ଶୁକ୍ରବାର ଅପରାହ୍ନରେ ଅର୍ଥମନ୍ତ୍ରୀ ନିର୍ମଳା ସୀତାରମଣ ଏକ ପ୍ରେସ୍ ମିଟ୍ କରିଥିଲେ । ଏହି ପ୍ରେସ୍ମିଟ୍ରେ ଭାରତର ଅର୍ଥନୈତିକ ଅଭିବୃଦ୍ଧି ସମ୍ପର୍କରେ ନିର୍ମଳା ଘୋଷଣା କରିଥିଲେ । ଆମେରିକା ଏବଂ ଚୀନ୍ ପରି ବିକଶିତ ରାଷ୍ଟ୍ର ଅପେକ୍ଷା ଭାରତର ଅଭିବୃଦ୍ଧି ହାର ସୁଦୃଢ ରହିଥିବା ନେଇ ଏହି ପ୍ରେସ୍ମିଟ୍ରେ ନିର୍ମଳା ସୀତାରମଣ ସୂଚନା ଦେଇଛନ୍ତି । ସେହିପରି ଶ୍ରମ ଏବଂ କର ପ୍ରକ୍ରିୟାକୁ ନେଇ ସରକାର ସଂସ୍କାର ଜାରି ରଖିଛନ୍ତି ବୋଲି ସୀତାରମଣ ନିଜ ପ୍ରେସ୍ମିଟ୍ରେ କହିଥିଲେ । ଶ୍ରମ ଓ ପରିବେଶ ମଞ୍ଜୁରି କ୍ଷେତ୍ରରେ ମଧ୍ୟ ସଂସ୍କାର ଅଣାଯିବ, ସିଏସ୍ଆର ନିୟମର ଉଲ୍ଲଂଘନ ପାଇଁ ଆପରାଧିକ ମାମଲା ରୁଜୁ ହେବନାହିଁ ବୋଲି ଅର୍ଥମନ୍ତ୍ରୀ ପ୍ରକାଶ କରିଛନ୍ତି । କର ପ୍ରକ୍ରିୟାକୁ ସରଳ କରାଯିବାର ପ୍ରୟାସ କରାଯାଉଛି । ଆସନ୍ତା ବିଜୟା ଦଶମୀ ପରଠାରୁ ସମସ୍ତ ବ୍ୟବସ୍ଥାର କମ୍ପ୍ୟୁଟରୀକରଣ କରାଯିବ ବୋଲି ସୀତାରମଣ ସୂଚନା ଦେଇଥିଲେ । ଆଜିର ତାରିଖରୁ ଆସନ୍ତ 30 ଦିନ ମଧ୍ୟରେ କ୍ଷୁଦ୍ର ଏବଂ ମଧ୍ୟମ ଶିଳ୍ପର ବକେୟା ଜିଏସ୍ଟି ଅର୍ଥ ଫେରସ୍ତ କରାଯିବ । ସେହିପରି ଆଗାମୀ ଦିନରେ ସମସ୍ତ ଜିଏସ୍ଟି ରିଟର୍ଣ୍ଣ 60 ଦିନ ମଧ୍ୟରେ ଫେରସ୍ତ କରାଯିବ । ଏହି ବ୍ୟବସ୍ଥା ପାଇଁ ଟିଆରଇଡିଏସ୍ ନାମକ ଏକ କମିଟି ଗଠନ କରାଯିବ । ସମସ୍ତ ଷ୍ଟାର୍ଟଅପ୍ ଏବଂ ଆଇଟି ସମସ୍ୟାର ସମାଧାନ ଏହି କମିଟି ଜରିଆରେ ହେବ । ସେହିପରି ବ୍ୟାଙ୍କ ଗୁଡିକୁ 70 ହଜାର କୋଟିର ଅଗ୍ରୀମ ଅର୍ଥ ପ୍ରଦାନ କରାଯାଇଥିବା ସମ୍ପର୍କରେ ସୂଚନା ପ୍ରଦାନ କରିଥିଲେ ଅର୍ଥମନ୍ତ୍ରୀ । ଋଣ ପରିଶୋଧର 15 ଦିନ ମଧ୍ୟରେ ସମସ୍ତ କାଗଜପତ୍ର ଗ୍ରାହକଙ୍କୁ ଫେରସ୍ତ କରାଯିବ ଏବଂ ରେପୋ ରେଟ୍ ଏବଂ ସୁଧହାରକୁ ଏକତ୍ର କରାଯିବ ଫଳସ୍ବରୂପ ଘର ଉପରେ ଇଏମ୍ଆଇ ଶସ୍ତା ହେବ । ଋଣ ଖିଲାପୀମାନଙ୍କୁ ଆଇନର କାଠଗଡ଼ାକୁ ଟଣାଯିବନି ବରଂ ଜୋରିମାନା କରାଯିବ ବୋଲି ଜଣାପଡିଛି ।
