ସମୀକ୍ଷା ବ୍ୟୁରୋ
ଏଣିକି ଟ୍ଵିଟରରେ ରାଜନୈତିକ ବିଜ୍ଞାପନ ଛପାଯିବ ନାହିଁ। ନଭେମ୍ବର ୨୨ରୁ ଟ୍ଵିଟର ଏହି ନିୟମ ଲାଗୁ କରିବ। କମ୍ପାନୀର ମୁଖ୍ୟ ଅଧିକାରୀ ଜ୍ୟାକ ଡର୍ସି ଅଧିକାରିକ ଆକାଉଣ୍ଟରେ ଏହି ବିଷୟରେ ସୂଚନା ଦେଇଛନ୍ତି । ୨୦୧୪ ଓ ୨୦୧୯ ସାଧାରଣ ନିର୍ବାଚରେ ସୋସିଆଲ ମିଡିଆ ନିର୍ବାଚନରେ ବହୁ ଗୁରୁତ୍ବପୂର୍ଣ୍ଣ ଭୂମିକା ନିଭାଇଥିଲା । ୨୦୧୪ରେ ବିଜେପି ସୋସିଆଲ୍ ମିଡିଆର ବହୁଳ ଉପଯୋଗ କରିଥିଲା । ସେହିପରି ୨୦୧୬ରେ ହୋଇଥିବା ଆମେରିକୀୟ ରାଷ୍ଟ୍ରପତି ନିର୍ବାଚନରେ ମଧ୍ୟ ସୋସିଆଲ୍ ମିଡିଆକୁ ବହୁଳ ବ୍ୟବହାର କରାଯାଇଥିଲା । ଏଥିପାଇଁ ବିଶ୍ବସ୍ତରରେ ରାଜନୈତିକ ବିଜ୍ଞାପନ ଉପରେ ପ୍ରତିବନ୍ଧକ ଲଗାଇଛି । ବିଜ୍ଞାପନ ଜରିଆରେ ଲୋକଙ୍କ ନିକଟରେ ବାର୍ତ୍ତା ପହଁଚିବା ଉଚିତ୍ ସେମାନଙ୍କୁ କିଣାଯିବା ଉଚିତ୍ ନୁହେଁ। କମରସିଆଲ ବିଜ୍ଞାପନଦାତାଙ୍କ ପାଇଁ ଇଣ୍ଟରନେଟ୍ ଏବଂ ବିଜ୍ଞାପନ ବହୁ ପ୍ରଭାବଶାଳୀ। ଏହା ରାଜନୀତି ପାଇଁ ମହତ୍ଵପୂର୍ଣ୍ଣ ଭୂମିକା ଗ୍ରହଣ କରେ। ଏହା ଜରିଆରେ ଭୋଟରଙ୍କୁ ପ୍ରଭାବିତ କରି ବ୍ୟବହାର କରାଯାଉଛି। ଭ୍ରମାତ୍ମକ ସୂଚନା ପ୍ରସାରଣ ଉପରେ ପ୍ରତିବନ୍ଧକ ଲଗାଇବାକୁ ଏଭଳି ପଦକ୍ଷେପ ନିଆଯାଇଛି। ପ୍ରଥମେ ପ୍ରାର୍ଥୀଙ୍କ ବିଜ୍ଞାପନ ଉପରେ ପ୍ରତିବନ୍ଧକ ଲଗାଇବାକୁ ଚେଷ୍ଟା କରାଯାଇଥିଲା। କିନ୍ତୁ ପରେ ବିଭିନ୍ନ ରାଜନୈତିକ ପ୍ରସଙ୍ଗକୁ ନେଇ ପ୍ରକାଶ ପାଉଥିବା ବିଜ୍ଞାପନ ଉପରେ ପ୍ରତିବନ୍ଧକ ଲଗାଇବାକୁ ବିଚାର କରାଯାଇଛି ବୋଲି ଜ୍ୟାକ କହିଛନ୍ତି।