ନୂଆଦିଲ୍ଲୀ: ପାକିସ୍ତାନୀ ଖେଳାଳି ଅବରାର ଅହମ୍ମଦଙ୍କୁ କିଣିବା ପରଠାରୁ ସନରାଇଜର୍ସ ଲିଡ୍ସ ସମାଲୋଚନାର ଶିକାର ହୋଇଛି। ଇଂରାଜୀ ଫ୍ରାଞ୍ଚାଇଜ୍ ଲିଗ୍ ‘ଦି ହଣ୍ଡ୍ରେଡ୍’ ପାଇଁ ସନରାଇଜର୍ସ ଲିଡ୍ସ ଆବ୍ରାରଙ୍କୁ ପ୍ରାୟ ୨.୩୪ କୋଟି ଟଙ୍କାରେ ଅଧିଗ୍ରହଣ କରିଛି। ଏହି ଫ୍ରାଞ୍ଚାଇଜ୍ ସନ୍ ଗ୍ରୁପର ମାଲିକାନା, ଯାହା ଆଇପିଏଲ୍ ଦଳ ସନରାଇଜର୍ସ ହାଇଦ୍ରାବାଦର ମଧ୍ୟ ମାଲିକ। ଭାରତ ଏବଂ ପାକିସ୍ତାନ ମଧ୍ୟରେ ଉତ୍ତେଜନା ସତ୍ତ୍ୱେ ଅବରାରଙ୍କୁ କିଣିବା ପାଇଁ ସନ୍ ଗ୍ରୁପ ସମାଲୋଚନାର ସମ୍ମୁଖୀନ ହୋଇଛି। ଭାରତୀୟ କିମ୍ବଦନ୍ତୀ ସୁନୀଲ ଗାଭାସ୍କର ମଧ୍ୟ ଏହାର ସମାଲୋଚନା କରିଛନ୍ତି।
ସନରାଇଜର୍ସ ଫ୍ରାଞ୍ଚାଇଜ୍ ର ସିଇଓ ଏବଂ ଦି ହଣ୍ଡ୍ରେଡ୍ ପାଇଁ ନିଲାମ ସମୟରେ ଉପସ୍ଥିତ ଥିବା କାଭ୍ୟା ମାରାନ ମଧ୍ୟ ସମାଲୋଚନାର ସମ୍ମୁଖୀନ ହେଉଛନ୍ତି। ସୁନୀଲ ଗାଭାସ୍କର ବିଶ୍ୱାସ କରନ୍ତି ଯେ, ପାକିସ୍ତାନୀ ଖେଳାଳି ଅବରାରଙ୍କୁ କିଣିବା ପ୍ରତି ପ୍ରତିକ୍ରିୟା ସ୍ୱାଭାବିକ। ମିଡ୍-ଡେ ପାଇଁ ତାଙ୍କ ସ୍ତମ୍ଭରେ, ଗାଭାସ୍କର ମନେ ପକାଇଛନ୍ତି ଯେ, ୨୦୦୮ ମୁମ୍ବାଇ ଆତଙ୍କବାଦୀ ଆକ୍ରମଣ ପରେ ପାକିସ୍ତାନୀ ଖେଳାଳିମାନଙ୍କୁ ଆଇପିଏଲରୁ କିପରି ନିଲମ୍ବିତ କରାଯାଇଥିଲା। ପରବର୍ତ୍ତୀ ସମୟରେ ପୁଲୱାମା (୨୦୧୯) ଏବଂ ପହଲଗାମ (୨୦୨୫) ରେ ହୋଇଥିବା ଆତଙ୍କବାଦୀ ଆକ୍ରମଣ ଦୁଇ ଦେଶ ମଧ୍ୟରେ ସମ୍ପର୍କକୁ ଆହୁରି ତିକ୍ତ କରିଥିଲା।
ଗାଭାସ୍କର ବିଶ୍ୱାସ କରନ୍ତି ଯେ, ପାକିସ୍ତାନୀ ଖେଳାଳିମାନଙ୍କୁ ଦିଆଯାଉଥିବା ଟଙ୍କା ମଧ୍ୟ ଟିକସ ଆକାରରେ ପାକିସ୍ତାନ ସରକାରଙ୍କ ପାଖରେ ପହଞ୍ଚିବ, ଯାହାକୁ ଅସ୍ତ୍ରଶସ୍ତ୍ର କିଣିବା ପାଇଁ ବ୍ୟବହାର କରାଯାଇପାରେ। ଏହାର ଅର୍ଥ ହେଉଛି ପାକିସ୍ତାନୀ ଖେଳାଳିମାନଙ୍କୁ ଦିଆଯାଉଥିବା ଟଙ୍କା ଭାରତୀୟଙ୍କ ରକ୍ତ ବୁହାଇବା ପାଇଁ ବ୍ୟବହାର କରାଯାଇପାରେ। ସେ ଲେଖିଛନ୍ତି ଯେ, ସନରାଇଜର୍ସ ଲିଡ୍ସ ପ୍ରଶିକ୍ଷକ ଡାନିଏଲ୍ ଭିଟୋରି ଏହାକୁ ବୁଝିପାରିବେ ନାହିଁ, କିନ୍ତୁ ଭାରତୀୟ ମାଲିକମାନେ ଏହା ବୁଝିବା ଉଚିତ।
ସୁନୀଲ ଗାଭାସ୍କର ଲେଖିଛନ୍ତି ଯେ, “ଯଦି ଦଳର ମାଲିକମାନେ ଭାରତୀୟ, ତେବେ ସେମାନେ ପରୋକ୍ଷ ଭାବରେ ଏକ ବ୍ୟବସ୍ଥାକୁ ପାଣ୍ଠି ଦେଉଛନ୍ତି ଯାହା ଭାରତୀୟ ସୈନିକ ଏବଂ ସାଧାରଣ ଲୋକଙ୍କ ମୃତ୍ୟୁର କାରଣ ହୋଇପାରେ। ଏହି ଟୁର୍ଣ୍ଣାମେଣ୍ଟ ଜିତିବା କ’ଣ ଭାରତୀୟଙ୍କ ଜୀବନ ଅପେକ୍ଷା ଅଧିକ ଗୁରୁତ୍ୱପୂର୍ଣ୍ଣ? ବିଶ୍ୱର ବହୁତ କମ୍ ଦେଶର ଖେଳାଳି ଏଥିରେ ଅଂଶଗ୍ରହଣ କରନ୍ତି।”