ଜମ୍ମୁ କାଶ୍ମୀରରୁ ଧାରା 370 ଉଚ୍ଛେଦ କରିବା ନିମନ୍ତେ ଗତକାଲି ରାଜ୍ୟସଭାରେ ବିଲ୍ ପାଶ କରାଯାଇଥିଲା । ଏହି ବିଲ୍କୁ ମଞ୍ଜୁରୀ ପ୍ରଦାନ କରାଯିବା ପରେ ବିଭିନ୍ନ ରାଜନୈତିକ ଦଳ ପକ୍ଷରୁ ଏହାକୁ ସମର୍ଥନ କରାଯାଇଥିବା ବେଳେ ଅନେକ ରାଜନୈତିକ ଦଳ ଏହାକୁ ବିରୋଧ କରିଥିଲେ । ମଙ୍ଗଳବାର ଦିନ ଅଭିନେତାରୁ ରାଜନେତା ବନିଥିବା କମଲ୍ ହାସନ୍ କେନ୍ଦ୍ର ସରକାରଙ୍କ ଏହି ପ୍ରଚେଷ୍ଟାକୁ ସମାଲୋଚନା କରିଛନ୍ତି । ଗତବର୍ଷ ନିଜର ରାଜନୈତିକ ଦଳ ମକ୍କଲ ନିଧି ମୟମ ଗଠନ କରିଥିବା ହାସନ ଏହାକୁ ଗଣତନ୍ତ୍ରର ହତ୍ୟା ବୋଲି ଅଭିହିତ କରିଛନ୍ତି । ଟିଏମ୍ସି ଏବଂ କଂଗ୍ରେସ ସହିତ ମିଳିତ ଭାବରେ ଏହି ବିଲ୍କୁ ବିରୋଧ କରିଛନ୍ତି କମଲ୍ ହାସନ୍ । ଏକ ନିୟମ ଲାଗୁ କରିବା ଆଦୌ ଗ୍ରହଣୀୟ ନୁହେଁ । ଏହି ବିଲ୍ ଦେଶରେ ଗଣତନ୍ତ୍ରର ହତ୍ୟା କରିଛି ଏବଂ ଏହି ବିଲ୍ ଲାଗୁ କରିବା ଦ୍ବାରା ବିଜେପି ମୁସ୍ଲିମ୍ ସମ୍ପ୍ରଦାୟକୁ ଦୁଇ ଭାଗ କରିବାକୁ ଚାହୁଁଛି ବୋଲି ହାସନ କହିଛନ୍ତି । ଉଲ୍ଲେଖଯୋଗ୍ୟ ଯେ, ଗୃହମନ୍ତ୍ରୀ ଅମିତ ଶାହା ଗତକାଲି ରାଜ୍ୟସଭାରେ ଘୋଷଣା କରିବା ପରେ ଜମ୍ମୁ କାଶ୍ମୀର ଏବଂ ଲଦାଖକୁ କେନ୍ଦ୍ର ଶାସିତ ଅଞ୍ଚଳର ମାନ୍ୟତା ମିଳିଥିଲା । ବର୍ତ୍ତମାନ ଜମ୍ମୁ କାଶ୍ମୀରକୁ ସୁରକ୍ଷା ବଳଙ୍କ ଅଧୀନରେ ରଖାଯାଇଛି । ସୁରକ୍ଷା ବଳ ହଟିଲେ ଜନ ଆକ୍ରୋଶ ସୃଷ୍ଟି ହେବା ସହିତ ଦଙ୍ଗା ସୃଷ୍ଟି ହେବାର ସମ୍ଭାବନା ରହିଛି ବୋଲି ହାସନ କହିଛନ୍ତି ।
