ନୂଆଦିଲ୍ଲୀ: ପଞ୍ଜାବରେ ବିଜେପିକୁ ବଡ଼ ଝଟକା ଲାଗିଛି। ଶିରୋମଣି ଅକାଳି ଦଳ ଏବଂ ବିଜେପି ମଧ୍ୟରେ ମେଣ୍ଟ ଆଲୋଚନା ମଧ୍ୟରେ ଗୁରୁତ୍ୱପୂର୍ଣ୍ଣ ରାଜନୈତିକ ଖବର ସାମ୍ନାକୁ ଆସିଛି। ଆଜି ପଞ୍ଜାବ ବିଜେପି ଉପାଧ୍ୟକ୍ଷ, ବ୍ୟବସାୟୀ ଏବଂ ପୂର୍ବତନ ବିଧାୟକ ଅରବିନ୍ଦ ଖାନ୍ନା ବିଜେପି ଛାଡି ଶିରୋମଣି ଅକାଳି ଦଳରେ ଯୋଗ ଦେଇଛନ୍ତି। ପାର୍ଟି ଅଧ୍ୟକ୍ଷ ସୁଖବୀର ସିଂହ ବାଦଲ ତାଙ୍କୁ ସାଙ୍ଗରୁରରେ ସ୍ୱାଗତ କରି ଅକାଳି ଦଳରେ ସାମିଲ କରିଛନ୍ତି।
ଅରବିନ୍ଦ ଖାନ୍ନା ଦୁଇ ଥର ବିଧାୟକ ଭାବେ ନିର୍ବାଚିତ ହୋଇଛନ୍ତି। ସେ ପୂର୍ବରୁ କଂଗ୍ରେସ ଦଳରେ କାର୍ଯ୍ୟ କରିଛନ୍ତି। ସେ ୨୦୨୨ ରେ ବିଜେପିରେ ଯୋଗ ଦେଇଥିଲେ। ଶିରୋମଣି ଅକାଳି ଦଳରେ ଯୋଗଦେବା ପୂର୍ବରୁ ସେ ପଞ୍ଜାବରେ ବିଜେପିର ଉପାଧ୍ୟକ୍ଷ ପଦବୀରେ ଥିଲେ। ସେ ବିଜେପିର ପଞ୍ଜାବ କୋର କମିଟି ଏବଂ ଅର୍ଥ କମିଟିର ସଦସ୍ୟ ମଧ୍ୟ ଥିଲେ। ପଞ୍ଜାବ ବିଧାନସଭା ନିର୍ବାଚନ ୨୦୨୭ ରେ ହେବାକୁ ଯାଉଛି। ଏହି ନିର୍ବାଚନ ପୂର୍ବରୁ ସୁଖବୀର ସିଂହ ବାଦଲ ଅରବିନ୍ଦ ଖାନାଙ୍କ ଦଳରେ ସାମିଲ କରି ଏକ ବଡ ସଫଳତା ପାଇଛନ୍ତି।
୨୦୨୪ ଲୋକସଭା ନିର୍ବାଚନରେ ବିଜେପି ସଙ୍ଗରୁର ସଂସଦୀୟ ଆସନରୁ ଅରବିନ୍ଦ ଖାନ୍ନାଙ୍କୁ ପ୍ରାର୍ଥୀ କରିଥିଲା, କିନ୍ତୁ ସେ ହାରିଯାଇଥିଲେ। ଆମ ଆଦମୀ ପାର୍ଟିର ଗୁରମିତ୍ ସିଂହ ମିତ ହାୟର ଏହି ଆସନରେ ବିଜୟୀ ହୋଇଥିଲେ। ଖାନ୍ନା ପୂର୍ବରୁ ଏହି ସଂସଦୀୟ କ୍ଷେତ୍ରର ଅଂଶ ସଙ୍ଗରୁର ଏବଂ ଧୁରୀ ବିଧାନସଭା ନିର୍ବାଚନ ମଣ୍ଡଳୀରୁ ବିଧାୟକ ଭାବରେ କାର୍ଯ୍ୟ କରିଛନ୍ତି।
ଅରବିନ୍ଦ ଖାନ୍ନା ୨୦୦୪ ଲୋକସଭା ନିର୍ବାଚନ କଂଗ୍ରେସ ଟିକେଟରେ ଲଢ଼ିଥିଲେ। କିନ୍ତୁ ସେ ସେହି ନିର୍ବାଚନରେ ମଧ୍ୟ ପରାସ୍ତ ହୋଇଥିଲେ। ତାଙ୍କୁ ଅକାଳୀ ଦଳ ନେତା ସୁଖଦେବ ସିଂହ ଧିଣ୍ଡସା ପରାସ୍ତ କରିଥିଲେ।