ଭୁବନେଶ୍ବର, 21/12: ରାଜ୍ୟରେ ଆର୍ଥିକ ବିକାଶ କ୍ଷେତ୍ରରେ ଏସ୍ଏଲ୍ବିସି, ରିଜର୍ଭ ବ୍ୟାଙ୍କ ଅଫ୍ ଇଣ୍ଡିଆ, ନାବାର୍ଡ, ଅର୍ଥ ବିଭାଗ ଏବଂ ସମସ୍ତ ବ୍ୟାଙ୍କିଂ କ୍ଷେତ୍ରର ସହଭାଗିତା ଜାରି ରହି ଆର୍ଥିକ ଅନ୍ତର୍ଭୁକ୍ତିକରଣ କାର୍ଯ୍ୟ ସକ୍ରିୟ ଭାବେ ସମ୍ପାଦନା କରାଯାଉଥିବା ସମ୍ପର୍କରେ ଆଜିର ୧୫୭ତମ ରାଜ୍ୟସ୍ତରୀୟ ବ୍ୟାଙ୍କିଂ କମିଟି ବୈଠକରେ ଆଲୋଚନା ହୋଇଥିଲା। ଏହି ବୈଠକରେ ଉଦ୍ବୋଧନ ଦେଇ ଅର୍ଥ, ଅବକାରୀ ମନ୍ତ୍ରୀ ନିରଞ୍ଜନ ପୂଜାରୀ ଡିଜିଟାଲ୍ ପଇଠ ମାଧ୍ୟମରେ ହିତାଧିକାରୀଙ୍କୁ ସିଧାସଳଖ ଅର୍ଥ ହସ୍ତାନ୍ତର ଉପରେ ସରକାର ଗୁରୁତ୍ବ ଦେଉଛନ୍ତି ବୋଲି କହିଛନ୍ତି। ମାଓ ଉପଦ୍ରୁବ ଅଞ୍ଚଳ ଗୁଡ଼ିକରେ ବ୍ୟାଙ୍କିଂ ସେବାର ଉନ୍ନତି ପାଇଁ ନାବାର୍ଡ ଓ ଏସ୍ଏଲ୍ବିସି ମଧ୍ୟରେ ଆଲୋଚନା ହୋଇ ଭିସାଟ୍ ମାଧ୍ୟମରେ ଇଣ୍ଟରେନଟ୍ ସେବା ଉପଲବ୍ଧ କରାଯିବା ପାଇଁ ମନ୍ତ୍ରୀ ପୂଜାରୀ କହିଛନ୍ତି। ସେହିପରି ଯେଉଁ ଗ୍ରାମପଞ୍ଚାୟତଗୁଡ଼ିକରେ ସ୍ଥାୟୀ ବ୍ୟାଙ୍କ ନାହିଁ, ସେଠାରେ ନୂଆ ବ୍ୟାଙ୍କ ଖୋଲିବା ପାଇଁ ଏକ କମିଟି ଗଠନ କରାଯାଇଛି ସେହିପରି ଅଭାବୀ ଛାତ୍ରମାନଙ୍କୁ ଋଣ ଯୋଗାଇବା ଦିଗରେ ପଦକ୍ଷେପ ନେବା ଉପରେ ମନ୍ତ୍ରୀ ଗୁରୁତ୍ବାରୋପ କରିଥିଲଷ। ସେହିପରି ୫ଟି କାର୍ଯ୍ୟକ୍ରମ ମାଧ୍ୟମରେ ଜନସାଧାରଣଙ୍କୁ ପ୍ରତିକ୍ଷେତ୍ରରେ ଉପଯୁକ୍ତ ସେବା ଯୋଗାଇ ଦେବାରେ ପ୍ରମୁଖ ବ୍ୟାଙ୍କମାନେ ସୂଚାରୁ ରୂପେ କାର୍ଯ୍ୟ କରିବାର ଆବଶ୍ୟକତା ରହିଛି ବୋଲି ମନ୍ତ୍ରୀ ଶ୍ରୀ ପୂଜାରୀ ପ୍ରକାଶ କରିଥିଲେ। ଏହି ବେୈଠକରେ ଉନ୍ନୟନ କମିଶନର, ଅର୍ଥ ବିଭାଗର ପ୍ରମୁଖ ଶାସନ ସଚିବ ଅଶୋକ କୁମାର ମୀନା, ସ୍ବତନ୍ତ୍ର ସଚିବ ଦେବାଶିଷ ପଣ୍ଡା, ମିଶନ ଶକ୍ତି କମିଶନର ସୁଜାତା କାର୍ତ୍ତିକେୟନ୍ ପ୍ରମୁଖ ଉପସ୍ଥିତ ରହି ଏ ସମ୍ପର୍କିତ ମତ ଦେଇଥିଲେ। ଅନ୍ୟମାନଙ୍କ ମଧ୍ୟରେ ଏହି ବୈଠକରେ ରିଜର୍ଭ ବ୍ୟାଙ୍କର ଆଞ୍ଚଳିକ ନିର୍ଦ୍ଦେଶକ ଏମ୍.କେ. ମଲ୍ଲ, ନାବାର୍ଡର ସିଜିଏମ୍ ଏ. ଚନ୍ଦ୍ରଶେଖର, ୟୁକୋ ବ୍ୟାଙ୍କର ସିଇଓ ତଥା ଏମ୍ଡି ଏ.କେ. ଗୋୟଲ୍, ରାଜ୍ୟ ଅର୍ଥ ପ୍ରତିଷ୍ଠାନର ସ୍ବତନ୍ତ୍ର ସଚିବ ତଥା ନିର୍ଦ୍ଦେଶକ ପି.କେ. ବିଶ୍ବାଳଙ୍କ ସମେତ ଅର୍ଥ ବିଭାଗର ବରିଷ୍ଠ ପଦାଧିକାରୀ ଓ ପ୍ରମୁଖ ବ୍ୟାଙ୍କଗୁଡ଼ିକର ପ୍ରତିନିଧିମାନେ ଉପସ୍ଥିତ ରହିଥିଲେ।
