ମହାରାଷ୍ଟ୍ର ବିଧାନସଭା ନିର୍ବାଚନ ପାଇଁ ଭାରତୀୟ ଜନତା ପାର୍ଟି ଆଜି ଘୋଷଣା ପତ୍ର ଜାରି କରିଛି । ଏହାକୁ ସଂକଳ୍ପ ପତ୍ର ନାମ ଦିଆଯାଇଛି । ଏହାକୁ ବିଜେପିର କାର୍ଯ୍ୟକାରୀ ଅଧ୍ୟକ୍ଷ ଜେପି ନଡ୍ଡା, ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାବୀସ ଓ ରାଜ୍ୟ ବିଜେପି ଅଧ୍ୟକ୍ଷ ଚନ୍ଦ୍ରକାନ୍ତ ପାଟିଲ୍ଙ୍କ ସମେତ ଓ ଅନ୍ୟ ନେତାଙ୍କ ଉପସ୍ଥିତିରେ ଏହା ଜାରି କରାଯାଇଥିଲା । ବିଜେପି ଏଥିରେ ନିଜର ୫ ବର୍ଷର ସରକାରରେ ଏକ କୋଟି ଚାକିରି ଦେବ ବୋଲି କହିଛି । ଏଥିରେ ପୂରା ମହାରାଷ୍ଟ୍ରକୁ ଭାରତ ନେଟ୍ ଓ ମହାରାଷ୍ଟ୍ର ନେଟ୍ ମାଧ୍ୟମରେ ଇଣ୍ଟରନେଟ୍ ସହ ଯୋଡ଼ିବାର ପ୍ରତିଶ୍ରୁତି ମଧ୍ୟ କରିଛନ୍ତି । ସେହିପରି ପ୍ରଧାନମନ୍ତ୍ରୀ ଆୟୁଷ୍ମାନ ଯୋଜନା ଓ ମହାତ୍ମା ଫୁଲେ ଜନ ଆରୋଗ୍ୟ ଯୋଜନାରୁ ଯେମିତି କୌଣସି ବଞ୍ଚିତ ନ ରୁହନ୍ତି ଏହାର ସୁନିଶ୍ଚିତ କରିବା ପାଇଁ ମଧ୍ୟ ଏହି ଘୋଷଣାପତ୍ରରେ ପ୍ରତିଶ୍ରୁତି ରହିଛି । ଏଥିସହିତ ଆଗାମୀ ୫ ବର୍ଷ ମଧ୍ୟରେ ମହାରାଷ୍ଟ୍ରକୁ ମରୁଡି ମୁକ୍ତ କରିବାର ଘୋଷଣା କରାଯାଇଛି । ବିଭିନ୍ନ ନଦୀର ସଂଯୋଗୀକରଣ ଏବଂ ବର୍ଷା ଓ ବନ୍ୟା ସମୟରେ ସମୁଦ୍ରକୁ ଚାଲିଯାଉଥିବା ପାଣିକୁ ମରୁଡ଼ି ଅଞ୍ଚଳରେ ବିନିଯୋଗ କରିବା ନେଇ ପ୍ରତିଶ୍ରୁତି ଦିଆଯାଇଛି । ଆଗାମୀ ୫ ବର୍ଷ ମଧ୍ୟରେ କୃଷିରେ ବ୍ୟବହୃତ ହେଉଥିବା ବିଜୁଳିକୁ ସୌର ଶକ୍ତି ଦ୍ବାରା କୃଷକଙ୍କୁ ୧୨ ଘଣ୍ଟାରୁ ଅଧିକ ବିଜୁଳି ଯୋଗାଇ ଦେବା ପାଇଁ ମଧ୍ୟ ଘୋଷଣା କରାଯାଇଛି । ସେହିପରି ସମସ୍ତଙ୍କୁ ଶୁଦ୍ଧ ଜଳ ତଥା ରାଜ୍ୟର ସମସ୍ତ ସଡକର ସ୍ଥାୟୀ ମରାମତି ଉପରେ ପ୍ରାଧାନ୍ୟ ଦିଆଯାଇଛି ।