ନୂଆଦିଲ୍ଲୀ: ଯଦିଓ ୨୦୨୬ ଟି୨୦ ବିଶ୍ୱକପ୍ ପାଇଁ ପାକିସ୍ତାନର ୧୫ ଜଣିଆ ଦଳ ଘୋଷଣା କରାଯାଇଛି, ତଥାପି ପାକିସ୍ତାନ ଦଳ ବିଶ୍ୱକପ୍ରେ ଅଂଶଗ୍ରହଣ କରିବ କି ନାହିଁ ତାହା ସ୍ପଷ୍ଟ ହୋଇନାହିଁ। ଆଜି ସନ୍ଧ୍ୟାରେ ପିସିବି ଅଧ୍ୟକ୍ଷ ମୋହସିନ ନକଭି ବିଶ୍ୱକପ୍ ସମ୍ପର୍କରେ ପାକିସ୍ତାନ ପ୍ରଧାନମନ୍ତ୍ରୀ ଶାହବାଜ ସରିଫଙ୍କୁ ଭେଟିଛନ୍ତି। ଏପର୍ଯ୍ୟନ୍ତ ଏକ ଚୂଡ଼ାନ୍ତ ନିଷ୍ପତ୍ତି ନିଆଯାଇନାହିଁ।
ମୋହସିନ ନକଭି ସୋସିଆଲ ମିଡିଆ ମାଧ୍ୟମରେ ସେୟାର କରିଛନ୍ତି ଯେ, ସେ ଆଇସିସି ଏବଂ ୨୦୨୬ ଟି୨୦ ବିଶ୍ୱକପ୍ ସମ୍ପର୍କରେ ପ୍ରଧାନମନ୍ତ୍ରୀ ଶାହବାଜ ସରିଫଙ୍କୁ ଭେଟି ପରିସ୍ଥିତି ବୁଝାଇଛନ୍ତି। ପ୍ରଧାନମନ୍ତ୍ରୀ ସରିଫ କହିଛନ୍ତି ଯେ, ପାକିସ୍ତାନ ସମସ୍ତ ବିକଳ୍ପ ବିଚାର କରିବ।
ମୋହସିନ ନକଭି କହିଛନ୍ତି ଯେ, ଏପର୍ଯ୍ୟନ୍ତ ଚୂଡ଼ାନ୍ତ ନିଷ୍ପତ୍ତି ନିଆଯାଇନାହିଁ। ପାକିସ୍ତାନ ଏହି ଶୁକ୍ରବାର କିମ୍ବା ଆସନ୍ତା ସୋମବାର ଟି୨୦ ବିଶ୍ୱକପ୍ ଉପରେ ଚୂଡ଼ାନ୍ତ ନିଷ୍ପତ୍ତି ନେଇପାରେ।
ପାକିସ୍ତାନ କ୍ରିକେଟ୍ ବୋର୍ଡ ଅଧ୍ୟକ୍ଷ ମୋହସିନ ନକଭି ବାଂଲାଦେଶକୁ ଟି୨୦ ବିଶ୍ୱକପ୍ରୁ ବାଦ ଦେବା ପାଇଁ ଆଇସିସିର ନିଷ୍ପତ୍ତିକୁ ସମାଲୋଚନା କରିଛନ୍ତି। ଏହା ମଧ୍ୟ ସୂଚନା ଆସିଛି ଯେ, ପାକିସ୍ତାନ ୨୦୨୬ ଟି୨୦ ବିଶ୍ୱକପ୍ ଟୁର୍ଣ୍ଣାମେଣ୍ଟ କିମ୍ବା ୧୫ ଫେବୃଆରୀରେ ଭାରତ ବିପକ୍ଷ ମ୍ୟାଚ୍ ବର୍ଜନ କରିବ।
ବାଂଲାଦେଶ ଦାବି କରିଥିଲା ଯେ, ଟି୨୦ ବିଶ୍ୱକପ୍ ମ୍ୟାଚ୍ ଭାରତରୁ (ଶ୍ରୀଲଙ୍କା) ସ୍ଥାନାନ୍ତର କରାଯାଉ। ଆଇସିସି ବାଂଲାଦେଶ ଖେଳାଳିଙ୍କ ସୁରକ୍ଷା ପାଇଁ ଆଶ୍ୱାସନା ଦେଇଥିଲା, କିନ୍ତୁ ବିସିବି ଅଟଳ ରହିଥିଲା। ଆଇସିସି ଶେଷରେ ବାଂଲାଦେଶକୁ ବିଶ୍ୱକପ୍ ରୁ ବହିଷ୍କାର କରିଥିଲା, ଏବଂ ସେମାନଙ୍କ ସ୍ଥାନରେ ସ୍କଟଲାଣ୍ଡକୁ ସାମିଲ କରାଯାଇଥିଲା। ନକଭି ବାଂଲାଦେଶକୁ ସମର୍ଥନ କରି କହିଥିଲେ ଯେ, ଏହି ନିଷ୍ପତ୍ତି ଅନ୍ୟାୟ ଥିଲା।