ନୂଆଦିଲ୍ଲୀ : ଦିଲ୍ଲୀର ନିର୍ବାଚନୀ ଦଙ୍ଗଲ୍ରେ ନେତାମାନଙ୍କର ବୟାନବାଜି ଜାରି ରହିଛି । ରାଜଧାନୀରେ ଆସନ୍ତା ଫେବୃଆରୀ 8 ତାରିଖରେ 70ଟି ବିଧାନସଭା ଆସନ ପାଇଁ ଭୋଟ୍ଗ୍ରହଣ ଅନୁଷ୍ଠିତ ହେବ । ଫେବୃଆରୀ 11 ତାରିଖରେ ଏହାର ଫଳାଫଳ ବାହାରିବ । ରାଜଧାନୀ ଦିଲ୍ଲୀ ପାଞ୍ଚବର୍ଷ ପାଇଁ କାହାକୁ ବାଛୁଛି, ତାହା ସ୍ପଷ୍ଟ ହୋଇଯିବ । ତେବେ ଦିଲ୍ଲୀର ଦିଲ୍ରେ ରାଜ୍ କରିବା ପାଇଁ ସବୁ ରାଜନୈତିକ ଦଳମାନଙ୍କର ତୁଫାନି ନିର୍ବାଚନୀ ପ୍ରଚାର ଚାଲିଛି । ଏହି କ୍ରମରେ ଚର୍ଚ୍ଚାକୁ ଆସିଛି ଦୁଇ ପ୍ରମୁଖ ଦଳଙ୍କ ଚାଣକ୍ୟ ବନାମ ଚାଣକ୍ୟଙ୍କ ଜୁବାନି । ଦିଲ୍ଲୀରେ ବିଜେପିର ସରକାର ପାଇଁ ମୋର୍ଚ୍ଚା ସମ୍ଭାଳିଛନ୍ତି ବିଜେପି ଚାଣକ୍ୟ ଅମିତ୍ ଶାହା ନିଜର ଚିରାଚରିତ ଆକ୍ରମକ ଶୈଳୀରେ ପ୍ରଚାର କରିଛନ୍ତି । ରବିବାର ଦିନ ବାବରପୁରଠାରେ ଏକ ନିର୍ବାଚନୀ ରାଲିରେ ନାଗରିକତା ଆଇନ (ସିଏଏ) ବିରୋଧରେ ଶାହିନ୍ବାଗ୍ଠାରେ ପ୍ରଦର୍ଶନ କରୁଥିବା ପ୍ରଦର୍ଶନକାରୀଙ୍କୁ ଟାର୍ଗେଟ୍ କରି କହିଛନ୍ତି ଯେ, ‘ଇଭିଏମ୍ର ବଟନ୍’କୁ ଏତେ ରାଗରେ ଦବାଇବେ ଯେ, ବାବରପୁର ବଟନ୍ ଦାବିଲେ, ଏହାର କରେଣ୍ଟ ଶାହିନ୍ବାଗ ଭିତରେ ଲାଗିବ ।
ଅମିତ୍ ଶାହାଙ୍କ କଥାକୁ ଟାର୍ଗେଟ୍ କରିଛନ୍ତି ଜେଡେୟୁ ନେତା ପ୍ରଶାନ୍ତ କିଶୋର । ଆପ୍ର ନିର୍ବାଚନ ରଣନୀତିକାର୍ ପ୍ରଶାନ୍ତ ଜବାବ ଦେଇଛନ୍ତି । ପ୍ରଶାନ୍ତ ଟୁଇଟ୍ କରି କହିଛନ୍ତି ଯେ, ଜୋର୍ କା ଝଟ୍କା ଧୀରେ ସେ ଲାଗିବା ଦରକାର ।
ପ୍ରଶାନ୍ତ ନିଜର ଟୁଇଟ୍ରେ କହିଛନ୍ତି ଯେ, ‘ଫେବୃଆରୀ 8 ତାରିଖରେ ଦିଲ୍ଲୀଠାରେ ଇଭିଏମ୍ ବଟନ୍ ତ ପ୍ରେମରେ ଦବାଯିବ । କାରଣ ଜୋର୍ କା ଝଟ୍କା ଧୀରେ ଲାଗିବା ଦରକାର । ଯେମିତିକି ନିଜ ନିଜ ଭିତରେ ରହିଥିବା ଭାଇଚାରା ଓ ସୌହାର୍ଦ୍ଦ୍ୟ ବିପଦରେ ପଡିବନି । ଏହା ସହିତ ପ୍ରଶାନ୍ତ ଚାରିଟି ପ୍ରସଙ୍ଗକୁ ମଧ୍ୟ ଟୁଇଟ୍ କରିଛନ୍ତି । ଟୁଇଟ୍ରେ ନ୍ୟାୟ, ସ୍ବତନ୍ତ୍ରତା,ସମାନତା, ଭାତ୍ରୃତ୍ବ ବୋଲି କହିଛନ୍ତି ।
ସୂଚନାଯୋଗ୍ୟ, ଅମିତ୍ ଶାହା ଦିଲ୍ଲୀର ବାବର୍ପୁରଠାରେ ରବିବାର ଦିନ ଏକ ରାଲିକୁ ସମ୍ବୋଧିତ କରି କହିଥିଲେ ଯେ, ସିଏଏର ବିରୋଧ କରୁଥିବା ନେତାମାନେ ଦିଲ୍ଲୀରେ ଦଙ୍ଗା କରିବା ସହିତ ଲୋକଙ୍କୁ ଭ୍ରମିତ କରୁଛନ୍ତି । (ଏଜେନ୍ସି)