ପାକିସ୍ତାନ ଜେଲରେ ଥିବା ଭାରତୀୟ ନାଗରିକ କୁଳଭୂଷଣ ଯାଦବ ମାମଲାରେ ଆଜି ଅନ୍ତର୍ଜାତୀୟ ନ୍ୟାୟାଳୟରେ ଶୁଣାଣି ଆରମ୍ଭ ହୋଇଛି । ଭାରତ ପକ୍ଷରୁ ବରିଷ୍ଠ ଓକିଲ ହରିଶ ସାଲଭେ ଏହି ମାମଲା ଲଢୁଛନ୍ତି । ଏହି ମାମଲାରେ ନିଜର ଯୁକ୍ତି ରଖି ସାଲଭେ କହିଛନ୍ତି ଯେ, ପାକିସ୍ତାନ ଭିଏନା ସନ୍ଧିର ଉଲ୍ଲଙ୍ଘନ କରିଛି ଏବଂ ୧୩ ଥର ଗୁହାରି କରିବା ପରେ ମଧ୍ୟ କୁଲଭୂଷଣ ଯାଦବଙ୍କୁ ନିଜର ଓକିଲ ରଖିବାକୁ ଦିଆଗଲା ନାହିଁ । ଯାଦବଙ୍କୁ ଗିରଫଦାରିକୁ ବେଆଇନ ଘୋଷଣା କରାଯାଉ । ତାଙ୍କୁ ଦିଆଯାଇଥିବା ମୃତ୍ୟୁଦଣ୍ଡ ମାନବ ଅଧିକାରର ହନନ, କାରଣ ତାଙ୍କୁ ନିଜର ପକ୍ଷ ରଖିବାକୁ କୌଣସି ସୁଯୋଗ ଦିଆଯାଇନାହିଁ । ଏପରିକି କେଉଁ ଅପରାଧରେ ତାଙ୍କୁ ଗିରଫ କରି ମୃତ୍ୟୁଦଣ୍ଡ ଦିଆଯାଇଛି ତାହା ଠିକ ଭାବେ ପାକିସ୍ତାନ ଜଣାଇପାରୁନାହିଁ ବୋଲି ସେ କହିଛନ୍ତି । ଭାରତୀୟ ନୌସେନାର ଅବସରପ୍ରାପ୍ତ ଅଧିକାରୀ ଯାଦବଙ୍କୁ ପାକିସ୍ତାନର ସୈନ୍ୟ ଅଦାଲତ ଗୁପ୍ତଚର ଓ ଆତଙ୍କବାଦ ଆରୋପରେ ୨୦୧୭ ଏପ୍ରିଲରେ ମୃତ୍ୟୁ ଦଣ୍ଡ ଶୁଣାଇଥିଲା । ଭାରତ ୨୦୧୭ ମେ ୮ରେ ଆଇସିଜେରେ ମାମଲା ଉଠାଇଥିଲା ।
