ନୂଆଦିଲ୍ଲୀ: ଆଜି ଲୌହ ପୁରୁଷ ଭାବରେ ଜଣାଶୁଣା ସର୍ଦ୍ଦାର ବଲ୍ଲଭଭାଇ ପଟେଲଙ୍କ ୧୫୦ ତମ ଜନ୍ମବାର୍ଷିକୀ। ଏହି ବିଶେଷ ଦିନକୁ ଜାତୀୟ ଏକତା ଦିବସ ଭାବରେ ପାଳନ କରାଯାଏ। ଏହି ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏକତାର ଶପଥ ପାଠ କରାଇଛନ୍ତି। ସର୍ଦ୍ଦାର ପଟେଲଙ୍କ ଜନ୍ମବାର୍ଷିକୀରେ ପ୍ରଧାନମନ୍ତ୍ରୀ ମୋଦି ଟ୍ୱିଟ୍ କରି କହିଛନ୍ତି ଯେ, “ଭାରତ ସର୍ଦ୍ଦାର ବଲ୍ଲଭଭାଇ ପଟେଲଙ୍କୁ ତାଙ୍କ ୧୫୦ ତମ ଜନ୍ମବାର୍ଷିକୀରେ ଶ୍ରଦ୍ଧାଞ୍ଜଳି ଜଣାଉଛି। ସେ ଭାରତର ଏକତା ପଛରେ ପ୍ରେରଣାଦାୟକ ଶକ୍ତି ଥିଲେ, ଏହିପରି ଆମ ଜାତିର ପ୍ରାରମ୍ଭିକ ବର୍ଷଗୁଡ଼ିକରେ ଭାଗ୍ୟକୁ ଆକାର ଦେଇଥିଲେ। ଜାତୀୟ ଅଖଣ୍ଡତା, ସୁଶାସନ ଏବଂ ଜନସେବା ପ୍ରତି ତାଙ୍କର ଅଟଳ ପ୍ରତିବଦ୍ଧତା ପିଢ଼ିକୁ ପ୍ରେରଣା ଦେଇ ଚାଲିବ।”
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ଗୁଜୁରାଟର ଷ୍ଟାଚ୍ୟୁ ଅଫ୍ ୟୁନିଟିରେ ଭାରତର ପ୍ରଥମ ଗୃହମନ୍ତ୍ରୀ ସର୍ଦ୍ଦାର ବଲ୍ଲଭଭାଇ ପଟେଲଙ୍କୁ ତାଙ୍କ ୧୫୦ ତମ ଜନ୍ମବାର୍ଷିକୀରେ ପୁଷ୍ପମାଲ୍ୟ ଅର୍ପଣ କରିଛନ୍ତି। ୨୦୧୪ ମସିହାରେ ମୋଦି ପ୍ରଥମ ଥର ପାଇଁ ପ୍ରଧାନମନ୍ତ୍ରୀ ହେବା ପରଠାରୁ, ପ୍ରତିବର୍ଷ ଅକ୍ଟୋବର ୩୧ ତାରିଖରେ ପଟେଲଙ୍କ ଜନ୍ମବାର୍ଷିକୀକୁ ଜାତୀୟ ଏକତା ଦିବସ ଭାବରେ ପାଳନ କରାଯାଉଛି। ସକାଳେ ମୋଦି ଗୁଜରାଟର ନର୍ମଦା ଜିଲ୍ଲାର ଏକତା ନଗର ନିକଟରେ ପଟେଲଙ୍କ ୧୮୨ ମିଟର ଉଚ୍ଚ ପ୍ରତିମୂର୍ତ୍ତି ପରିଦର୍ଶନ କରିଥିଲେ ଏବଂ ଭାରତର ଲୌହ ପୁରୁଷଙ୍କୁ ପୁଷ୍ପମାଲ୍ୟ ଅର୍ପଣ କରି ଶ୍ରଦ୍ଧାଞ୍ଜଳି ଅର୍ପଣ କରିଥିଲେ। ତା’ପରେ ସେ ନିକଟସ୍ଥ ଏକ ସ୍ଥାନକୁ ଯାଇଥିଲେ, ଯେଉଁଠାରେ ସେ ଉପସ୍ଥିତ ଲୋକମାନଙ୍କୁ ଏକତାର ଶପଥ ପାଠ କରାଇଥିଲେ।
ଜାତୀୟ ଏକତା ଦିବସ ପାଳନ
ଏହି ବର୍ଷର ଜାତୀୟ ଏକତା ଦିବସ ପାଳନରେ ପୋଲିସ ଏବଂ ଅର୍ଦ୍ଧସାମରିକ ବାହିନୀ ଦ୍ୱାରା ଏକ ସାଂସ୍କୃତିକ ଉତ୍ସବ ଏବଂ ଜାତୀୟ ଏକତା ଦିବସ ପରେଡ୍ ଅନ୍ତର୍ଭୁକ୍ତ ଥିଲା। ଜନ୍ମବାର୍ଷିକୀ ପାଳନର ମୁଖ୍ୟ ଆକର୍ଷଣ ହେଉଛି ଜାତୀୟ ଏକତା ଦିବସ ପରେଡ୍, ଯେଉଁଥିରେ ସୀମା ସୁରକ୍ଷା ବଳ (BSF) ଏବଂ କେନ୍ଦ୍ରୀୟ ରିଜର୍ଭ ପୋଲିସ ବଳ (SRPF) ଏବଂ ବିଭିନ୍ନ ରାଜ୍ୟ ପୋଲିସ ବାହିନୀ ଭଳି ଅର୍ଦ୍ଧସାମରିକ ବାହିନୀର ଦଳ ସାମିଲ ଅଛନ୍ତି। ଚଳିତ ବର୍ଷ, ଏହି କାର୍ଯ୍ୟକ୍ରମ ଆହୁରି ସ୍ୱତନ୍ତ୍ର। କାରଣ ଗଣତନ୍ତ୍ର ଦିବସ ପରେଡ୍ ପରି ଜାତୀୟ ଏକତା ଦିବସ ପରେଡ୍ ଆୟୋଜନ କରାଯାଉଛି।
