ରଣପୁର: ଆଜିଠାରୁ ଅର୍ଥାତ ଜାନୁଆରୀ ୫ ରୁ ୯ ତାରିଖ ପର୍ଯ୍ୟନ୍ତ ରଣପୁରରେ ଆୟୋଜିତ ହେଉଛି ରଣପୁର ମହୋତ୍ସବ। ଐତିହ୍ୟ, ସଂସ୍କୃତି, ଇତିହାସ ଓ ପରମ୍ପରାକୁ ଆଧାର କରି ଏହି ମହୋତ୍ସବ ଦୀର୍ଘବର୍ଷ ଧରି ଅଞ୍ଚଳବାସୀଙ୍କ ମଧ୍ୟରେ ଆନନ୍ଦ ଓ ଗର୍ବର ପ୍ରତୀକ ଭାବେ ପାଳିତ ହୋଇଆସୁଛି।
ଏହି ପାଞ୍ଚ ଦିନିଆ ମହୋତ୍ସବରେ ରଣପୁରର ଐତିହାସିକ ଗୌରବ, ଲୋକସଂସ୍କୃତି ଓ ପାରମ୍ପରିକ କଳାର ଜୀବନ୍ତ ଚିତ୍ର ଦେଖିବାକୁ ମିଳିବ। ଲୋକନୃତ୍ୟ, ଲୋକସଙ୍ଗୀତ, ପାଲା, ଦାସକଠିଆ, ଓଡ଼ିଶୀ ନୃତ୍ୟ ସହିତ ସାହିତ୍ୟିକ ଆଲୋଚନା, କବି ସମ୍ମିଳନୀ ଓ ସଂସ୍କୃତିକ କାର୍ଯ୍ୟକ୍ରମ ଦର୍ଶକଙ୍କୁ ଆକର୍ଷିତ କରିବ।
ମହୋତ୍ସବର ପ୍ରଥମ ଦିନ ମଞ୍ଚକୁ ଆଲୋକିତ କରିବେ ଓଡ଼ିଆ ସଙ୍ଗୀତ ଜଗତର ପ୍ରସିଦ୍ଧ କଣ୍ଠ ଶିଳ୍ପୀ ଇରା ମହାନ୍ତି। ତାଙ୍କର ସୁମଧୁର କଣ୍ଠ ଓ ଲୋକପ୍ରିୟ ଗୀତରେ ଦର୍ଶକମାନେ ମନମୁଗ୍ଧ ହେବେ ବୋଲି ଆୟୋଜକମାନେ ଆଶା ପ୍ରକାଶ କରିଛନ୍ତି।
ମହୋତ୍ସବ ଅବସରରେ ହସ୍ତଶିଳ୍ପ, ସ୍ଥାନୀୟ ଖାଦ୍ୟ ଓ ପାରମ୍ପରିକ ଜୀବନଶୈଳୀର ପ୍ରଦର୍ଶନୀ ଆୟୋଜିତ ହେବା ସହ ଯୁବ ପିଢ଼ିକୁ ନିଜ ମାଟିର ସଂସ୍କୃତି ସହ ଯୋଡ଼ିବାରେ ଏହା ଏକ ସଶକ୍ତ ମାଧ୍ୟମ ହେବ।
ରଣପୁର ମହୋତ୍ସବ କେବଳ ଏକ ଉତ୍ସବ ନୁହେଁ, ଏହା ହେଉଛି ମାଟିର ସ୍ମୃତି, ପରମ୍ପରାର ସୁରକ୍ଷା ଓ ସଂସ୍କୃତିର ଜୀବନ୍ତ ପ୍ରତିବିମ୍ବ। ଏହି ମହୋତ୍ସବ ମାଧ୍ୟମରେ ରଣପୁରର ଗୌରବ ଓ ପରିଚୟ ରାଜ୍ୟ ସହ ଦେଶବ୍ୟାପୀ ପ୍ରସାର ପାଇବ ବୋଲି ଆଶା କରାଯାଉଛି।