ଉତ୍ତରପ୍ରଦେଶରେ କଂଗ୍ରେସ ନିଜର ସାଙ୍ଗଠନିକ ସ୍ଥିତିକୁ ମଜବୁତ୍ କରିବାକୁ ପ୍ରୟାସ କରୁଥିବାବେଳେ ଦଳକୁ ଏକ ବଡ ଝଟ୍କା ଲାଗିଛି । ଦଳର ବରିଷ୍ଠ ନେତା ତଥା ତିନି ତିନି ଥର ସାଂସଦ ରହିଥିବା ରାଜକୁମାରୀ ରତ୍ନା ସିଂହ ଆଜି ବିଜେପିରେ ସାମିଲ୍ ହୋଇଛନ୍ତି । ପ୍ରତାପଗଡ଼ର ପୂର୍ବତନ ସାଂସଦ ରାଜକୁମାରୀ ରତ୍ନା ସିଂହ ହେଉଛନ୍ତି ପୂର୍ବତନ ବିଦେଶ ମନ୍ତ୍ରୀ ରାଜ ଦିନେଶ ସିଂହଙ୍କ ପୁତ୍ରୀ । କଂଗ୍ରେସର ବରିଷ୍ଠ ନେତା ପ୍ରସାଦ ତିଓ୍ବାରୀଙ୍କ ଅତି ନିକଟତମ ହେଉଛନ୍ତି ରତ୍ନା ସିଂହ । ଉତ୍ତରପ୍ରଦେଶ କଂଗ୍ରେସ ପ୍ରଭାରୀ ପ୍ରିୟଙ୍କା ଗାନ୍ଧିଙ୍କ ସହ ତାଙ୍କର ମନୋମାଳିନ୍ୟ ପାଇଁ ସେ କଂଗ୍ରେସ ଛାଡ଼ିଥିବାର ଜଣାପଡିଛି । ପୂର୍ବରୁ ରତ୍ନା ଲକ୍ଷ୍ନୌଠାରେ ବିଜେପିରେ ସାମିଲ୍ ହେବ ବୋଲି କାର୍ଯ୍ୟକ୍ରମ ରହିଥିଲା । ଇତିମଧ୍ୟରେ ବିଧାନସଭାର ଉପନିର୍ବାଚନ ତାତି କାରଣରୁ ଏଥିରେ ପରିବର୍ତ୍ତନ କରାଯାଇଛି । ରାଜକୁମାରୀ ରତ୍ନା ସିଂହ ପ୍ରତାପଗଡ଼ ସଂସଦୀୟ ଆସନରୁ ୧୯୯୬, ୧୯୯୯ ଓ ୨୦୦୯ରେ ସାଂସଦ ରୂପେ ନିର୍ବାଚିତ ହୋଇଥିବାବେଳେ ୨୦୧୪ ଓ ୨୦୧୯ରେ ତାଙ୍କୁ ପରାଜୟର ସାମ୍ନା କରିବାକୁ ପଡ଼ିଥିଲା ।
