ଉତ୍ତର ଭାରତରେ ଭୟଙ୍କର ବନ୍ୟା ପରିସ୍ଥିତି ସୃଷ୍ଟିହୋଇଛି। ରାଜଧାନୀ ଦିଲ୍ଳୀ ଓ ଏହାର ଉପକଣ୍ଠରେ ପ୍ରବଳ ବର୍ଷା ଯୋଗୁଁ ବନ୍ୟା ପରିସ୍ଥିତି ଦେଖାଯାଇଛି । ହରିୟାଣାର କିଛି ସ୍ଥାନରେ ପ୍ରବଳରୁ ଅତି ପ୍ରବଳ ବର୍ଷା ହୋଇଥିବାରୁ ଦିଲ୍ଲୀ ନିକଟ ଦେଇ ଯାଇଥିବା ଯମୁନା ନଦୀର ଜଳସ୍ତର ବଢ଼ିଛି । ହରିୟାଣାର ହାଥିନୀକୁଣ୍ଡ ବ୍ୟାରେଜରୁ ବନ୍ୟା ଜଳ ନିଷ୍କାସିତ ହେବା ପରେ ଦିଲ୍ଲୀରେ ଯମୁନାର ଜଳ ବିପଦ ସଂକେତ ଦେଇ ଅତିକ୍ରମ କରୁଛି । ତଳିଆ ଅଞ୍ଚଳରୁ ପ୍ରାୟ ୧୦ ହଜାର ଲୋକଙ୍କୁ ଉଦ୍ଧାର କରାଯାଇ ସୁରକ୍ଷିତ ସ୍ଥାନରେ ରଖାଯାଇଛି । ବନ୍ୟା ପୀଡ଼ିତ ଲୋକଙ୍କୁ ଆଶ୍ରୟସ୍ଥଳରେ ରନ୍ଧା ଖାଦ୍ୟ ଦିଆଯାଉଛି । ଦିଲ୍ଲୀରେ ବନ୍ୟା ଯୋଗୁଁ ଲୋକେ ଧନସମ୍ପତ୍ତି କ୍ଷୟକ୍ଷତିର ଶିକାର ହୋଇଛନ୍ତି । ଏଥିପାଇଁ ପ୍ରଶାସନିକ ଅଧିକାରୀଙ୍କ ଦ୍ୱାରା ସଂପୂର୍ଣ୍ଣ ରୂପେ ପ୍ରସ୍ତୁତ କରାଯାଇଛି । ଉଦ୍ଧାରକାରୀ ଟିମ ନିଜର ଅପରେଶନ ଜାରି ରଖିଛନ୍ତି । ବନ୍ୟାପୀଡ଼ିତଙ୍କ ପାଇଁ ୨୧୨୦ଟି ରିଲିଫ କେନ୍ଦ୍ର କରାଯିବ । ସେଥିରୁ ୧୧୦୦ ଶିବିର ପ୍ରସ୍ତୁତ ହୋଇସାରିଛି । ଦିଲ୍ଲୀର ତଳିଆ ଅଞ୍ଚଳରେ ପ୍ରଶାସନିକ ଅଧିକାରୀଙ୍କ ଦ୍ୱାରା ୩୦ଟି ସ୍ଥାନକୁ ପଏଣ୍ଟ କରାଯାଇଛି । ଏଥି ସହିତ ୫୩ଟି ଡଙ୍ଗାକୁ ପ୍ରସ୍ତୁତ ରଖାଯାଇଛି । ସାଧାରଣ ଲୋକଙ୍କର ଜୀବନ ରକ୍ଷା ପାଇଁ ହେଲ୍ପଲାଇନ ନମ୍ବର ୨୧୨୧୦୮୪୯, ୨୨୪୨୧୬୫୬ ଜାରି କରାଯାଇଛି । ଉତ୍ତରାଖଣ୍ଡ ଓ ହିମାଚଳ ପ୍ରଦେଶରେ ପ୍ରବଳ ବର୍ଷାଜନିତ ବନ୍ୟା ପରିସ୍ଥିତି ଯୋଗୁ ସୋମବାର ସୁଦ୍ଧା ୩୮ ଜଣଙ୍କ ପ୍ରାଣହାନି ଘଟିଥିବା ଜଣାପଡ଼ିଛି। ହରିୟାଣା, ପଞ୍ଜାବ, ଜମ୍ମୁ-କଶ୍ମୀରରେ ବନ୍ୟା ଯୋଗୁ ଲୋକେ ଆତଙ୍କିତ ହୋଇପଡ଼ିଛନ୍ତି। ହରିଦ୍ୱାରରେ ଗଙ୍ଗା ନଦୀ ବିପଦସଙ୍କେତ ଉପରେ ପ୍ରବାହିତ ହେଉଥିବାବେଳେ ଦିଲ୍ଲୀରେ ଯମୁନା ନଦୀ ବିପଦସଙ୍କେତ ଟପିଥିବା ଜଣାପଡ଼ିଛି। ପଞ୍ଜାବରେ ଭାକ୍ରା ଜଳଭଣ୍ଡାରର ନିମ୍ନଭାଗ ଜଳାର୍ଣ୍ଣବ ହୋଇପଡ଼ିବାରୁ ଅନେକ କ୍ଷତି ଘଟିଛି। ବର୍ଷା ଓ ବନ୍ୟା ଯୋଗୁ ଅନେକ ଘର ଭାଙ୍ଗିଯାଇ ଥିବାବେଳେ ହଜାର ହଜାର ଲୋକଙ୍କୁ ସ୍ଥାନାନ୍ତର କରାଯାଇଛି। ଏପରିକି ବହୁ ଚାଷଜମି କ୍ଷତିଗ୍ରସ୍ତ ହେବା ସହ ଜଳାର୍ଣ୍ଣବ ଯୋଗୁ ଯାତାୟାତରେ ବାଧା ସୃଷ୍ଟିହୋଇଛି।
