କୋଲକାତା,19/12 :ଆଇପିଏଲ୍ 2020 ପାଇଁ ନିଲାମୀ କୋଲକାତାରେ ଆରମ୍ଭ ହୋଇଛି । ବିଦେଶୀ ଖେଳାଳି ଭାବରେ ସର୍ବାଧିକ ମୂଲ୍ୟରେ ବିକ୍ରି ହୋଇ ପ୍ୟାଟ କମିନ୍ସ ଇତିହାସ ରଚିଛନ୍ତି । କଲିକତା ନାଇଟ୍ ରାଇଡର୍ସ (କେକେଆର) କମିନ୍ସଙ୍କୁ 15.50 କୋଟି ଟଙ୍କାରେ କିଣିଛି । ପ୍ୟାଟ୍ କମିନ୍ସଙ୍କୁ ନେବା ପାଇଁ ଦିଲ୍ଲୀ କ୍ୟାପିଟାଲ୍ସ ଓ ରୟାଲ୍ ଚ୍ୟାଲେଞ୍ଜର୍ସ ମଧ୍ୟରେ ଜୋରଦାର ଟକ୍କର ଦେଖିବାକୁ ମିଳିଥିଲା । ମାତ୍ର ଶେଷରେ ବାଜି ମାରି ନେଇଥିଲା କେକେଆର । ଉଭୟ ଦଳ 15.25ରେ ପହଞ୍ଚିବା ପରେ କେକେଆର 15.50 କୋଟିରେ କମିନ୍ସଙ୍କୁ କିଣିଥିଲା । ସେହିପରି ଅଷ୍ଟ୍ରେଲୀୟ ଗ୍ଲେନ୍ ମ୍ୟାକ୍ସଓ୍ବେଲଙ୍କୁ କିଙ୍ଗ୍ସ ଇଲେଭେନ ପଞ୍ଜାବ 10.75 କୋଟିରେ କିଣିଛି । ଦିଲ୍ଲୀ କ୍ୟାପିଟାଲ୍ସ ମଧ୍ୟ ମ୍ୟାକ୍ସଓ୍ବେଲଙ୍କୁ କିଣିବା ପାଇଁ ଚେଷ୍ଟା କରିଥିଲା । ସେହିପରି ଦକ୍ଷିଣ ଆଫ୍ରିକୀୟ ଅଲରାଉଣ୍ଡର କ୍ରିସ୍ ମୋରିସ୍ 10 କୋଟିରେ ଆରସିବିକୁ ଯାଇଛନ୍ତି । ଅନ୍ୟମାନଙ୍କ ମଧ୍ୟରେ ସେଲ୍ଡନ୍ କଟରେଲ୍(8.5 କୋଟି) ରାଜସ୍ଥାନ ଏବଂ ନାଥାନ କଲ୍ଟର ନାଇଲ୍(8 କୋଟି) ଦାମରେ ମୁମ୍ବାଇକୁ ଯାଇଛନ୍ତି । ଇଂଲଣ୍ଡର ସାମ୍ କୁରାନ୍ଙ୍କୁ(5.5 କୋଟି)ରେ ଚେନ୍ନାଇ କିଣିଥିବା ବେଳେ ଇଅନ୍ ମୋର୍ଗାନଙ୍କୁ 5.2 କୋଟି ଟଙ୍କାରେ କେକେଆର କିଣିଛି ।
ଭାରତୀୟ ଖେଳାଳିଙ୍କ ମଧ୍ୟରେ ପୀୟୁଷ ଚାଓ୍ବଲାଙ୍କୁ ସର୍ବାଧିକ 6.75 କୋଟି ଟଙ୍କାରେ ଚେନ୍ନାଇ କିଣିଛି । ଏହି ଭେଟେରାନ ସ୍ପିନର ବିଗତ ଚାରି ସିଜିନ ଧରି କୋଲକାତା ପାଇଁ ଖେଳି ଆସୁଥିଲେ । ଅନ୍ୟତମ କେକେଆର ଖେଳାଳି ରବିନ ଉତ୍ଥାପା 3 କୋଟି ଟଙ୍କାରେ ରାଜସ୍ଥାନ ରୟାଲ୍ସକୁ ଯାଇଛନ୍ତି । ସେହିପରି ବରୁଣ ଚକ୍ରବର୍ତ୍ତୀଙ୍କୁ ଆଶ୍ଚର୍ଯ୍ୟଜନକ ଭାବରେ କେକେଆର 4 କୋଟି ଟଙ୍କାରେ କିଣିଛି । ଗତ ସିଜିନରେ ପଞ୍ଜାବ ଚକ୍ରବର୍ତ୍ତୀଙ୍କୁ 8.4 କୋଟିରେ କିଣିଥିବା ବେଳେ ମାତ୍ର ଗୋଟିଏ ମ୍ୟାଚ୍ ଖେଳିଥିଲେ । (ଏଜେନ୍ସୀ)
