ନୂଆଦିଲ୍ଲୀ: ଭାରତୀୟ କ୍ରିକେଟ୍ ଦଳ ଚଳିତ ବର୍ଷ ଆୟର୍ଲାଣ୍ଡ ଗସ୍ତ କରିବ। 2026 ଆଇପିଏଲ ପରେ ଭାରତ ଏବଂ ଆୟର୍ଲାଣ୍ଡ ମଧ୍ୟରେ ଏକ ତିନି ମ୍ୟାଚ୍ ବିଶିଷ୍ଟ ଟି-୨୦ ସିରିଜ୍ ଖେଳାଯିବ। ଭାରତ ବନାମ ଆୟର୍ଲାଣ୍ଡ ଟି-୨୦ ସିରିଜ୍ ଚଳିତ ବର୍ଷ ଜୁଲାଇରେ ଖେଳାଯିବ। ଏହା ଆୟର୍ଲାଣ୍ଡ ପାଇଁ ଏକ ନୂତନ ଆରମ୍ଭ ମଧ୍ୟ ହେବ, କାରଣ ପଲ ଷ୍ଟର୍ଲିଙ୍ଗ ସମ୍ପ୍ରତି ଅଧିନାୟକ ପଦରୁ ଇସ୍ତଫା ଦେଇଛନ୍ତି।
ଆୟର୍ଲାଣ୍ଡ କ୍ରିକେଟର ଡାଇରେକ୍ଟର ଅଫ ହାଇ ପରଫର୍ମାନ୍ସ ଗ୍ରାହାମ ୱେଷ୍ଟ ନିଶ୍ଚିତ କରିଛନ୍ତି ଯେ, ଆୟର୍ଲାଣ୍ଡ ଦଳ ୨୦୨୮ ଟି-୨୦ ବିଶ୍ୱକପ୍ ପାଇଁ ଯୋଗ୍ୟତା ଅର୍ଜନ କରିସାରିଛି, ତେଣୁ ପଲ ଷ୍ଟର୍ଲିଙ୍ଗଙ୍କ ଅଧିନାୟକ ପଦରୁ ଇସ୍ତଫା ଅର୍ଥ ହେଉଛି ଜଣେ ନୂତନ ଅଧିନାୟକଙ୍କୁ ଆଗାମୀ ଦୁଇ ବର୍ଷ ମଧ୍ୟରେ ନିଜକୁ ପ୍ରତିଷ୍ଠିତ କରିବାର ସୁଯୋଗ ମିଳିବ।
ଏହା ଉଲ୍ଲେଖନୀୟ ଯେ, ୨୦୨୬ ଆଇପିଏଲ ସମାପ୍ତି ପରେ ଭାରତୀୟ ଦଳ ଆଫଗାନିସ୍ତାନ ବିପକ୍ଷରେ ଏକ ଟେଷ୍ଟ ମ୍ୟାଚ୍ ଏବଂ ତିନୋଟି ODI ଖେଳିବ। ଭାରତ ବନାମ ଆଫଗାନିସ୍ତାନ ଦିନିକିଆ ସିରିଜର ଶେଷ ମ୍ୟାଚ୍ ଜୁନ୍ ୨୦ ତାରିଖରେ ଖେଳାଯିବ। ଭାରତୀୟ ଦଳର ଇଂଲଣ୍ଡ ଗସ୍ତ ଜୁଲାଇ ୧ ତାରିଖରୁ ଆରମ୍ଭ ହେବାର କାର୍ଯ୍ୟକ୍ରମ ରହିଛି। ଭାରତ ବନାମ ଆୟର୍ଲାଣ୍ଡ ଟି-୨୦ ସିରିଜ୍ ଏପର୍ଯ୍ୟନ୍ତ ଘୋଷଣା କରାଯାଇ ନାହିଁ, କିନ୍ତୁ ଭାରତୀୟ ଦଳ ଆୟର୍ଲାଣ୍ଡରେ ସିରିଜ୍ ଖେଳିବା ପରେ ଇଂଲଣ୍ଡ ଗସ୍ତ କରିବ ବୋଲି କଳ୍ପନାଜଳ୍ପନା ଜୋର ଧରିଛି।
ଟିମ୍ ଇଣ୍ଡିଆ ଆୟର୍ଲାଣ୍ଡର ତିନୋଟି ଗସ୍ତରେ ଟି-୨୦ ସିରିଜ୍ ଖେଳିଛି ଏବଂ ପ୍ରତ୍ୟେକ ଥର ଆୟର୍ଲାଣ୍ଡକୁ ନିଜ ଘର ଭିତରେ ଭାରତ ହ୍ୱାଇଟ୍ ୱାସ୍ କରିଛି। ଭାରତ ଏବଂ ଆୟର୍ଲାଣ୍ଡ ମଧ୍ୟରେ ମୋଟ ଆଠଟି ଟି-୨୦ ମ୍ୟାଚ୍ ଖେଳାଯାଇଛି ଏବଂ ପ୍ରତ୍ୟେକ ଥର ଟିମ୍ ଇଣ୍ଡିଆ ଜିତିଛି। ସେମାନଙ୍କର ଶେଷ ମୁକାବିଲା ୨୦୨୪ ଟି-୨୦ ବିଶ୍ୱକପ୍ ରେ ହୋଇଥିଲା, ଯେତେବେଳେ ଆୟର୍ଲାଣ୍ଡକୁ ୯୬ ରନରେ ଅଲଆଉଟ୍ କରିବା ପରେ ଟିମ୍ ଇଣ୍ଡିଆ ୮ ୱିକେଟ୍ ରେ ମ୍ୟାଚ୍ ଜିତିଥିଲା।