ଭୁବନେଶ୍ୱର: କର୍ମଚାରୀ ରାଜ୍ୟ ବୀମା ନିଗମ (ଇଏସଆଇସି), ଆଞ୍ଚଳିକ କାର୍ଯ୍ୟାଳୟ, ଓଡିଶା ପକ୍ଷରୁ ଏହାର ୭୫ତମ ସ୍ଥାପନା ଦିବସ (ପ୍ଲାଟିନମ୍ ଜୟନ୍ତୀ) ଉତ୍ସାହ ଓ ଗର୍ବର ସହିତ ପାଳନ କରାଯାଇଛି। ବୀମାଭୁକ୍ତ ବ୍ୟକ୍ତି ଓ ସେମାନଙ୍କ ପରିବାରଙ୍କୁ ସାମାଜିକ ସୁରକ୍ଷା ଓ ସ୍ୱାସ୍ଥ୍ୟ ସେବା ପ୍ରଦାନ କରିବାର ଯାତ୍ରାରେ ଇଏସଆଇସି ଏକ ଗୁରୁତ୍ୱପୂର୍ଣ୍ଣ ମାଇଲଖୁଣ୍ଟ।
ଆଞ୍ଚଳିକ କାର୍ଯ୍ୟାଳୟ ପରିସରରେ ଆୟୋଜିତ ଏହି କାର୍ଯ୍ୟକ୍ରମରେ ସମ୍ମାନିତ ଅତିଥି ଭାବେ ଉତ୍କଳ ବିଶ୍ୱବିଦ୍ୟାଳୟର ପି.ଏମ୍. ଏବଂ ଆଇ.ଆର୍. ବିଭାଗର ପ୍ରଫେସର ତଥା ବିଭାଗୀୟ ମୁଖ୍ୟ ଡ଼ା. ବିଜୟ କୁମାର ସୁନ୍ଦରାୟ, ଇଏସଆଇସିର ପୂର୍ବତନ ଏସ୍.ଏମ୍.ସି. (ଅବସରପ୍ରାପ୍ତ) ଡ଼ା. ଆର୍. କେ. ପାଢ଼ି, ନାଲକୋର ସଭାପତି ମଦନ ମୋହନ ଧଳ, ଓଡ଼ିଶା ରାଜ୍ୟ ନିର୍ମାଣ ମଜଦୁର ମହାସଂଘର ସଭାପତି ମନୋଜ ବସନ୍ତରାଇ ଏବଂ ଇଏସଆଇ ଯୋଜନାର ଯୁଗ୍ମ ନିର୍ଦ୍ଦେଶକ ଜେ.ଜେ. ପତି ପ୍ରମୁଖ ଉପସ୍ଥିତ ଥିଲେ। ଏଥିସହିତ ଅନ୍ୟାନ୍ୟ ପ୍ରମୁଖ ହିତାଧିକାରୀ ଓ ବିଭାଗୀୟ ଅଧିକାରୀମାନେ ମଧ୍ୟ ଏହି ପ୍ଲାଟିନମ୍ ଜୟନ୍ତୀ ଉତ୍ସବରେ ମଧ୍ୟ ଉପସ୍ଥିତ ଥିଲେ।
ଏହି ଅବସରରେ ଇଏସଆଇସି ଆଞ୍ଚଳିକ ନିର୍ଦ୍ଦେଶକ ରୁଦ୍ରଦୀପ ଦତ୍ତ ନିଗମର ପ୍ରମୁଖ ଲାଭ ଓ ସେବା ସମ୍ପର୍କରେ ବିସ୍ତୃତ ଆଲୋକପାତ କରିଥିଲେ। ସେ କହିଥିଲେ ଯେ, ଆରମ୍ଭରୁ ଇଏସଆଇସି ଶ୍ରମିକ ଓ ସେମାନଙ୍କ ପରିବାରଙ୍କ ପାଇଁ ଦୃଢ଼ ସାମାଜିକ ସୁରକ୍ଷା ବ୍ୟବସ୍ଥା ଗଠନରେ ଅଗ୍ରଣୀ ଭୂମିକା ନିଭାଇଆସୁଛି। ଏହି ଅବସରରେ ସ୍ଥାୟୀ ଅକ୍ଷମତା ଲାଭ ପ୍ରାପ୍ତକର୍ତ୍ତା, ନିର୍ଭରଶୀଳ ଲାଭ ପ୍ରାପ୍ତକର୍ତ୍ତା, ବୀମାଭୁକ୍ତ ବ୍ୟକ୍ତି, ପ୍ରମୁଖ ନିଯୁକ୍ତିଦାତା ଓ ଅନ୍ୟାନ୍ୟ ହିତାଧିକାରୀଙ୍କୁ ସମ୍ମାନିତ କରାଯାଇଥିଲା। ଉପସ୍ଥିତ ହିତାଧିକାରୀ ଓ ପ୍ରମୁଖ ନିଯୁକ୍ତିଦାତାମାନେ ଇଏସଆଇସି ଦ୍ୱାରା ପ୍ରଦାନ କରାଯାଉଥିବା ସେବା ପ୍ରତି ସନ୍ତୋଷ ବ୍ୟକ୍ତ କରିଥିଲେ।
ପ୍ଲାଟିନମ୍ ଜୟନ୍ତୀ ଉତ୍ସବର ଅଂଶରୂପେ ୧୦ ମାର୍ଚ୍ଚ ୨୦୨୬ ପର୍ଯ୍ୟନ୍ତ ଏକ ବିଶେଷ ସେବା ପକ୍ଷ ପାଳନ କରାଯିବ। ଏହାର ଅନ୍ତର୍ଗତ ସେମିନାର/ଜାଗୃତି ଶିବିର, ସ୍ୱଚ୍ଛତା ଅଭିଯାନ, କର୍ମଚାରୀ/ନିର୍ଭରଶୀଳ ଓ ନିଯୋଜକମାନଙ୍କ ପାଇଁ ସୁବିଧା ସମାଗମ, ପ୍ରତିରୋଧକ ସ୍ୱାସ୍ଥ୍ୟ ପରୀକ୍ଷା ଶିବିର ସହିତ ଯୋଗ ଓ ଆୟୁଷ ଇତ୍ୟାଦି କାର୍ଯ୍ୟକ୍ରମ ଆୟୋଜିତ ହେବ।
ଇଏସଆଇସି ବିଷୟରେ:
କର୍ମଚାରୀ ରାଜ୍ୟ ବୀମା ନିଗମ (ଇଏସଆଇସି) ଭାରତ ସରକାରଙ୍କ ଶ୍ରମ ଏବଂ ରୋଜଗାର ମନ୍ତ୍ରଣାଳୟ ଅଧୀନରେ ଗଠିତ ଏକ ବୈଧାନିକ ସଂସ୍ଥା। ଏହା ଶ୍ରମିକ ଓ ସେମାନଙ୍କ ପରିବାରଙ୍କୁ ଚିକିତ୍ସା ସେବା, ଅସୁସ୍ଥତା ସୁବିଧା, ମାତୃତ୍ୱ ସୁବିଧା, ବେକାରୀ ଭତ୍ତା ଆଦି ସହ ସମଗ୍ର ସାମାଜିକ ସୁରକ୍ଷା ସୁବିଧା ଯୋଗାଇଥାଏ। ବର୍ତ୍ତମାନ ଇଏସଆଇସି ଦେଶବ୍ୟାପୀ ୩.୮୪ କୋଟି ବୀମାଭୁକ୍ତ ବ୍ୟକ୍ତି ଓ ସେମାନଙ୍କ ପରିବାର ସହିତ ମୋଟ ୧୫ କୋଟିରୁ ଅଧିକ ହିତାଧିକାରୀଙ୍କୁ ସାମାଜିକ ସୁରକ୍ଷା ପ୍ରଦାନ କରୁଛି।