କୁଜଙ୍ଗ: ଗଡ଼କୁଜଙ୍ଗଠାରୁ ବାଇକ୍ ଯୋଗେ ଘରକୁ ଫେରୁଥିବାବେଳେ ବାଲିତୁଠ କୁଜଙ୍ଗ ରାସ୍ତାରେ ଦୁର୍ଘଟଣା ଘଟି ଦୁଇ ଆରୋହୀଙ୍କ ମଧ୍ୟରୁ ଜଣଙ୍କର ମୃତ୍ୟୁ ହୋଇଥିବାବେଳେ ଅନ୍ୟଜଣେ ଗୁରୁତର ଭାବେ ଆହତ ହୋଇଛନ୍ତି। ଘଟଣାରୁ ଜଣାପଡ଼ିଛି ଏରସମା ବ୍ଳକ ଓ କୁଜଙ୍ଗ ଥାନା ଅନ୍ତର୍ଗତ ଚଟୁଆ ଗ୍ରାମର ସ୍ୱର୍ଗତ ଗଙ୍ଗାଧର ଖୁଂଟିଆଙ୍କ ପୁତ୍ର ରବିନ୍ଦ୍ର ଖୁଂଟିଆ(୩୦) ଏବଂ ଏହି ଥାନା ଅନ୍ତର୍ଗତ ପାଟପୁର ଗ୍ରାମର ସାନ୍ତନୁ ସାହୁଙ୍କୁ ପୁତ୍ର ଭବାନୀଶଙ୍କର ସାହୁ(୨୫) ଏକ ବାଇକ ଯୋଗେ ଶୁକ୍ରବାର ଗଡ଼କୁଜଙ୍ଗ ଠାରେ ଆୟୋଜିତ ଜିନ୍ଦଲ କମ୍ପାନୀର ପରିବେଶ ମଞ୍ଜୁରୀ ଜନଶୁଣାଣିରେ ଯୋଗଦେବାକୁ ଯାଇଥିଲେ। ଅପରାହ୍ନରେ ଜନଶୁଣାଣି ସ୍ଥଳରୁ ନିଜ ଗ୍ରାମକୁ ଫେରୁଥିବାବେଳେ ଅସାବଧାନତା ହେତୁ ଗରାଇଦେଇ ଛକ ନିକଟରେ ଦୁର୍ଘଟଣା ଘଟିଥିଲା। ଘଟଣା ସ୍ଥଳରେ ରବୀନ୍ଦ୍ର ଏବଂ ଭବାନୀ ଗାଡ଼ିରୁ ଛିଟିକି ପଡ଼ିବା ସହିତ ଗୁରୁତର ଭାବେ ଆହତ ହୋଇଥିଲେ। ଆହତ ଦୁଇ ଜଣଙ୍କୁ ତୁରନ୍ତ ଆମ୍ବୁଲାନ୍ସ ଯୋଗେ କୁଜଙ୍ଗ ମେଡ଼ିକାଲକୁ ନିଆଯାଇଥିଲା। ରବୀନ୍ଦ୍ରଙ୍କ ମୁଣ୍ଡରେ ଆଘାତ ଯୋଗୁ ଅବସ୍ଥା ଗୁରୁତର ହୋଇପଡ଼ିବାରୁ ତାଙ୍କୁ କଟକ ଏସିବିକୁ ସ୍ଥାନାନ୍ତର କରାଯାଇଥିଲା। ମାତ୍ର ଶୁକ୍ରବାର ବିଳମ୍ବିତ ରାତ୍ରୀରେ ସେଠାରେ ତାଙ୍କର ମୃତ୍ୟୁ ହୋଇଥିବା ଜଣାପଡ଼ିଛି। ଭବାନୀ ଆହତ ହୋଇ କୁଜଙ୍ଗ ମେଡ଼ିକଲରେ ଚିକିତ୍ସିତ ହେଉଥିବା ଜଣାପଡ଼ିଛ। ମୃତକ ରବୀନ୍ଦ୍ର ଜଣେ ଗରୀବ, ଘରେ ତାଙ୍କର ପତ୍ନୀ ଏବଂ ଦୁଇ ନାବାଳକ ପୁତ୍ର ଅଛନ୍ତି। ଉକ୍ତ ଦୁଃଖଦ ଘଟଣାକୁ ନେଇ ଚଟୁଆ ଛକ ବଜାରର ସମସ୍ତ ବ୍ୟବସାୟ ପ୍ରତିଷ୍ଠାନ ଆଜି ଦିନ ତମାମ ବନ୍ଦ ରହିଥିବା ଜଣାପଡ଼ିଛି। ଆଜି ଅପରାହ୍ନରେ ଚଟୁଆ ଛକଠାରେ ରବୀନ୍ଦ୍ରଙ୍କ ମୃତ ଦେହ ପହଂଚିବା ପରେ ସ୍ଥାନୀୟ ଜନସାଧାରଣ ଏବଂ ବ୍ୟବସାୟୀମାନେ ମୃତଦେହ ରଖି କ୍ଷତିପୂରଣ ଦାବୀରେ କୁଜଙ୍ଗ ବାଲିତୁଠ ରାସ୍ତା ଅବରୋଧ କରିଥିଲେ। ଘଟଣା ସ୍ଥଳରେ କୁଜଙ୍ଗ ତହସିଲଦାର ପ୍ରଭାଷଚନ୍ଦ୍ର ବେହୁରା ଏବଂ କୁଜଙ୍ଗ ଥାନା ଅଧିକାରୀ ଦିଲ୍ଲୀପ କୁମାର ସାହୁ ପହଂଚି ରେଡ଼କ୍ରଶ ପାଣ୍ଠିରୁ ୧୦ ହଜାର ଟଙ୍କା ଦେବାପରେ ରାସ୍ତାରୋକ ପ୍ରତ୍ୟାହାର କରାଯାଇଥିଲା। ଅପରହ୍ନ ୪ଟାଠାରୁ ରାସ୍ତା ରୋକ କରାଯାଇ ସନ୍ଧ୍ୟା ସାଢେ ଛଅଟା ପର୍ଯ୍ୟନ୍ତ ଚାଲିଥିଲା।
chatua accident road block