ଭୁବନେଶ୍ବର- ଓଡିଆ ଚଳଚିତ୍ରର ପ୍ରଖ୍ୟାତ ନିର୍ଦ୍ଦେଶକ, ପ୍ରଯୋଜକ, ଲେଖକ ମନମୋହନ ମହାପାତ୍ରଙ୍କ ପରଲୋକ ଘଟିଛି। ସେ ଦୀର୍ଘଦିନ ଧରି ଗୁରୁତର ଅସୁସ୍ଥ ହୋଇ ଭୁବନେଶ୍ବରର ଏକ ଘରୋଇ ହସପିଟାଲରେ ଚିକିତ୍ସିତ ହେଉଥିଲେ। ତାଙ୍କର ଉଚ୍ଚ ମଧୁମେହ ରୋଗ ଥିବାରୁ କିଛି ଦିନ ତଳେ ହଠାତ ଅସୁସ୍ଥ ଅନୁଭବ କଲେ। ଫଳରେ ତୁରନ୍ତ ତାଙ୍କୁ ଏକ ଘରୋଇ ହସପିଟାଲରେ ଭର୍ତ୍ତି କରାଯାଇଥିଲା। ସେ ପ୍ରାୟ 10 ଦିନ ଧରି ଚିକିତ୍ସିତ ହେଉଥିଲେ ମଧ୍ୟ ତାଙ୍କ ସ୍ବାସ୍ଥ୍ୟରେ କୌଣସି ଉନ୍ନତି ପରିଲକ୍ଷିତ ହେଲା ନାହିଁ। ଡାକ୍ତରଙ୍କ ସବୁ ଚେଷ୍ଟା ସତ୍ବେ ସେ ଆଜି ଅପରାହ୍ନରେ ଶେଷ ନିଃସ୍ବାସ ତ୍ୟାଗ କରିଛନ୍ତି।
ମନମୋହନ ମହାପାତ୍ର ହେଉଛନ୍ତି ଏକମାତ୍ର ଓଡିଆ ନିର୍ଦ୍ଦେଶକ ଯେ କି ଆଠଟି ଜାତୀୟ ଚଳଚିତ୍ର ପୁରସ୍କାର ହାସଲ କରିପାରିଛନ୍ତି। ତାଙ୍କ ଚଳଚିତ୍ର ମଧ୍ୟରେ ରହିଛି ନିଶିଥ ସ୍ବପ୍ନ, ମଝି ପାହାଚ, ଟ୍ରାଏଡ ଆଫଟର ନୁନ୍, ନିରବ ଝଡ, ଶୀରରାତି, ଭିନ୍ନ ସମୟ ପ୍ରଭୃତି ଅନେକ କିଛି ରହିଛି। ସେହିପରି 1976 ମସିହାରେ ତାଙ୍କ ଦ୍ବାରା ନିର୍ମିତ ଚଳଚିତ୍ର ଶୀତରାତି 1982 ମସିହାରେ ଆନ୍ତର୍ଜାତୀୟ ଚଳଚିତ୍ର ଉତ୍ସବରେ ପ୍ରଦର୍ଶିତ ହୋଇଥିଲା। ତାଙ୍କ ବିୟୋଗରେ ଓଡିଆ ଚଳଚିତ୍ର ଜଗତରେ ଶୋକର ଛାୟା ଖେଳିଯାଇଛି।