ନିର୍ବାଚନ ଯେତିକି ପାଖେଇ ଆସୁଛି ରାଜନୀତି ଦଳମାନଙ୍କ ମଧ୍ୟରେ ସେତିକି ମେଣ୍ଟପ୍ରତି ଆଗ୍ରହ ବଢି ବଢି ଯାଉଛି। ଆସନ୍ତା ୨୦୧୯ ସାଧାରଣ ନିର୍ବାଚନ ପାଇଁ ସବୁଦଳ ନିଜ ନିଜର ମିତ୍ର ଖୋଜିବାରେ ଲାଗିପଡିଛନ୍ତି। ଦକ୍ଷିଣ ଭାରତରେ ସହଯୋଗୀ ସନ୍ଧାନରେ ଥିବା ବିଜେପିକୁ ଏଆଇଏଡିଏମକେର ସମର୍ଥନ ମିଳିପାରେ ବୋଲି ସୂଚନା ରହିଛି । ଆଗାମୀ ସାଧାରଣ ନିର୍ବାଚନରେ ବିଜେପି-ଏଆଇଏଡିଏମକେ ମଧ୍ୟରେ ମେଣ୍ଟ ହେବା ନେଇ ଆଜି ହୋଇପାରେ ବିଧିବଦ୍ଧ ଘୋଷଣା। ଆଜି ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହ ଓ ତାମିଲନାଡୁ ବିଜେପି ପ୍ରଭାରୀ ପୀୟୁଷ ଗୋୟଲ ତାମିଲନାଡୁ ଆସୁଛନ୍ତି। ସେମାନେ ତାମିଲନାଡୁ ମୁଖ୍ୟମନ୍ତ୍ରୀ ପିଲାନୀସାମୀ ଓ ଉପମୁଖ୍ୟମନ୍ତ୍ରୀ ପନିରସେଲଭମଙ୍କୁ ସାକ୍ଷାତ କରିବା କାର୍ଯ୍ୟକ୍ରମ ରହିଛି। ଏହି ଭେଟଘାଟ ପରେ ଦୁଇ ଦଳ ନେତା ମିଳିତ ସାମ୍ବାଦିକ ସମ୍ମିଳନୀ କରିପାରନ୍ତି। ୨୦୧୪ ଲୋକସଭା ନିର୍ବାଚନରେ ଏକାକୀ ମୈଦାନକୁ ଓହ୍ଲାଇଥିଲା ଏଆଇଏଡିଏମକେ। ୩୯ଟି ଆସନରୁ ଏକାକୀ ପୋଛି ନେଇଥିଲା ୩୭ଟି ସିଟ୍। ଗତକାଲି ମହାରାଷ୍ଟ୍ରରେ ଶିବସେନା ସହ ୪୮ଟି ଲାେକସଭା ଆସନରେ ଶିବସେନା ୨୩ ଓ ବିଜେପି ୨୫ଟି ଆସନରେ ବୁଝାମଣା କରିଥିବାବେଳେ ବିଧାନସଭାର ୨୮୮ଟି ଆସନରୁ ଉଭୟ ୫୦/୫୦ ସିଟ୍ରେ ଲଢିବେ ବୋଲି ଘୋଷଣା କରିଛନ୍ତି । ତେବେ ଆଗାମୀ ନିର୍ବାଚନ ପାଇଁ ବିଜେପି ତା’ର ସହଯୋଗୀ ଦଳ ପ୍ରତି ବିଶେଷ ଭାବରେ ଧ୍ୟାନ ଦେବାରେ ଲାଗିପଡିଛି । ତେବେ ମିଳିଥିବା ଏକଜିଟ୍ ପୋଲ୍ ତଥ୍ୟ ଆଧାରରେ ବିଜେପି ଚଳିତ ନିର୍ବାଚନରେ ତା’ର ମ୍ୟାଜିକ୍ ନମ୍ବର ଛୁଇଁ ନ ପାରିବାର ଆକଳନ କରାଯାଇଛି । ଏହି ପରିସ୍ଥିତିରେ ବିଜେପି ମେଣ୍ଟ ଜରିଆରେ ପୁଣି ଥରେ କ୍ଷମତାକୁ ଆସିବା ପାଇଁ ରାଜନୈତିକ ଚାଲ୍ ପ୍ରସ୍ତୁତ କରିଚାଲିଛି ।
