ଭୁବନେଶ୍ୱର: ଓଡିଶା ରାଜ୍ୟ ସମବାୟ ଦୁଗ୍ଧ ଉତ୍ପାଦକ ମହାସଂଘ ଲିମିଟେଡ୍ (ଓମ୍ଫେଡ୍)କୁ ମିଳିଲା ଟ୍ରଷ୍ଟ ବ୍ରାଣ୍ଡ ଅଫ୍ ଦ ଓଡିଶା ସମ୍ମାନ। ନେଟଓ୍ୱାର୍କ ୧୮ ପକ୍ଷରୁ ଗତ କାଲି ଭୁବନେଶ୍ୱରଠାରେ ଆୟୋଜିତ ଆତ୍ମ ନିର୍ଭର ଓଡିଶା ଶୀର୍ଷକ ଏକ ସ୍ୱତନ୍ତ୍ର କାର୍ଯ୍ୟକ୍ରମରେ ଏହି ପୁରସ୍କାର ପ୍ରଦାନ କରାଯାଇଛି। କାର୍ଯ୍ୟକ୍ରମରେ ମାନ୍ୟବର ବାଣିଜ୍ୟ ଓ ପରିହବନ, ଖଣି ଓ ଇସ୍ପାତ ମନ୍ତ୍ରୀ ବିଭୁତି ଭୂଷଣ ଜେନା ଯୋଗଦେଇ ଏହି ପୁରସ୍କାର ପ୍ରଦାନ କରିଥିଲେ। ଓମ୍ଫେଡ୍ ସଭାପତି କିଶୋର ଚନ୍ଦ୍ର ପ୍ରଧାନୀ ଓ ଡେପୁଟି ମ୍ୟାନେଜର ଡାକ୍ତର ବିଶ୍ୱରଂଜନ ତ୍ରିପାଠୀ ମନ୍ତ୍ରୀଙ୍କଠାରୁ ଏହି ପୁରସ୍କାର ଗ୍ରହଣ କରିଛନ୍ତି।
ଏହି ପୁରସ୍କାର ପାଇବା ପରେ ଓମ୍ଫେଡ୍ କର୍ମଚାରୀଙ୍କ ମଧ୍ୟରେ ବେଶ ଉତ୍ସାହ ସୃଷ୍ଟି ହୋଇଛି। ଏହି ସ୍ୱୀକୃତି ରାଜ୍ୟର ଲକ୍ଷ ଲକ୍ଷ ଚାଷୀଙ୍କ କଠୋର ପରିଶ୍ରମ ଏବଂ ଅଗଣିତ ଗ୍ରାହକଙ୍କର ଭଲ ପାଇବାର ପ୍ରତୀକ। ଓମ୍ଫେଡ ରାଜ୍ୟର କୋଟି କୋଟି ଲୋକଙ୍କ ନିକଟରେ ପହଞ୍ଚି ପାରିଥିବାରୁ ସେମାନଙ୍କ ନିକଟରେ ଆମେ କୃତଜ୍ଞ ବୋଲି ପୁରସ୍କାର ଗ୍ରହଣ କରିବା ଅବସରରେ କହିଛନ୍ତି ଓମ୍ଫେଡ୍ ସଭାପତି ଶ୍ରୀ ପ୍ରଧାନୀ।
କ୍ଷୀର କହିଲେ ଓମ୍ଫେଡ୍। ଏହା ଆଜି ଘରେ ଘରେ ପରିଚିତ। ଏହାର ଗୁଣବତ୍ତା ଏବଂ ବ୍ୟାପକତା ପାଇଁ ଓମ୍ଫେଡ୍ ଆଜି କେବଳ ଓଡିଶା ନୁହେଁ, ଓଡିଶା ବାହାରେ ମଧ୍ୟ ନିଜର ସ୍ୱତନ୍ତ୍ର ପରିଚୟ ସୃଷ୍ଟି କରିଛି । ଶୁଦ୍ଧତା ଓ ଉତ୍ତମ ଗୁଣମାନର ଦୁଗ୍ଧ ହୋଇଥିରୁ ଲୋକମାନଙ୍କ ଭରସା ଓ ବିଶ୍ୱାସ ଜିତିପାରିଛି। କେବଳ ଦୁଗ୍ଧ ନୁହେଁ, ଓମ୍ଫେଡ୍ ର ବିଭିନ୍ନ ଉତ୍ପାଦ ଯଥା-ଘିଅ, ମିଠା ଓ ସାଧା ଦହି, ପେଡା, ଆଇସକ୍ରିମ୍, ଫ୍ଲେବର ମିଲ୍କ, ପନିର, ଦୁଗ୍ଧ ଗୁଣ୍ଡ ଇତ୍ୟାଦି ଘରେ ଘରେ ପରିଚିତ।
ଶୁଦ୍ଧତା ପାଇଁ ଆଜି ଓମ୍ଫେଡ୍ ଘିଅ ଜଗତର ନାଥ ଜଗନ୍ନାଥଙ୍କ ନିକଟରେ ଭୋଗ ହେଉଛି। ବିଭିନ୍ନ ପର୍ଯ୍ୟାୟରେ ପରୀକ୍ଷା ନିରୀକ୍ଷା ହେବା ସହ ଅଗଣିତ ଗ୍ରାହକଙ୍କୁ ସ୍ୱଚ୍ଛ ଓ ଶୁଦ୍ଧ ଦୁଗ୍ଧଜାତ ଦ୍ରବ୍ୟ ଯୋଗାଇ ଦେବାକୁ ଓମ୍ଫେଡ୍ ସଦାସର୍ବଦା ଉଦ୍ୟମ ଜାରି ରଖିଛି। ଗୁଣବତ୍ତାରେ କୌଣସି ପ୍ରକାର ସାଲିସ କରାଯିବ ନାହିଁ ବୋଲି ଓମ୍ଫେଡର ପରିଚାଳନା ନିର୍ଦେଶକ ବିଜୟ ଅମୃତ କୁଲାଙ୍ଗେ କହିଛନ୍ତି। ଓମ୍ଫେଡ୍ ତାର ସ୍ୱଚ୍ଛ ଓ ଶୁଦ୍ଧତା ପାଇଁ ଆଜି ରାଜ୍ୟବାସୀଙ୍କର ବିଶ୍ୱାସ ଜିତି ପାରିଛି। ଏ ସମ୍ମାନ ଓ ଶ୍ରେୟ ଓମ୍ଫେଡ୍ ର ଲକ୍ଷ ଲକ୍ଷ ଚାଷୀ, ଅଗଣିତ ଗ୍ରାହକ ଏବଂ କଠୋର ପରିଶ୍ରମ କରୁଥିବା କର୍ମଚାରୀଙ୍କର ବୋଲି ସେ କହିଛନ୍ତି।