ସମୀକ୍ଷା ବ୍ୟୁରୋ
ରାଜ୍ୟରେ ଶିକ୍ଷା ବ୍ୟବସ୍ଥାକୁ ସୁଦୃଢ କରିବାକୁ ବିଭିନ୍ନ ଜିଲ୍ଲାର ସ୍କୁଲ ପରିଦର୍ଶନ କରିବା ସହ ଶିକ୍ଷା ବ୍ୟବସ୍ଥାର ଅନିୟମିତତା ନେଇ କତ୍ତୃପକ୍ଷଙ୍କୁ ତାଗିଦ୍ କରୁଛନ୍ତି ସ୍କୁଲ ଓ ଗଣଶିକ୍ଷା ମନ୍ତ୍ରୀ ସମୀର ଦାଶ। ନିକଟରେ ସମୀର ଦାଶ ମାଲକାନାଗିରି ଜିଲ୍ଲା ସ୍ଵାଭିମାନ ଅଞ୍ଚଳ ସ୍କୁଲ ପରିଦର୍ଶନ କରିଥିଲେ। ସେଠାରେ ସରକାରୀ ସ୍କୁଲ ଓ ଶିକ୍ଷକମାନଙ୍କ ନାନା ସମସ୍ୟା ପରିଲକ୍ଷିତ କରି ବିଚ୍ଛିନ୍ନାଞ୍ଚଳରେ ଚିତ୍ରକୋଣ୍ଡା ଅଞ୍ଚଳରେ କ୍ଲଷ୍ଟର ତିଆରି ହେବ ବୋଲି ଘୋଷଣା କରିଛନ୍ତି। ସମୀର ଦାଶ କହିଛନ୍ତି ଯେ, ସ୍ଵାଭିମାନ ଅଞ୍ଚଳର ବିକାଶ ପାଇଁ ମୁଖ୍ୟମନ୍ତ୍ରୀ ୧୦୦ କୋଟି ଘୋଷଣା କରିଥିଲେ। ସେଥିରୁ ଶିକ୍ଷାର ବିକାଶ ପାଇଁ ୧୦ କୋଟି ଟଙ୍କା ଖର୍ଚ୍ଚ ହେବ। ଏହି ଆଧାରରେ ଶିକ୍ଷକଙ୍କ ପାଇଁ କ୍ଲଷ୍ଟର ତିଆରି ହେବ। ଶିକ୍ଷକମାନଙ୍କୁ ଯିବା ଆସିବାରେ ୬ ଘଣ୍ଟା ସମୟ ଲାଗୁଛି। ସେମାନଙ୍କୁ ରହିବା ପାଇଁ ସରକାରୀ କ୍ଵାର୍ଟର ଯୋଗାଇ ଦିଆଯିବ। ଗମନାଗମନରେ ଶିକ୍ଷକଙ୍କ ସମୟ ନଷ୍ଟ ହେବ ନାହିଁ। ଫଳରେ ସେମାନେ ଉଚିତ୍ ସମୟରେ ବିଦ୍ୟାଳୟକୁ ଆସି ଶିକ୍ଷାଦାନ କରିପାରିବେ। ତେଣୁ କ୍ଲଷ୍ଟରରେ ଆଠ ଦଶଟି କ୍ଵାର୍ଟର୍ସ ରହିବ। ୧୦ କୋଟି ଟଙ୍କା ବ୍ୟୟରେ ଖୁବଶୀଘ୍ର କ୍ଲଷ୍ଟର ନିର୍ମାଣ ହେବ ବୋଲି ଗଣଶିକ୍ଷା ମନ୍ତ୍ରୀ କହିଛନ୍ତି।