ମହାରାଷ୍ଟ୍ରରେ ସରକାର ଗଠନ ନେଇ ବିଜେପି ଶିବସେନା ଭିତରେ ଛକାପଞ୍ଚା ଜାରି ରହିଛି । ବିଧାୟକ ଦର ନେତା ଭାବେ ଦେବେନ୍ଦ୍ର ଫଡ୍ନବୀସ୍ ନିର୍ବାଚିତ ହୋଇଛନ୍ତି । ବିଧାୟକ ଦଳର ନେତା ରୂପେ ନିର୍ବାଚିତ ହେବା ପରେ ଫଡ୍ନବୀସ୍ କହିଛନ୍ତି ଯେ, ମହାରାଷ୍ଟ୍ରରେ ମେଣ୍ଟ ସରକାର ହେବ, ଏଥିରେ ସନ୍ଦେହ ନାହିଁ । କାରଣ ନିଶ୍ଚିତ ରୂପେ ଏହି ଜନାଦେଶ ବିଜେପି ଓ ଶିବସେନା ମେଣ୍ଟ ଲାଗି ଉଦ୍ଦିଷ୍ଟ କାରଣ ଉଭୟ ଦଳ ମେଣ୍ଟ ପାଇଁ ହିଁ ଭୋଟ୍ ମାଗିଥିଲେ। ଆଜି ମହାରାଷ୍ଟ୍ର ବିଧାନସଭା ଭବନରେ ବିଜେପିର ବିଧାୟକ ଦଳ ବୈଠକ ଆୟୋଜିତ ହୋଇଛି। ବୈଠକରେ ଫଡନବିସଙ୍କୁ ବିଧାୟକ ଦଳର ନେତା ଚୟନ କରାଯାଇଛି। ବୈଠକରେ ମହାରାଷ୍ଟ୍ର ବିଜେପି ରାଜ୍ୟ ସଭାପତି ଚନ୍ଦ୍ରକାନ୍ତ ପାଟିଲ ଓ ବରିଷ୍ଠ ନେତା ସୁଧୀର ମୁନଙ୍ଗଟିଓ୍ଵାର ଦେବେନ୍ଦ୍ର ଫଡନବିସଙ୍କୁ ବିଧାୟକ ଦଳର ନେତା ଭାବେ ଚୟନ ନିମନ୍ତେ ପ୍ରସ୍ତାବ ରଖିଥିଲେ, ଯାହା ସର୍ବସମ୍ମତି କ୍ରମେ ପାରିତ ହୋଇଛି। ମହାରାଷ୍ଟ୍ର ସରକାର ଗଠନ ହେତୁ କେନ୍ଦ୍ରୀୟ ପର୍ଯ୍ୟବେକ୍ଷକ ଭାବେ ନିଯୁକ୍ତ କେନ୍ଦ୍ର ମନ୍ତ୍ରୀ ନରେନ୍ଦ୍ର ସିଂହ ତୋମାର ଏହି ସୂଚନା ଦେଇ କହିଛନ୍ତି ଯେ, ବିଜେପି ଶିବସେନା ସହିତ ଆଲୋଚନା ଜାରି ରହିଛି, ରାଜ୍ୟରେ ମେଣ୍ଟ ସରକାର ହିଁ ହେବ ଏବଂ ଫଡନବୀସ ମୁଖ୍ୟମନ୍ତ୍ରୀ ହେବେ। ଅପରପକ୍ଷରେ ଆସନ୍ତାକାଲି ଶିବସେନାର ବିଧାୟକ ଦଳର ବୈଠକ ହେବାକୁ ଯାଉଛି। ଏହି ବୈଠକରେ ମେଣ୍ଟ ସରକାରରେ ଶିବସେନା ନିଜର ସ୍ଥିତି ତଥା ଭୂମିକା ସ୍ପଷ୍ଟକରିବ ।
