ବିଜେପି ଓ ମୋଦି ସରକାର ବିରୋଧରେ ମୋର୍ଚ୍ଚା ଉଠାଇଥିବା ଶିବସେନା ଏବେ ୟୁ ଟର୍ଣ୍ଣ ନେଇଛି । ମିଳିଥିବା ସୂଚନା ଅନୁସାରେ ଆଗାମୀ ନିର୍ବାଚନ ପାଇଁ ଏହି ଦୁଇ ପାର୍ଟି ୪୮ ଆସନକୁ ନେଇ ବୁଝାମଣା କରିଛନ୍ତି । ବିଜେପି ୨୫ ସିଟ୍ ଓ ଶିବସେନା ୨୩ ସିଟ୍ରେ ନିର୍ବାଚନୀ ମଇଦାନକୁ ଓହ୍ଲାଇବେ । କିନ୍ତୁ ଏବେବି ମୁଖ୍ୟମନ୍ତ୍ରୀ ପଦ ପାଇଁ ଟିକିଏ କେଞ୍ଚ ରହିଛି । ପୂର୍ବରୁ ଶିବସେନା ତଥା ସହଯୋଗୀ ଦଳକୁ ବିଜେପି ଟିକିଏ ଅଣଦେଖା କରୁଥିଲା । କିନ୍ତୁ ନିକଟରେ ସମାପ୍ତ ହୋଇଥିବା ରାଜସ୍ଥାନ, ମଧ୍ୟପ୍ରଦେଶ, ଛତିଶଗଡ଼ ନିର୍ବାଚନରେ ବିଜେପିର ପରାଜୟ ପରେ ବର୍ତ୍ତମାନ ବିଜେପି ତା’ର ସହଯୋଗୀ ଦଳଙ୍କ ପ୍ରତି ବିଶେଷ ଆଗ୍ରହ ଦେଖାଉଥିବାର ଜଣାପଡିଛି । ମହାରାଷ୍ଟ୍ରରେ ବିଧାନସଭା ନିର୍ବାଚନ ସମୟରେ ଦୁହିଁଙ୍କ ମେଣ୍ଟ ଭାଙ୍ଗିଯାଇଥିଲା । ବିଜେପି ଅଧିକ ସିଟ୍ ଜିତି ସରକାର ଗଢିଥିଲା । ଏହାପରଠାରୁ ଦୁଇ ଦଳଙ୍କ ଭିତରେ ଦୂରତା ବେଶ୍ ପରିଲକ୍ଷିତ ହେଉଥିଲା । ୨୦୧୪ ଲୋକସଭା ନିର୍ବାଚନରେ ମହାରାଷ୍ଟ୍ରରେ ବିଜେପି ୨୩ ଓ ଶିବସେନା ୧୮ଟି ସିଟ୍ ପାଇଥିଲେ । ବିଧାନସଭା ନିର୍ବାଚନରେ ବିଜେପି ୧୨୨ ଓ ଶିବସେନା ୬୩ଟି ସିଟ୍ ପାଇଥିଲେ । ତେବେ ବିଜେପି-ଶିବସେନା ମିଳିତ ଭାବେ ୨୦୧୯ ସାଧାରଣ ନିର୍ବାଚନକୁ ଓହ୍ଲାଇବେ । ଆଜି ସନ୍ଧ୍ୟାରେ ଔପଚାରିକ ଭାବେ ଏହା ଘୋଷଣା ହେବ ବୋଲି ଦୁଇ ଦଳ ପକ୍ଷରୁ ସୂଚନା ରହିଛି ।
