ରଣପୁର: ନୟାଗଡ ଜିଲ୍ଲାର ଚାନ୍ଦପୁରକୁ ଚିକିତ୍ସା ସୁବିଧାର ଏକ ନୂତନ କେନ୍ଦ୍ରରୁପେ ଗଢ଼ି ତୋଳିବା ପାଇଁ ଉତ୍କଳୀୟମ୍ ଫାଉଣ୍ଡେସନ ଦୃଢ୍ ଆବଶ୍ୟକ ପଦକ୍ଷେପ ଉଠାଇଛି। ଏହି ସମ୍ବନ୍ଧରେ ଆୟୋଜିତ ସାମ୍ବାଦିକ ସମ୍ମିଳନୀରେ ସଂଗଠନ ପକ୍ଷରୁ ସ୍ପଷ୍ଟ କହାଯାଇଛି ଯେ, “ମେଡିକାଲ କଲେଜ ଚାନ୍ଦପୁରରେ ହିଁ ହେବା ଅତ୍ୟାବଶ୍ୟକ।”
ସମ୍ମିଳନୀରେ ଅଧିକାରୀମାନେ କହିଛନ୍ତି ଯେ, ଚାନ୍ଦପୁର ଅଞ୍ଚଳ ଭୌଗଳିକ ଓ ପ୍ରାଜନ୍ୟ ଦୃଷ୍ଟିକୋଣରୁ ମେଡିକାଲ କଲେଜ ପାଇଁ ସବୁଠୁ ଯୋଗ୍ୟ ସ୍ଥାନ। ଏଠାରେ ଥିବା ବ୍ୟାପକ ଜନସଂଖ୍ୟା, ନିକଟସ୍ଥ ଗ୍ରାମ ଅଞ୍ଚଳର ନିର୍ବରତା ଓ ଉନ୍ନତ ଯାତାୟାତ ସୁବିଧାକୁ ଧ୍ୟାନରେ ରଖି ଚାନ୍ଦପୁରକୁ ମେଡିକାଲ କଲେଜ ପାଇଁ ଦାବୀ ସଠିକ୍ ଓ ଯୁକ୍ତିସଙ୍ଗତ ବୋଲି ସେମାନେ ମତ ପ୍ରକାଶ କରିଛନ୍ତି।
ଫାଉଣ୍ଡେସନ ପକ୍ଷରୁ ଆହୁରି କୁହାଯାଇଛି ଯେ, ମେଡିକାଲ କଲେଜ ସ୍ଥାପନ ହେଲେ ଚାନ୍ଦପୁର ଓ ନିକଟସ୍ଥ ଅଞ୍ଚଳର ହଜାରୋ ଲୋକଙ୍କୁ ଉନ୍ନତ ସ୍ୱାସ୍ଥ୍ୟ ସୁବିଧା ମିଳିବ ଓ ଅଞ୍ଚଳର ଆର୍ଥିକ ଓ ସାମାଜିକ ଉନ୍ନତିକୁ ଆଗେଇ ନେବ।
ସମ୍ମିଳନୀରେ ବିଭିନ୍ନ ସମାଜସେବୀ, ଶିକ୍ଷିତବର୍ଗ ଓ ସ୍ଥାନୀୟ ନେତୃତ୍ୱ ମଧ୍ୟ ଏହି ଦାବୀକୁ ସମର୍ଥନ କରିଥିଲେ। ସବୁଠାରୁ ଗୁରୁତ୍ୱପୂର୍ଣ୍ଣ ଭାବେ, ସେମାନେ ଏକମତ ହେଲେ ଯେ ଚାନ୍ଦପୁରର ହିତରେ ଏହି ଦାବୀକୁ ସରକାରଙ୍କ ନଜରିଆରେ ଗୁରୁତ୍ୱ ସହିତ ଆଣିବାକୁ ପଡ଼ିବ।
ଉତ୍କଳୀୟମ୍ ଫାଉଣ୍ଡେସନ ଦ୍ୱାରା ଦିଆଯାଇଥିବା ଏହି ସ୍ପଷ୍ଟ ସନ୍ଦେଶ ଅଞ୍ଚଳରେ ଆଶା ଓ ଉତ୍ସାହ ସୃଷ୍ଟି କରିଛି। ଏହି ପରିପ୍ରେକ୍ଷିରେ ଉତ୍କଳୀୟମ୍ ଫାଉଣ୍ଡେସନ ତରଫରୁ ଫାଉଣ୍ଡେସନର ଅଧ୍ୟକ୍ଷ ତଥା ଆଇନଜୀବି ରାଜୀବ ଲୋଚନ ପ୍ରଧାନଙ୍କ ନେତୃତ୍ୱରେ ଓ ଉପଦେଷ୍ଟା ସ୍ବର୍ଣ୍ଣ ପ୍ରକାଶ ରାଉତରାୟଙ୍କ ସଂଯୋଜନା କ୍ରମେ ଆଜି ସନ୍ଧ୍ୟାରେ ଚାନ୍ଦପୁରରେ ଏକ ସାମ୍ବାଦିକ ସମ୍ମିଳନୀ କରାଯାଇଥିଲା। ଅନ୍ୟ ମଂଚାସୀନ ଅତିଥିମାନଙ୍କ ମଧ୍ୟରେ ସମାଜସେବୀ ତ୍ରିନାଥ ବିଶ୍ୱାଳ, ଗାୟତ୍ରୀ ଫାଉଣ୍ଡେସନ ଅଧ୍ୟକ୍ଷ ପ୍ରଫୁଲ ନାୟକ, ସୁଧାଂଶୁ ଶେଖର ପ୍ରଧାନ, ସଂଗ୍ରାମ ମାର୍ଥା, ପ୍ରମୋଦ ପ୍ରଧାନ, ପ୍ରମୋଦ ରଗଡ଼ ପ୍ରମୁଖ ଉପସ୍ଥିତ ଥିଲେ। ଏହା ସହିତ ରଣପୁର, ଟାଙ୍ଗୀ, ବ୍ରହ୍ମପୁର ସାମ୍ବାଦିକ ଓ ବୁଦ୍ଧିଜୀବୀମାନେ ମଧ୍ୟ ଏହି କାର୍ଯ୍ୟକ୍ରମରେ ଯୋଗ ଦେଇଥିଲେ।