଶେଷ ପାଞ୍ଚଟି ୱିକେଟ ହରାଇଥିଲା। ସିଦ୍ରା ଅମିନଙ୍କ 81 ରନ୍ ର ଇନିଂସ ପାକିସ୍ତାନକୁ 88 ରନ୍ ର ବିଶାଳ ପରାଜୟରୁ ରକ୍ଷା କରିପାରି ନ ଥିଲା।
ଅପରାଜିତ ୧୨-୦ ରେକର୍ଡ ଅକ୍ଷୁର୍ଣ୍ଣ:
ମହିଳା ଦିନିକିଆ କ୍ରିକେଟ ଇତିହାସରେ ଭାରତୀୟ ଦଳ ଲଗାତାର ଦ୍ୱାଦଶ ଥର ପାଇଁ ପାକିସ୍ତାନକୁ ପରାସ୍ତ କରିଛି। ଦୁଇ ଦଳ ପ୍ରଥମେ 2005 ମସିହାରେ ଏକ ଦିନିକିଆରେ ମୁହାଁମୁହିଁ ହୋଇଥିଲେ ଏବଂ ସେବେଠାରୁ ଟିମ୍ ଇଣ୍ଡିଆ ପ୍ରତ୍ୟେକ ଦିନିକିଆ ମ୍ୟାଚ୍ରେ ପାକିସ୍ତାନ ଉପରେ ପ୍ରାଧାନ୍ୟ ବିସ୍ତାର କରିଆସିଛି।