Union Budget 2026: କେନ୍ଦ୍ର ଅର୍ଥମନ୍ତ୍ରୀ ଶ୍ରୀମତୀ ନିର୍ମଳା ସୀତାରମଣଙ୍କ ଦ୍ୱାରା ଆଜି ସଂସଦରେ ଉପସ୍ଥାପିତ କେନ୍ଦ୍ର ବଜେଟ୍ ୨୦୨୬-୨୭କୁ ସିଆଇଆଇ ବା Confederation of Indian Industry Odisha ରାଜ୍ୟ ପରିଷଦ ପକ୍ଷରୁ ସ୍ୱାଗତ କରାଯାଇଛି । ଏହାକୁ ଏକ ପ୍ରଗତିଶୀଳ ଏବଂ ଅଭିବୃଦ୍ଧି-ଅଭିମୁଖୀ ବଜେଟ୍ ଭାବରେ ବର୍ଣ୍ଣନା କରାଯାଇଛି, ଯାହା ଓଡ଼ିଶାର ଉତ୍ପାଦନ, ସେବା, ପର୍ଯ୍ୟଟନ ଏବଂ ଦକ୍ଷତା ବିକାଶ କ୍ଷେତ୍ର ପାଇଁ ଯଥେଷ୍ଟ ଲାଭଦାୟକ ହେବ ।
ଭୁବନେଶ୍ୱରଠାରେ ଆୟୋଜିତ ବଜେଟ୍ର ସିଧାପ୍ରସାରଣ ଦେଖିବା ଅଧିବେଶନରେ ସିଆଇଆଇ ଓଡ଼ିଶା ରାଜ୍ୟ ପରିଷଦର ପୂର୍ବତନ ଅଧ୍ୟକ୍ଷ ତଥା ଏସାର୍ ମିନମେଟ୍ ଲିମିଟେଡର ସିଇଓ ଏବଂ ପରିଚାଳନା ନିର୍ଦ୍ଦେଶକ ଶ୍ରୀ ଶଶି ଶେଖର ମହାନ୍ତି କହିଛନ୍ତି ଯେ, “କେନ୍ଦ୍ର ବଜେଟ୍ ୨୦୨୬-୨୭ ଓଡ଼ିଶା ପାଇଁ ଅନେକ ସୁଫଳ ଆଣିଛି । ସେମିକଣ୍ଡକ୍ଟର ଉପରେ ଗୁରୁତ୍ୱ ଏବଂ ରାଜ୍ୟରେ ଜାତୀୟ ଜଳପଥର ବିକାଶ ଜାତୀୟ ସ୍ତରରେ ଓଡ଼ିଶାର ଗୁରୁତ୍ୱକୁ ଯଥେଷ୍ଟ ବୃଦ୍ଧି କରିଛି। ଏହି ବଜେଟ୍ ଦେଶର ଅର୍ଥନୀତିକୁ ଆହୁରି ମଜବୁତ କରିବ ଏବଂ ଆଗାମୀ ବର୍ଷଗୁଡ଼ିକରେ ବିଶ୍ୱର ତୃତୀୟ ବୃହତ୍ତମ ଅର୍ଥବ୍ୟବସ୍ଥା ହେବା ଦିଗରେ ଭାରତର ଯାତ୍ରାକୁ ସହାୟକ ହେବ ।”
ସିଆଇଆଇ ଓଡ଼ିଶା ରାଜ୍ୟ ପରିଷଦର ପୂର୍ବତନ ଅଧ୍ୟକ୍ଷ ତଥା ଏସଏନଏମ ଗ୍ରୁପର ଅଧ୍ୟକ୍ଷ ଡକ୍ଟର ପ୍ରଦୀପ୍ତ ମହାନ୍ତି ପ୍ରଶଂସା କରି କହିଛନ୍ତି ଯେ, ଉତ୍ପାଦନ କ୍ଷେତ୍ର ଉପରେ ଦିଆଯାଇଥିବା ବିଶେଷ ଗୁରୁତ୍ୱ ଅର୍ଥନୈତିକ ଅଭିବୃଦ୍ଧି ଏବଂ ନିଯୁକ୍ତି ସୁଯୋଗ ସୃଷ୍ଟି ପାଇଁ ଏକ ପ୍ରମୁଖ ଚାଳକ ଭାବରେ କାର୍ଯ୍ୟ କରିବ। “ଉତ୍ପାଦନ, ସେବା, ପର୍ଯ୍ୟଟନ ଏବଂ ଦକ୍ଷତା ବିକାଶ ଉପରେ ବଜେଟର ଧ୍ୟାନ କେନ୍ଦ୍ରିତ ହୋଇଥିବାରୁ ଓଡ଼ିଶା ଏଥିରୁ ବହୁଳ ଭାବରେ ଉପକୃତ ହେବ ।
ଉତ୍ପାଦନକୁ ଦିଆଯାଇଥିବା ଗୁରୁତ୍ୱ ଶିଳ୍ପ ଅଭିବୃଦ୍ଧିକୁ ତ୍ୱରାନ୍ୱିତ କରିବ ଏବଂ ବ୍ୟାପକ ନିଯୁକ୍ତି ସୁଯୋଗ ସୃଷ୍ଟି କରିବ । କାଜୁ ପ୍ରକ୍ରିୟାକରଣ ଏବଂ ନଡ଼ିଆ ପ୍ରୋତ୍ସାହନ ଯୋଜନା ଭଳି ନିର୍ଦ୍ଦିଷ୍ଟ ପଦକ୍ଷେପଗୁଡ଼ିକ ରାଜ୍ୟର କୃଷି-ଭିତ୍ତିକ ଶିଳ୍ପଗୁଡ଼ିକୁ ସିଧାସଳଖ ସହାୟତା କରିବ । ପର୍ଯ୍ୟଟନ, ସ୍ୱାସ୍ଥ୍ୟସେବା ଏବଂ ସେବା କ୍ଷେତ୍ର ଉପରେ ଗୁରୁତ୍ୱ ଓଡ଼ିଶାର ବିକାଶ ଧାରାକୁ ଆହୁରି ସୁଦୃଢ଼ କରୁଛି,” ବୋଲି ସେ କହିଛନ୍ତି ।
ସନ୍ତୋଷ ବ୍ୟକ୍ତ କରି ସିଆଇଆଇ ଓଡ଼ିଶା ରାଜ୍ୟ ପରିଷଦର ସଦସ୍ୟ ତଥା ଟାଟା ଷ୍ଟିଲ୍ ଏସଇଜେଡର ପରିଚାଳନା ନିର୍ଦ୍ଦେଶକ ଶ୍ରୀ ମଣିକାନ୍ତ ନାୟକ କହିଛନ୍ତି, “କେନ୍ଦ୍ର ବଜେଟ୍ ଭାରତର ଅର୍ଥନୈତିକ ଅଭିବୃଦ୍ଧି ପାଇଁ ଏକ ପ୍ରଗତିଶୀଳ ରୋଡମ୍ୟାପ୍ ଉପସ୍ଥାପନ କରିଛି, ଯେଉଁଥିରେ ନିରନ୍ତର ଅର୍ଥନୈତିକ ସମ୍ପ୍ରସାରଣ ଉପରେ ଅଧିକ ଗୁରୁତ୍ୱ ଦିଆଯାଇଛି । ପୁଞ୍ଜିଗତ ବ୍ୟୟ ଉପରେ ବିଶେଷ ଧ୍ୟାନ ନିଯୁକ୍ତି ସୁଯୋଗ ବୃଦ୍ଧି ଏବଂ ଉତ୍ପାଦନ ପରିବେଶକୁ ସୁଦୃଢ଼ କରିବା ପାଇଁ ସରକାରଙ୍କ ପ୍ରତିବଦ୍ଧତାକୁ ଦୋହରାଇଛି। ଓଡ଼ିଶା ପାଇଁ ଅନ୍ତଃ-ଦେଶୀୟ ଜଳପଥ, ରେୟାର ଆର୍ଥ କ୍ଷେତ୍ର ଏବଂ ପର୍ଯ୍ୟଟନ କ୍ଷେତ୍ରରେ ଲକ୍ଷ୍ୟଧାର୍ଯ୍ୟ ପଦକ୍ଷେପଗୁଡ଼ିକ ଅପାର ସମ୍ଭାବନାକୁ ଉନ୍ମୁକ୍ତ କରୁଛି, ଯାହା ରାଜ୍ୟର ପ୍ରଗତି ଏବଂ ଦେଶର ସାମଗ୍ରିକ ବିକାଶରେ ଗୁରୁତ୍ୱପୂର୍ଣ୍ଣ ଅବଦାନ ରଖିବ।”
ସିଆଇଆଇ ଓଡ଼ିଶା ରାଜ୍ୟ ପରିଷଦର ଷ୍ଟାର୍ଟଅପ୍ ଏବଂ ଇନୋଭେସନ୍ ପ୍ୟାନେଲର ଆବାହକ ତଥା ସ୍ୱଦେଶ ଇନଫ୍ରା ମାର୍କେଟିଂ ପ୍ରାଇଭେଟ୍ ଲିମିଟେଡର ପରିଚାଳନା ନିର୍ଦ୍ଦେଶକ ଶ୍ରୀ ସ୍ୱୟଂ ବରାଳ ଏହି ବଜେଟକୁ ଐତିହାସିକ ଏବଂ ସଂସ୍କାରମୂଳକ ବୋଲି ବର୍ଣ୍ଣନା କରିଛନ୍ତି। “ଗତବର୍ଷ ଆୟକର ଏବଂ ଦ୍ରବ୍ୟ ଓ ସେବା କର (ଜିଏସଟି) କ୍ଷେତ୍ରରେ ହୋଇଥିବା ଦୁଇଟି ପ୍ରମୁଖ ସଂସ୍କାର ସହ ଏହି ସଫଳ ବଜେଟ୍ ପାଇଁ ମୁଁ ଅର୍ଥମନ୍ତ୍ରୀ ଶ୍ରୀମତୀ ନିର୍ମଳା ସୀତାରମଣଙ୍କୁ ଧନ୍ୟବାଦ ଜଣାଉଛି।
କେନ୍ଦ୍ର ବଜେଟ୍ ୨୦୨୬-୨୭ ଆତ୍ମନିର୍ଭର ଭାରତର ଦୂରଦୃଷ୍ଟିକୁ ସୁଦୃଢ଼ କରୁଛି, ଯାହା ଭାରତୀୟ କର୍ପୋରେଟ୍ ସଂସ୍ଥାଗୁଡ଼ିକୁ ବିଶ୍ୱ ସ୍ତରରେ ପ୍ରତିଯୋଗୀ କରିବ। ଏମଏସଏମଇ ଗୁଡ଼ିକ ଉପରେ ବର୍ଦ୍ଧିତ ଧ୍ୟାନ ନଗଦ କାରବାର ବା ଲିକୁଇଡିଟିରେ ଉନ୍ନତି ଆଣିବ ଏବଂ ଅର୍ଥନୀତିର ମେରୁଦଣ୍ଡକୁ ଶକ୍ତିଶାଳୀ କରିବ,” ବୋଲି ସେ କହିଛନ୍ତି।
ସାମଗ୍ରିକ ଭାବେ, ସିଆଇଆଇ ଓଡ଼ିଶା ବିଶ୍ୱାସ କରେ ଯେ କେନ୍ଦ୍ର ବଜେଟ୍ ୨୦୨୬-୨୭ ଅଭିବୃଦ୍ଧି, ସଂସ୍କାର ଏବଂ ଅନ୍ତର୍ଭୁକ୍ତିକରଣ ମଧ୍ୟରେ ସଠିକ୍ ସନ୍ତୁଳନ ରକ୍ଷା କରିଛି ଏବଂ ଓଡ଼ିଶାରେ ଶିଳ୍ପାୟନ, ନିଯୁକ୍ତି ସୃଷ୍ଟି ଏବଂ ସ୍ଥାୟୀ ବିକାଶକୁ ତ୍ୱରାନ୍ୱିତ କରିବାରେ ଏକ ପ୍ରମୁଖ ଭୂମିକା ଗ୍ରହଣ କରିବ।