ସମୀକ୍ଷା ବ୍ୟୁରୋ
ନିର୍ବାଚନ ପରେ ପରେ ବିଜେଡିର ବରିଷ୍ଠ ନେତା ତଥା ପୂର୍ବତ୍ତନ ସାଂସଦ ଡ.ପ୍ରସନ୍ନ ପାଟ୍ଟଶାଣୀ ନୂଆ ଦିଲ୍ଲୀରେ ଯୋଗଦେଇଥିବା ଏକ ଫଟୋକୁ ନେଇ ଚାଲିଛି ଚର୍ଚ୍ଚା। ଜଣେ ନେତା ତଥା ପୂର୍ବତ୍ତନ ସାଂସଦ ଭାବେ କୌଣସ କାର୍ଯ୍ୟକ୍ରମ ବା ଉତ୍ସବରେ ଯୋଗଦେବା କିଛି ଭୁଲ ନୁହେଁ। ହେଲେ ପ୍ରସନ୍ନ ପାଟ୍ଟଶାଣୀ ବିଜେପି ନେତାଙ୍କ ସହିତ ବିଭିନ୍ନ କାର୍ଯ୍ୟକ୍ରମରେ ଯୋଗ ଦେବାକୁ ନେଇ ଚାଲିଛି ଚର୍ଚ୍ଚା। ଗତକାଲି ନୂଆଦିଲ୍ଲରେ ଏକ ଯାଗ କାର୍ଯ୍ୟକ୍ରମ ଥିଲା। ଏଥିରେ ଦିଲ୍ଲୀ ବିଜେପି ସଭାପତି ତଥା ସାଂସଦ ମନୋଜ ତିୱାରୀଙ୍କ ସହିତ ପ୍ରସନ୍ନ ପାଟ୍ଟଶାଣୀ ଅତିଥି ଥିଲେ। ଏଥିସହିତ ଯୋଗଗୁରୁ ଅନୀଲ ଜୈନ ମଧ୍ୟ ଅତିଥି ଥିଲେ। ଅବଶ୍ୟ କାର୍ଯ୍ୟକ୍ରମଟି ଯୋଗ ସଂପର୍କିତ ଥିବାରୁ ପ୍ରସନ୍ନ ପାଟ୍ଟଶାଣ ସେଥିରେ ଯୋଗଦେବା କିଛି ଭୁଲ ନୁହେଁ। ଏପରିକି ବିଜେପି ନେତାଙ୍କ ସହିତ ମଞ୍ଚରେ ବସିବା ମଧ୍ୟ ଭୁଲ ନୁହେଁ। ହେଲେ ବର୍ତ୍ତମାନ ପ୍ରସନ୍ନ ପାଟ୍ଟଶାଣୀଙ୍କ ରଜନୈତିକ ପରିସ୍ଥିତି ଯାହା ସେଥିରେ ବିଜେପି ନେତାଙ୍କ ସହିତ ଯୋଗଦେବା ବିଭିନ୍ନ ମହଲରେ ଆଲୋଚନା ଚାଲିଛି। ଗତ ନିର୍ବାଚନରେ ପ୍ରସନ୍ନ ପାଟ୍ଟଶାଣୀଙ୍କୁ ଭୁବନେଶ୍ବର ସାଂସଦ ଟିକେଟ ଦିଆଗଲା ନାହିଁ। ତା ବଦଳରେ ରାଜ୍ୟସଭା ସଦସ୍ୟ କରାଯିବ ବୋଲି ଘୋଷଣା କରାଯାଇଥିଲା। ହେଲେ ତାହା ମଧ୍ୟ ପ୍ରଦାନ କରାଗଲା ନାହିଁ। ସେଥିପାଇଁ ଚାରିଆଡେ ଚର୍ଚ୍ଚା ହେଲା ଯେ, ବାବା ଆଉ ନବୀନଙ୍କ ଗୁଡ ବୁକରେ ନାହାଁନ୍ତି। ସେ କୁଆଡେ ଦଳ ଛାଡିଦେବେ ବୋଲି ଆଲୋଚନା ଚାଲିଲା। ତେବେ ସେ ଦଳ ଛାଡିବେ ନାହିଁ ବୋଲି ପ୍ରସନ୍ନ ରୋକଠୋକ କହିଥିଲେ। ତେବେ ବର୍ତ୍ତମାନ ଦିଲ୍ଲୀରେ ବିଭିନ୍ନ ବିଜେପି ନେତାଙ୍କୁ ଭେଟିବା ଏବଂ ସେମାନଙ୍କ ସହିତ ବିଭିନ୍ନ କାର୍ଯ୍ୟକ୍ରମରେ ଯୋଗଦେବାକୁ ନେଇ ସନ୍ଦେହ ସୃଷ୍ଟି ହୋଇଛି।
